-
អាជ្ញាធរបញ្ជូនមនុស្ស ២ នាក់ក្នុងហិង្សាក្បែរក្រុមហ៊ុនកាពីតូលទៅតុលាការ
- ថ្ងៃចេញផ្សាយ ៨-កុម្ភៈ-២០១៦
ភ្នំពេញៈ មនុស្ស ២ នាក់ដែលត្រូវអាជ្ញាធរខណ្ឌ ៧ មករាបានចាប់ខ្លួនក្នុងអំពើហិង្សាក្បែរទីស្នាក់ការក្រុមហ៊ុនកាពីតូលសាខាផ្សារអូរឫស្សីត្រូវបានបញ្ជូនទៅសាលាដំបូងរាជធានីភ្នំពេញកាលពីថ្ងៃម្សិលមិញ ស្របពេលដែលអង្គការសង្គមស៊ីវិលចំនួន ៣៤ បានអំពាវនាវឲ្យមានការដោះលែងពួកគេវិញដោយពួកគេថាការចាប់ខ្លួននោះធ្វើឡើងមិនត្រឹមត្រូវ។កាលពីព្រឹកថ្ងៃសៅរ៍មានអំពើហិង្សាមួយបានកើតឡើងរវាងសមាជិកសមាគមរួបរួមគ្នាដើម្បីអភិវឌ្ឍន៍កម្ពុជា (CCDA) ជាមួយអតីតអ្នកបើកបររថយន្តក្រុមហ៊ុនកាពីតូលបណ្តាលឲ្យមនុស្ស ១៤ នាក់រងរបួសធ្ងន់ស្រាល និងអ្នកឃ្លាំមើលសិទ្ធិមនុស្សម្នាក់ និងមន្ត្រីនគរបាលម្នាក់។ ក្នុងហិង្សានោះដែរសមត្ថកិច្ចក៏បានចាប់ខ្លួនមនុស្ស ២ នាក់ឈ្មោះ ណន វណ្ណា អ្នកបើកបររថយន្តក្រុមហ៊ុនកាពីតូល និង រស់ ស៊ីផៃ សមាជិកសហភាពការងារកម្ពុជា។អធិការរងខណ្ឌ ៧ មករាលោក ក្រេក សការីន បានមានប្រសាសន៍ថាមនុស្ស ២ នាក់ដែលត្រូវបានចាប់ខ្លួននោះត្រូវបានបញ្ជូនទៅតុលាការហើយកាលពីរសៀលថ្ងៃម្សិលមិញក្រោយពីបានឃុំខ្លួន និងសាកសួរនៅអធិការដ្ឋានខណ្ឌ។ លោកថា៖ «យើងបានបញ្ជូនពួកគាត់ទៅតុលាការហើយគេកំពុងសួរនាំពួកគាត់រឿងហ្នឹងផុតដៃពួកខ្ញុំហើយមានការអីទៅសួរខាងតុលាការទៅ»។ព្រឹត្តិការណ៍នេះក្រុមអង្គការសង្គមស៊ីវិលចំនួន ៣៤ រួមមានលីកាដូ អាដហុក សហភាពការងារកម្ពុជា និងអង្គការមួយចំនួនទៀតបានចេញសេចក្តីថ្លែងការណ៍រួមកាលពីថ្ងៃសៅរ៍ថ្កោលទោសចំពោះអំពើហិង្សាដែលពួកគេថាប្រព្រឹត្តឡើងដោយក្រុមសមាគម CCDA ជាអ្នកការពាររថយន្តក្រុងកាពីតូលទៅលើក្រុមអ្នកតវ៉ាខណៈកម្លាំងនគរបាលមិនបានឆ្លើយតបឲ្យបានគ្រប់គ្រាន់ដើម្បីបញ្ចៀសអំពើហិង្សា។សេចក្តីថ្លែងការណ៍បានរកឃើញថាក្រុមអតីតអ្នកបើកបរដែលតវ៉ាបានព្យាយាមរារាំងរថយន្តក្រុងមួយមិនឲ្យចាកចេញពីស្ថានីយហើយពេលនោះអ្នកគាំទ្រក្រុមហ៊ុនមកពីសមាគម CCDA បានដើរទៅការពាររថយន្តក្រុងនោះហើយអំពើហិង្សាបានចាប់ផ្តើមឡើង។ សមាជិកមួយចំនួននៃសមាគម CCDA បានប្រើញញួរ និងដំបងដែកវាយដំ និងទាត់ធាក់ទៅលើក្រុមអ្នកតវ៉ាហើយនគរបាលបង្ក្រាបបាតុកម្មមួយចំនួនបានចូលរួមក្នុងការវាយដំនោះខណៈសមាជិកសមាគម និងមន្ត្រីនគរបាលមួយចំនួនទៀតបានព្យាយាមបញ្ឈប់អំពើហិង្សាតែមិនបានជោគជ័យ។ក្រោយការប៉ះទង្គិចគ្នានោះកម្លាំងនគរបាលបានព្យាយាមរុញច្រានអ្នកបើកបរ និងអ្នកគាំទ្រទាំងនោះឲ្យថយក្រោយ និងបានចាប់ខ្លួនមនុស្សពីរនាក់ប៉ុន្តែសមាជិកមកពីសមាគម CCDA ដែលជាអ្នកប្រើហិង្សាមិនត្រូវបានសមត្ថកិច្ចចាប់ខ្លួនឡើយ។ សេចក្តីថ្លែងការណ៍បន្តថា៖ «សុំអំពាវនាវឲ្យមានការដោះលែងជនរងគ្រោះដែលត្រូវចាប់ខ្លួនដោយមិនត្រឹមត្រូវ និងទាមទារឲ្យមានការស៊ើបអង្កេតលើព្រឹត្តិការណ៍នោះ»។តំណាងអតីតអ្នកបើកបររថយន្តក្រុមហ៊ុនកាពីតូល លោក ហ៊ិន មឿន បាននិយាយថាពួកគាត់តវ៉ាគ្រាន់តែចង់ឲ្យក្រុមហ៊ុនចេញមកចរចា និងទទួលពួកគាត់ចូលធ្វើការវិញប៉ុណ្ណោះពុំមានបំណងបង្កហិង្សាណាមួយឡើយ។លោកថា៖ «យើងមិនចង់យកកំហឹងមកទប់ទល់គ្នាអ៊ីចឹងទេយើងចង់ដោះស្រាយដោយសន្តិវិធីតែមិនដឹងថាក្រុមម៉ូតូកង់បី និងក្រុមហ៊ុនហ្នឹងគិតយ៉ាងម៉េចបានជាមកបង្ក្រាប និងប្រើហិង្សាមកលើយើងបែបនេះ»។ដោយឡែកក្រុមហ៊ុនកាពីតូលបានចេញសេចក្តីថ្លែងការណ៍ថ្កោលទោសចំពោះព្រឹត្តិការណ៍នោះ និងបានចោទប្រធានសហភាពការងារកម្ពុជា និងបក្ខពួកថាជាអ្នកនៅពីក្រោយញុះញង់ឲ្យកើតមានអំពើហិង្សាដើម្បីផលប្រយោជន៍បក្ខពួកខ្លួនខណៈដែលក្រុមអតីតអ្នកបើកបរដែលតវ៉ានោះបានលើកគ្នាទៅបិទផ្លូវរថយន្តដែលកំពុងធ្វើចរាចរណ៍បង្កការកកស្ទះ និងបានប្រើដុំថ្មគប់ទៅលើសមត្ថកិច្ច និងប្រើកាំបិតចាក់ទៅលើអ្នករត់រឺម៉កកង់បីដែលរកទទួលទានអាស្រ័យផលនៅមុខក្រុមហ៊ុន។ក្រុមហ៊ុនបានបន្តថា៖ «បើគ្មានសមត្ថកិច្ចបងប្អូនអ្នករត់ម៉ូតូ និងអ្នករត់រឺម៉កកង់បីដែលរកទទួលទានអាស្រ័យផលនៅមុខក្រុមហ៊ុនជួយទប់ស្កាត់ទេមិនដូច្នេះប្រហែលជាក្រុមហ៊ុនរបស់យើងខ្ញុំត្រូវរងគ្រោះយ៉ាងធ្ងន់ធ្ងរដូចមានក្នុងរូបថត និងវីដេអូជាភ័ស្តុតាង»។ក្រុមហ៊ុនកាពីតូលក៏បានស្នើដល់សមត្ថកិច្ចពាក់ព័ន្ធចាត់វិធានការតាមផ្លូវច្បាប់ទៅលើក្រុមអ្នកតវ៉ា និងសហភាពការងារកម្ពុជាដែលជាអ្នកញុះញង់នោះដែរ។ចំណែកលោក ឯ សុភាស់ ប្រធានសមាគមរួបរួមគ្នាដើម្បីអភិវឌ្ឍន៍កម្ពុជាបានច្រានចោលការលើកឡើងរបស់អង្គការសង្គមស៊ីវិលហើយថាដើមចមនៃអំពើហិង្សានោះគឺដោយសារក្រុមអតីតអ្នកបើកបរដែលមានសហភាពការងារកម្ពុជានៅពីក្រោយការតវ៉ានោះបានទៅរារាំងរថយន្តរបស់ក្រុមហ៊ុនមិនឲ្យដំណើរការដឹកភ្ញៀវធ្វើឲ្យពួកគាត់ដែលជាអ្នករត់ម៉ូតូឌុប និងអ្នករត់រ៉ឺម៉កកង់បីចំនួន ១៥៥ នាក់ដែលអាស្រ័យផលនៅមុខក្រុមហ៊ុននោះមិនអាចរកទទួលទានបាន។លោកបានបញ្ជាក់ថា៖ «រឿងនេះមិនដែលសុខៗពួកខ្ញុំទៅវ៉ៃពួកគេដែលធ្វើបាតុកម្មទេតែក្រុមបាតុករនោះចូលមករារាំងឡានក្រុងហើយឈរបិទផ្លូវធ្វើឲ្យប៉ះពាល់សណ្តាប់ធ្នាប់សាធារណៈ និងប៉ះពាល់ដល់ការរកស៊ីរបស់ពួកខ្ញុំនៅមុខក្រុមហ៊ុននេះ។ ខ្ញុំសោកស្តាយណាស់ចំពោះសេចក្តីថ្លែងការណ៍របស់សង្គមស៊ីវិលដែលចោទប្រកាន់ពួកខ្ញុំខណៈដែលពួកខ្ញុំក៏មានរងរបួសចំនួន ១៧ នាក់ដែរ»។ប្រធានសហភាពការងារកម្ពុជាលោក អាត់ ធន់ បានច្រានចោលការចោទប្រកាន់របស់ក្រុមហ៊ុនហើយថា «ពួកយើងធ្វើឡើងដោយអហិង្សាអត់មានប្រើដំបង ឬប្រើអាវុធដូចពួកនោះទេហើយយើងធ្វើនៅខាងកើតក្រុមហ៊ុនមិនមែនធ្វើនៅមុខក្រុមហ៊ុនទេដូចឃើញក្នុងវីដេអូហើយគឺពួកនោះទេដែលក្នុងដៃមានកាន់ដំបងដែក ដំបងទីប និងមានញញួរមានដុំថ្មដាក់ក្នុងមួកហើយមកវ៉ៃកម្មករបែរជាមកចោទយើងបង្កអំពើហិង្សាវាដូចជាអយុត្តិធម៌ណាស់»។បើតាមលោក អាត់ ធន់ នៅថ្ងៃចន្ទនេះក្រុមអង្គការសង្គមស៊ីវិល និងសហជីពនឹងទៅឃ្លាំមើលការសាកសួរជនរងគ្រោះទាំងពីរនាក់នៅមុខសាលាដំបូងរាជធានីភ្នំពេញហើយប្រសិនបើពុំមានការដោះលែង និងពុំមានដំណោះស្រាយសម្រាប់អតីតអ្នកបើកបរទាំង ៤៥ នាក់ទេនោះនឹងមានយុទ្ធនាការទ្រង់ទ្រាយធំជាលក្ខណៈជាតិ និងអន្តរជាតិប្រឆាំងនឹងការរំលោភសិទ្ធិមនុស្ស និងសិទ្ធិការងារពីសំណាក់ក្រុមហ៊ុនកាពីតូល៕ ដកស្រង់ចេញពីកាសែតប៉ុស្តិ៍ខ្មែរ ចេញផ្សាយថ្ងៃទី៨ ខែកុម្ភះឆ្នាំ២០១៦។។