មន្ត្រីបក្សសង្គ្រោះជាតិ៥រូប ជួបពិភាក្សាជាមួយមន្ត្រីបក្សប្រជាជនកម្ពុជានៅថ្ងៃទី៥ខែវិច្ឆិកា

មន្ត្រីបក្សសង្គ្រោះជាតិ៥រូប ជួបពិភាក្សាជាមួយមន្ត្រីបក្សប្រជាជនកម្ពុជានៅថ្ងៃទី៥ខែវិច្ឆិកា
- Issue Date 03-Nov-2013
ថ្នាក់ដឹកនាំគណបក្សសង្គ្រោះជាតិ៥រូប នឹងជួបពិភាក្សាគ្នាជាមួយថ្នាក់ដឹកនាំរបស់គណបក្សប្រជាជនកម្ពុជា នៅថ្ងៃទី៥ខែវិច្ឆិកា សប្តាហ៍ក្រោយនេះ នៅវិមានរដ្ឋសភា ដើម្បីសម្រេចលើរបៀបវារៈ ចំនួន៣ មុនពេលមេដឹកនាំកំពូលបើកកិច្ចចរចាដោះស្រាយវិបត្តិនយោបាយ។អ្នកនាំពាក្យគណបក្សសង្គ្រោះជាតិ លោក យឹម សុវណ្ណ ប្រាប់ VOD នៅព្រឹកថ្ងៃសៅរ៍នេះថា មន្ត្រីគណបក្សសង្គ្រោះជាតិ៥រូប ដែលជួបជាមួយមន្ត្រីគណបក្សប្រជាជនកម្ពុជានោះ រួមមាន រូបលោកផ្ទាល់ លោក សុន ឆ័យ លោក គួយ ប៊ុនរឿន លោក អេង ឆៃអៀង និង លោក យ៉ែម បុញ្ញាឬទ្ធិ។សេចក្តីថ្លែងការណ៍ចុះថ្ងៃទី៣១ ខែតុលា របស់គណបក្សសង្គ្រោះជាតិ បានដាក់លក្ខខណ្ឌ៣ចំណុច គឺទី១ ទាមទារឲ្យស៊ើបអង្កេត ដោយតម្លាភាព ចំពោះភាពមិនប្រក្រតីនៃការបោះឆ្នោត ទី២ ទាមទារឲ្យអ្នកដឹកនាំគណៈកម្មាធិការជាតិរៀបចំការបោះឆ្នោត លាលែងពីតំណែង និងទី៣ ទទួលយកអនុសាសន៍របស់អ្នករាយការណ៍ពិសេសអង្គការសហប្រជាជាតិ អង្គការNDI និងអង្គការខុមហ្វ្រែល ក្នុងការកែទម្រង់ការបោះឆ្នោត។ចំណែកភាគីខាងគណបក្សប្រជាជនកម្ពុជាក៏មាន៥រូបដែរ គឺដឹកនាំដោយលោក ព្រុំ សុខា។លោក សម រង្ស៊ី ថ្លែងក្នុងសន្និសីទសារព័ត៌មាននៅថ្ងៃទី៣១ខែតុលាថា គណបក្សសង្គ្រោះជាតិ ស្នើឲ្យមានអ្នកសារព័ត៌មាន និងភាគីអាជ្ញាកណ្តាលចូលរួម ក្នុងកិច្ចចរចារបស់គណបក្សទាំងពីរនៅថ្ងៃខាងមុខ ក្នុងគោលបំណងកុំឲ្យគណបក្សទាំងពីរ បកស្រាយខុសគ្នាពីអ្វីដែលបានព្រមព្រៀងនាំឲ្យការផ្សាយព័ត៌មានខុស ពីគំនិតដើមរបស់ភាគី ដើម្បីឲ្យលទ្ធផលនៃការចរចាអាចទទួលបានផ្លែផ្កា និងមានសង្ឃឹមច្រើន។ប៉ុន្តែលោក ជាម យៀប មន្ត្រីជាន់ខ្ពស់គណបក្សប្រជាជនកម្ពុជា អះអាងថា គណបក្សនេះមិនគាំទ្រឲ្យមានភាគីទី៣ចូលរួមឡើយ។ អត្ថបទដកស្រង់ពីវិទ្យុសម្លេងប្រជាធិបតេយ្យ (VOD) ចុះផ្សាយថ្ងៃទី ០២ ខែតុលា ឆ្នាំ២០១៣៕