-
មានប្រទេសចំនួន៥បានទទូចឲ្យកម្ពុជាអនុវត្ត អនុសាសន៍របស់អ.ស.ប ករណីកែទម្រង់ ការបោះឆ្នោត នៅកម្ពុជា
- Issue Date 04-Nov-2013
យ៉ាងហោចណាស់ មានស្ថានទូតបរទេស ចំនួន៤សំខាន់ៗ រួមនឹងប្រទេសនូវែហ្សឺឡង់ និងសហភាពអឺរ៉ុប បានជំរុញកម្ពុជាអនុវត្តអនុសាសន៍របស់អ្នករាយការណ៍ ពិសេសអង្គការសហប្រជាជាតិ (អ.ស,ប) ទាក់ទិននឹងការកែទម្រង់ប្រព័ន្ធរៀបចំការបោះឆ្នោតនៅកម្ពុជា ដើម្បីឲ្យការបោះឆ្នោតបន្តបន្ទាប់ទៀត មានភាពសេរី ត្រឹមត្រូវ និងតម្លាភាព។ ស្ថានទូតទាំង៤ សំខាន់ៗ នៅកម្ពុជា គឺមានស្ថានទូតអាមេរិក បារាំង អូស្ត្រាលី និងអាឡឺម៉ង់ ហើយប្រទេសនូវែហ្សឺឡង់ តំណាងដោយរដ្ឋមន្ត្រីការបរទេស គឺលោក Hom Murray Mc Cully និង លោក Ugo Astuto ទទួលបន្ទុកកិច្ចការបរទេសអាស៊ីខាងត្បូងនិងអាស៊ីអាគ្នេយ៍ តំណាងឲ្យសហភាពអឺរ៉ុប។ សេចក្ដីថ្លែងការណ៍របស់តំណាងបេសកកម្មការទូតបរទេសទាំង៤ លោកHom Murray Mc Cully និង លោក Ugo Astuto បានធ្វើឡើងដាច់ដោយពីគ្នា កាលពីចុងខែតុលា គឺចំពេលគណបក្សសង្គ្រោះជាតិបានដាក់ញតិ្តស្នាមមេដៃអ្នកគាំទ្រ ជាង២លាននាក់ទៅ អ.ស.ប ឲ្យជួយរកយុត្តិធម៌ជូនប្រជាជនកម្ពុជា បន្ទាប់ពីការបោះឆ្នោតថ្ងៃ២៨កក្កដា ត្រូវបានចោទថា មានការបំបាត់សិទ្ធិអ្នកបោះឆ្នោត និងការលួយបន្លំសន្លឹកឆ្នោតកើតមានជាប្រព័ន្ធ។សេចក្ដីថ្លែងការណ៍របស់តំណាងបរទេសទាំងនោះ មានខ្លឹមសារប្រហាក់ប្រហែលគ្នា គឺជំរុញគណបក្សប្រជាជនកម្ពុជា និងគណបក្សសង្គ្រោះជាតិ បន្តចរចាឡើងវិញ ហើយការចរចានេះ ត្រូវអនុវត្តអនុសាសន៍របស់លោក សូរិយា ស៊ូប៊ែរឌី អ្នករាយការណ៍ពិសេស អ.ស.ប ប្រចាំនៅកម្ពុជាដែលលោកបានផ្ដល់អនុសាសន៍ឲ្យកម្ពុជា កែទម្រង់ប្រព័ន្ធរៀបចំការបោះឆ្នោត មួយមានលក្ខណៈឯករាជ្យដោយមានសមាសភាពគណបក្សនយោបាយដែលជាប់ ឆ្នោតក្នុងសភា ចូលរួមទទួលខុសត្រូវ ទាំងថ្នាក់លើហូតដាក់ថ្នាក់ខេត្ត ។គណៈកម្មាធិការរៀបចំការបោះឆ្នោតនៅកម្ពុជា មានសមាសភាពថ្នាក់កំពូល គឺមាន ៧រូបមកពីគណបក្សប្រជាជនកម្ពុជា និង២រូបទៀត មកពីគណបក្សសមរង្ស៊ី។ សម្រាប់មន្ត្រីរៀបចំការបោះឆ្នោតថ្នាក់ខេត្ត មិនមានបញ្ជាក់ថា សមាសភាពមកពីប្រភពណាច្បាស់លាស់ទេ តែអ្នកសង្កេតការណ៍ខាងការបោះឆ្នោត ដូចជាអង្គការComfrel និងនិចហ្វិច រកឃើញថា សមាសភាពថ្នាក់ខេត្ត ច្រើនតែជាមន្ត្រី មាននិន្នាការជាមួយគណបក្សប្រជាជនកម្ពុជា។ អង្គការទាំងពីរបានបន្តថា មន្ត្រីរៀបចំការបោះឆ្នោតថ្នាក់ខេត្ត ជាក្រុមមួយមានឥទ្ធិពលទៅលើរចនាសម្ព័ន្ធ រៀបចំការបោះឆ្នោត ថ្នាក់ឃុំនិងសង្កាត់។អត្ថបទដកស្រង់ពីវិទ្យុសម្លេងប្រជាធិបតេយ្យ (VOD) ចុះផ្សាយថ្ងៃទី០៤ ខែវិច្ឆិកា ឆ្នាំ២០១៣៕