-
ពលរដ្ឋនៅឃុំព្រែកតាកូវ ស្រុកខ្សាច់កណ្តាល ថា អាជ្ញាធរឃុំរឹតត្បិតសិទ្ធិបញ្ចេញមតិ និងជួបជុំរបស់គាត់
- Issue Date 11-Nov-2013
ប្រជាពលរដ្ឋមួយចំនួន នៅឃុំព្រែកតាកូវ ស្រុកខ្សាច់កណ្តាល ខេត្តកណ្តាល ឲ្យដឹងថាអាជ្ញាធរភូមិ-ឃុំ គំរាមកំហែងលើពួកគាត់ តាមរយៈពាក្យសម្តី និងរូបភាពផ្សេងៗ ដោយហាមឃាត់ពួកគាត់មិនឲ្យចូលរួមប្រជុំ ឬបញ្ចេញមតិជាដើម។ ពួកគាត់លើកទ្បើងបែបនេះ ក្នុងវគ្គបណ្តុះបណ្តាលមួយដែលរៀបចំដោយអង្គការសម្ព័ន្ធសហគមន៍កសិករកម្ពុជា(CCFC) កាលព្រឹកថ្ងៃអាទិត្យ ទី១០ ខែវិច្ឆិកា នៅស្រុកខ្សាច់កណ្តាល ខេត្តកណ្តាល ស្តីពីការយល់ដឹងពីសិទ្ធិរបស់ប្រជាពលរដ្ឋ។តំណាងពលរដ្ឋនៅក្នុងឃុំ លោក សន សារន ឲ្យដឹងថា មេភូមិព្រែកតាកូវ មេឃុំ និងនគរបាលឃុំ បានបង្ហាញខ្លួននៅក្បែរវេទិកានោះ។ លោកចាត់ទុកការបង្ហាញវត្តមានរបស់អាជ្ញាធរឃុំនេះជា រូបភាពគំរាមកំហែងពលរដ្ឋ។ លោកបន្តថា ការគំរាមកំហែងនេះមិនមែនជាលើកទីមួយទេ គឺកើតឡើងតាំងពីឆ្នាំ១៩៩៨ម្ល៉េះ ៖ “ជួបជុំសមាជិកបួនដប់នាក់ មានអាជ្ញាធរមករារាំង ដូចថាគាត់មិនមកឃាត់យើងទេ គាត់ចេញជាសកម្មភាពជិះម៉ូតូឆ្វែល ធ្វើឲ្យប្រជាពលរដ្ឋភ័យខ្លាច មិនហ៊ានចូលរួម ហើយអំឡុងពេលគណបក្សប្រឆាំងធ្វើបាតុកម្ម ប្រជាពលរដ្ឋគាត់ទៅ មានអាជ្ញាធរភូមិ មានប្រជាការពារទៅថា ឲ្យប្រជាពលរដ្ឋថា បើឯងហ៊ានឈានជើងទៅងាប់ មកដល់ពេលនេះ ប្រជាពលរដ្ឋខាងខ្ញុំមានទុក្ខកង្វល់យូរហើយរឿងគំរាមកំហែង តាំងពីជំនាន់ឆ្នាំ១៩៩៨”។ប្រជាពលរដ្ឋ អ្នកស្រី គាន់ សោភ័ណ្ឌ ថា អាជ្ញាធរតែងតែរើសអើងប្រជាពលរដ្ឋ នៅពេលខ្លួនដឹងថាពលរដ្ឋណាមួយគាំទ្រគណបក្សប្រឆាំង។ អ្នកស្រីបន្តថា កន្លងមក មានការគំរាមកំហែងសម្លាប់ពលរដ្ឋ នៅពេលដែលពលរដ្ឋចង់ចូលរួមមហាបាតុកម្មរបស់គណបក្សសង្គ្រោះជាតិ ៖ “បងគ្រាន់និយាយបន្តិច បងចង់យំបាត់ហើយហ្នឹងអូន ដូចបញ្ហាគាបសង្កត់ក្នុងឃុំព្រែកតាកូវនេះ វាច្រើនពេក ក្រោយពីបោះឆ្នោតមក គាត់ប្រកាន់និន្នាការគណបក្សផ្សេងៗ គាត់ជេរយើង គាត់ថា គ្នារបស់គេ មិនបោះឲ្យគេទេ ពួកមីក្រល្ហាម មីអត់ដំបូលជ្រក”។សមាជិកក្រុមការងារអង្គការសម្ព័ន្ធសហគមន៍កសិករកម្ពុជា លោក សយ ហ្សឺឌី មានប្រសាសន៍ថា ពលរដ្ឋប្រមាណ៤០នាក់បានចូលរួមវគ្គបណ្តុះបណ្តាលនេះ។ ប៉ុន្តែ បន្ទាប់ពីអាជ្ញាធរឃុំបង្ហាញវត្តមាននៅកន្លែងនោះ ចំនួនអ្នកចូលរួមថយចុះពាក់កណ្តាល ព្រោះតែពួកគេភ័យខ្លាច។ លោកយល់ថា ទង្វើរបស់អាជ្ញាធរ ជាការបំបិទសិទ្ធិប្រជាពលរដ្ឋ ៖ “នេះជារូបភាពនៃការគំរាមកំហែង ហើយមានប្រជាជនដែលចង់ចូលរួម មកនៅពេលថ្ងៃហ្នឹង គាត់មិនហ៊ានមកចូលរួមទៀតទេ យើងមានប្រហែលជាដប់នាក់ នៅពេលថ្ងៃ ដោយសារមានប៉ូលីស មានមេឃុំ គាត់រារាំងមិនឲ្យមក”។មេឃុំព្រែកតាកូវ លោក ជា ម៉ាច បដិសេធការចោទប្រកាន់របស់ប្រជាពលរដ្ឋ។ លោកអះអាងថា អាជ្ញាធរទៅមើលនៅកន្លែងកម្មវិធីនោះ ព្រោះតែប្រជាពលរដ្ឋ និយាយប៉ះពាល់គណបក្សប្រជាជនកម្ពុជា ៖ “បើពន្យល់ ជាករណីរបស់យើង ការបង្រៀន ក៏បង្រៀនទៅប៉ុន្តែប្រជាពលរដ្ឋ ដៀលដល់គណបក្សប្រជាជនច្រើនពេក ខ្ញុំថាធ្វើដើម្បីអ្វីបើនិយាយអញ្ជឹង បើកសិទ្ធិខ្លាំងពេក ខ្ញុំថាឲ្យផ្អាកទៅ មិនបាច់ឲ្យរៀនទេ បើនិយាយអញ្ជឹង បើវាលេងមួយទំហឹង អំណោយ អញ្ជេះ អញ្ជោះ វាស្រគាលក្បាលណាស់ធ្វើអញ្ជឹង ដើម្បីសិទ្ធិសេរីភាពវាហួសហេតុ”។លោកបញ្ជាក់ថា កន្លងមក អាជ្ញាធរឃុំមិនបិទសិទ្ធិពលរដ្ឋក្នុងការចូលរួមវេទិកាណាមួយទេ។ ប៉ុន្តែ លោកជំរុញឲ្យពលរដ្ឋជៀសវាងការវាយប្រហារទៅលើគណបក្សនយោបាយ។អត្ថបទដកស្រង់ពីវិទ្យុសម្លេងប្រជាធិបតេយ្យ (VOD) ចុះផ្សាយថ្ងៃទី១១ ខែវិច្ឆិកា ឆ្នាំ២០១៣៕