-
អ្នកលេងហ្វេសប៊ុក រិះគន់វិធានការរបស់កម្លាំង សមត្ថកិច្ចក្នុងហេតុការណ៍ហិង្សាជាមួយរោងចក្រSL
- Issue Date 12-Nov-2013
អ្នកលេងហ្វេសប៊ុកភាគច្រើន ចាប់ផ្តើមរិះគន់ខ្លាំងៗលើសកម្មភាពរបស់កម្លាំងសមត្ថកិច្ចក្នុងការប៉ះទង្គិចជាមួយក្រុមកម្មកររោងចក្រSL នៅក្បែរស្ពានស្ទឹងមានជ័យ កាលពីព្រឹកថ្ងៃអង្គារ ដែលបណ្តាលឲ្យស្ត្រីម្នាក់ស្លាប់ និងជាច្រើនអ្នករងរបួស។កាលពីព្រឹកថ្ងៃអង្គារ កម្មករជាង១ពាន់នាក់ ភាគច្រើនជាបុរស មកពីរោងចក្រSL ដែលមានទីតាំងនៅសង្កាត់បឹងទំពុន ខណ្ឌមានជ័យ គ្រោងហែក្បួនទៅកាន់ផ្ទះលោកនាយករដ្ឋមន្ត្រី ហ៊ុន សែន នៅក្បែរវិមានឯករាជ្យ ប៉ុន្តែក្បួនដង្ហែនេះ ត្រូវបានរារាំងត្រង់ចំណុចស្ពានស្ទឹងមានជ័យ ត្រើយខាងលិច ដោយសមត្ថកិច្ចប្រមាណ៣០០នាក់ ប្រដាប់ដោយខែល ដំបងឆក់។ ការរារាំងនេះ រហូតធ្វើឲ្យមានការប៉ះទង្គិចគ្នា។ក្នុងហេតុការណ៍ប៉ះទង្គិចគ្នានោះ សមត្ថកិច្ចបានប្រើគ្រាប់បែក ផ្សែង រថយន្តពន្លត់អគ្គិភ័យ និងគ្រាប់កាំភ្លើងបាញ់លើក្រុមកម្មករ។អ្នកលេងហ្វេសប៊ុកខ្លះ ចាប់ផ្តើមចែករំលែករូបភាពនៃហិង្សា និងលើកឡើងថា កម្លាំងសមត្ថកិច្ច មិនគួរធ្វើសកម្មភាពបែបនេះទេ ព្រោះធ្វើឲ្យប៉ះពាល់ដល់ពលរដ្ឋ ដែលមិនមែនជាអ្នកតវ៉ា។ អ្នកខ្លះលើកឡើងថា នេះមិនមែនបង្ហាញពីលទ្ធិប្រជាធិបតេយ្យនៅកម្ពុជាទេ។អ្នកលេងហ្វេសប៊ុកម្នាក់ អាយុ២៧ឆ្នាំ លោក ព្រំ សិលា ប្រាប់VODនៅថ្ងៃពុធនេះថា វិធានការរបស់កម្លាំងសមត្ថកិច្ច គឺមិនសមស្របទេ ដោយសារប៉ូលិសជាអ្នកអនុវត្តច្បាប់។ លោកបញ្ជាក់ថា៖«បើអស់លោកមន្ត្រី និងប៉ូលិស គិតថាវិធានបែបហ្នឹងសមស្របរបៀបហ្នឹងគ្រប់ៗគ្នា មិនដឹងថា ប្រជាជនយើងប៉ុន្មានអ្នកដែល ត្រូវរងរបួស និង បាត់បង់ជីវិត។ [យើង]សង្ឃឹមថាយើង ទាំងអស់ចេះយោគយល់គ្នា កុំប៉ះដៃ តដៃប៉ះ ជើងតជើង ។ បើអញ្ចឹងរវាងប៉ូលិស និងជនអន្ធពាល រវាងអ្នកអនុវត្តច្បាប់ និងអ្នកល្មើសច្បាប់មានស្អីខុសគ្នាទៀត»។ចំណែក លោក ជុំ កុសល ជាទីប្រឹក្សានាយករដ្ឋមន្ត្រីហ៊ុន សែន សរសេរនៅលើហ្វេសប៊ុករបស់លោកថា តើក្រុមជនបង្កហិង្សាគប់ដុំថ្មដាក់ប៉ូលិសនិងដុតបំផ្លាញរថយន្ត មុខវត្តស្ទឹងមានជ័យ ជាក្រុមកម្មករSLពិតប្រាកដ ឬក៏ជាក្រុមដែលបង្កហិង្សាដុតរថយន្តប៉េអឹមកាលពីថ្ងៃបោះឆ្នោតកន្លងមក? លោកបន្តថា ព្រះសង្ឃ មិនគួរមានសកម្មភាពក្នុងហិង្សាបែបនេះទេ ព្រោះព្រះសង្ឃជាទីសក្ការ:របស់ប្រជាពុទ្ធបរិស័ទ ។ លោកបញ្ជាក់ថា៖«ជារឿងចម្លែកណាស់ បាតុកម្មកើតឡើងដោយកម្មករទេ តែហេតុអីបានជាមានព្រះសង្ឃចូលរួមមានសកម្មភាពបែបនេះជាមួយកម្មករទៅវិញ?បាតុកម្មមួយដែលកើតឡើងវារីកវាលដាលទៅជាកុប្បកម្មមានហិង្សាហើយ ដាច់ខាតសមត្ថកិច្ចត្រូវតែបង្ក្រាប ។ បើកាលណាមានការបង្ក្រាប គឺគេចមិនផុតពីមានការប៉ះទង្គិចនោះទេ។ ជម្រើសមានតែមួយទេ គឺកុំនាំគ្នាធ្វើអោយមានហិង្សា»។អគ្គស្នងការដ្ឋាននគរបាលជាតិបន្តថា កម្លាំងសមត្ថកិច្ច រងរបួសធ្ងន់ និងស្រាល មានចំនួន៤៧នាក់ ស្លាប់ពលរដ្ឋ១នាក់ របួសធ្ងន់ស្រាល៩នាក់ ខូចខាតរថយន្ត២គ្រឿង ម៉ូតូ២គ្រឿងរបស់កម្លាំងសមត្ថកិច្ច ដោយសារការដុតបំផ្លាញ និងធ្វើឲ្យបែកកញ្ចក់រថយន្តអគ្គិភ័យ២គ្រឿង។សេចក្តីថ្លែងការណ៍របស់អគ្គស្នងការដ្ឋាននគរបាលជាតិ ចេញផ្សាយនៅថ្ងៃអង្គារនេះ ឲ្យដឹងថា ក្នុងព្រឹត្តិការណ៍នៃការប៉ះទង្គិចនោះ ជនឱកាសនិយមមួយក្រុម ដែលមិនមែនជាកម្មករ បានឆ្លៀតញុះញង់បញ្ឆេះបង្កឲ្យមានអំពើហិង្សាមលើសមត្ថកិច្ច ដោយគប់ដុំថ្ម បាញ់ទឹកចំពាមគ្រាប់ដែក និងវាយដុតបំផ្លាញមធ្យោបាយ ព្រមទាំងហ៊ុំព័ទ្ធ ចាប់ខ្លួនកងកម្លាំងសមត្ថកិច្ចចំនួន៥នាក់ នៅវត្តស្ទឹងមានជ័យ។សេចក្តីថ្លែងការណ៍បន្តថា ស្ថិតក្នុងស្ថានភាពបែបនេះ ចាប់បង្ខុំឲ្យកងកម្លាំងមានសមត្ថកិច្ច ត្រូវប្រើប្រាស់វិធានការសមស្រប ដើម្បីការពារខ្លួន រាំងស្កាត់អំពើហិង្សាកុំឲ្យរីករាលដាល និងការពារសន្តិសុខ សុវត្ថិភាពជូនកម្មករ ដែលធ្វើបាតុកម្មដោយសន្តិវិធី។ក្នុងហេតុការណ៍នៅស្ទឹងមានជ័យនោះ ស្នងការនគរបាលរាជធានីភ្នំពេញ លោក ជួន សុវណ្ណ បានចេញបញ្ជាឲ្យមានការបង្ក្រាបលើក្រុមកម្មករ ដោយសារស្ថានភាពតានតឹង។បន្ទាប់ពីហេតុការណ៍នៃការប៉ះទង្គិចគ្នានេះ លោក ជួន សុវណ្ណ ឲ្យដឹងថា លោកសោកស្តាយ ដែលក្រុមកម្មករ មិនបានអនុវត្តបាតុកម្មរបស់ខ្លួនដោយសន្តិវិធី និងបានធ្វើឲ្យសមត្ថកិច្ចជាច្រើននាក់រងរបួស ៖ «យើងក៏បានទប់ស្កាត់ទៀត ដោយសន្តិវិធី ប៉ុន្តែក្នុងនេះហេតុផល គឺដុំថ្មនៅរាយពេលផ្លូវទាំងអស់ គឺគាត់បានធ្វើការគប់ស្រោចទៅលើកម្លាំងសមត្ថកិច្ចយើង រហូតដល់របួសធ្ងន់ស្រាលជាច្រើន»៕អត្ថបទដកស្រង់ពីវិទ្យុសម្លេងប្រជាធិបតេយ្យ (VOD) ចុះផ្សាយថ្ងៃទី១៣ ខែវិច្ឆិកា ឆ្នាំ២០១៣។