អាជ្ញាធរមិនអនុញ្ញាតឲ្យអង្គការ៤ជួបជុំនៅ ពហុកីទ្បាដ្ឋានជាតិ ទាមទារបញ្ចប់និទណ្ឌភាព លើឃាតកម្មអ្នកសារព័ត៌មាន

អាជ្ញាធរមិនអនុញ្ញាតឲ្យអង្គការ៤ជួបជុំនៅ ពហុកីទ្បាដ្ឋានជាតិ ទាមទារបញ្ចប់និទណ្ឌភាព លើឃាតកម្មអ្នកសារព័ត៌មាន
- Issue Date 21-Nov-2013
សាលារាជធានីភ្នំពេញមិនអនុញ្ញាតឲ្យអង្គការ៤រៀបចំពិធីជួបជុំ នៅខាងមុខរបងពហុកីទ្បាដ្ឋានជាតិអូទ្បាំពិក នៅថ្ងៃព្រហស្បតិ៍នេះ ចាប់ពីម៉ោង៥និង៣០នាទីល្ងាច ដល់ម៉ោង៧យប់ ក្នុងបំណងទាមទារយុត្តិធម៌ដល់អ្នកសារព័ត៌មាន១១រូប ដែលត្រូវបានសម្លាប់កាលពី២០ឆ្នាំមុនទេ។ការមិនអនុញ្ញាតនេះធ្វើទ្បើង តាមរយៈលិខិតចុះហត្ថលេខា នៅថ្ងៃទី២០ ខែវិច្ឆិកា ដោយអភិបាលរងសាលារាជធានី លោក ឃួន ស្រេង ផ្ញើជូនតំណាងមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ(CCIM) អង្គការលីកាដូ មជ្ឈមណ្ឌលអប់រំច្បាប់សម្រាប់សហគមន៍(CLEC) និងមជ្ឈមណ្ឌលសិទ្ធិមនុស្សកម្ពុជា(CCHR)។លិខិតបញ្ជាក់ថា ការស្នើសុំទីតាំងនេះធ្វើឲ្យប៉ះពាល់សន្តិសុខសុវត្ថិភាព និងសណ្តាប់ធ្នាប់សាធារណៈ ពិសេសការកកស្ទះចរាចរណ៍។ សាលារាជធានីភ្នំពេញស្នើអង្គការទាំង៤យកទីតាំងឯកជនសមស្របធ្វើវិញ។កាលពីថ្ងៃទី១២ ខែវិច្ឆិកា អង្គការទាំង៤បានផ្ញើលិខិតជូនដំណឹងទៅសាលារាជធានី ពីគម្រោងប្រមូលផ្តុំអ្នកចូលរួមប្រមាណ១៥០នាក់ រួមមានអ្នកសារព័ត៌មាន គ្រួសារជនរងគ្រោះ ជាដើម នៅមុខរបងពហុកីទ្បាដ្ឋានជាតិអូទ្បាំពិក ដែលជាកន្លែងអ្នកយកព័ត៌មានលោក ឃឹម សំបូរ ត្រូវបានបាញ់សម្លាប់ដោយខ្មាន់កាំភ្លើងពីរនាក់ កាលពីឆ្នាំ២០០៨។ ការជូនដំណឹងនេះ គឺយោងតាមច្បាប់ស្តីពីការធ្វើបាតុកម្មដោយសន្តិវិធីឆ្នាំ២០០៩។នាយប្រតិបត្តិCLEC លោក យ៉េង វីរៈ មានប្រសាសន៍ថា សង្គមស៊ីវិលនៅតែជួបជុំគ្នានៅទីតាំងដែលបានកំណត់ដដែល។ លោកហួសចិត្តចំពោះការលើកទ្បើងរបស់សាលារាជធានីភ្នំពេញ ពីការកកស្ទះចរាចរណ៍។អភិបាលរាជធានីភ្នំពេញ លោក ប៉ា សុជាតិវង្ស បដិសេធអត្ថាធិប្បាយបន្ថែមលើការមិនអនុញ្ញាតរបស់សាលារាជធានី។ការជួបជុំរបស់អង្គការទាំង៤នេះនឹងធ្វើទ្បើង មុនពីរថ្ងៃដែលសហគមន៍អន្តរជាតិនឹងប្រារព្ធទិវាអន្តរជាតិបញ្ចប់និទណ្ឌភាពលើកទី៣ នៅថ្ងៃទី២៣ ខែវិច្ឆិកា។ សេចក្តីប្រកាសព័ត៌មានរបស់អង្គការទាំង៤ចេញផ្សាយនៅថ្ងៃនេះ ឲ្យដឹងថា ការជួបជុំនេះក៏ជាឱកាសមួយ ដើម្បីលើកកម្ពស់ការយល់ដឹងពីបរាជ័យរបស់រាជរដ្ឋាភិបាលក្នុងការស្វែងរកឃាតករ និងសន្យាធ្វើសកម្មភាពបន្ថែមទៀត ដើម្បីស្វែងរកវិធីធ្វើឲ្យអ្នកសារព័ត៌មានមានសុវត្ថិភាព។អត្ថបទដកស្រង់ពីវិទ្យុសម្លេងប្រជាធិបតេយ្យ (VOD) ចុះផ្សាយថ្ងៃទី២១ ខែវិច្ឆិកា ឆ្នាំ២០១៣៕