អង្គការលើកលែងទោសអន្តរជាតិ ខកចិត្តនឹង តុលាការកំពូលកម្ពុជា ដែលមិនទំលាក់បទចោទ អ្នកស្រី យ៉ោម បុប្ផា

អង្គការលើកលែងទោសអន្តរជាតិ ខកចិត្តនឹង តុលាការកំពូលកម្ពុជា ដែលមិនទំលាក់បទចោទ អ្នកស្រី យ៉ោម បុប្ផា
- Issue Date 23-Nov-2013
អង្គការលើកលែងទោសអន្តរជាតិ (Amnesty International) ចាត់ទុកថា សាលដីកាតុលាការកំពូល ដោះលែងសកម្មជនតវ៉ាដីធ្លីតំបន់បឹងកក់ អ្នកស្រី យ៉ោម បុប្ផា ឲ្យនៅក្រៅឃុំបណ្តោះអាសន្ន នាថ្ងៃទី២២ខែវិច្ឆិកានេះ ជាសេចក្តីសម្រេចមិនបានពេញលេញតាមឆន្ទានុសិទ្ធិ។តុលាការកំពូល បានសម្រេចឲ្យអ្នកស្រី យ៉ោម បុប្ផា ដែលជាប់ចោទពីបទ ផ្តួមផ្តើមឲ្យមានហិង្សាដោយចេតនា ស្ថិតនៅក្រៅឃុំបណ្តោះអាសន្ន និងបង្វិលសំណុំរឿងឲ្យសាលាឧទ្ធរណ៍ស៊ើបអង្កេតទ្បើងវិញ ក្រោយពីរកឃើញថា សាលដីកាសាលាឧទ្ធរណ៍ មិនមានសំអាងហេតុ និងភស្តុតាងគ្រប់គ្រាន់។តាមលិខិតចុះផ្សាយនៅថ្ងៃទី ២២ ខែវិច្ឆិកា អ្នកស្រាវជ្រាវអង្គការលើកលែងទោសអន្តរជាតិប្រចាំកម្ពុជា លោក រូភើត អាប់ប៊ត (Rupert Abbott) ចាត់ទុកថា ការដោះលែងសកម្មជនដីធ្លី អ្នកស្រី យ៉ោម បុប្ផា គឺជាសញ្ញាណវិជ្ជមានមួយ ប៉ុន្តែលោក ខកចិត្តដែលការផ្តន្ទាទោស និងបទចោទប្រកាន់ នៅតែរក្សា ហើយសំណុំរឿងនេះ មិនត្រូវបានបញ្ចប់។ លោកបន្តថា អ្នកស្រីយ៉ោម បុប្ផា មិនគួរត្រូវបានឃុំឃាំង និងបំបែកចេញពីក្រុមគ្រួសាររបស់អ្នកស្រីឡើយ។លោក Rupert Abbott បន្តថា \"ករណីអ្នកស្រីយ៉ោមបុប្ផា គឺជានិមិត្តសញ្ញា នៃនិន្នាការដ៏គួរឱ្យបារម្ភមួយនៅក្នុងប្រទេសកម្ពុជា ក្នុងរយៈពេលប៉ុន្មានឆ្នាំចុងក្រោយនេះ ដែលបង្ហាញសកម្មជនការពារសិទ្ធិមនុស្សអាចនឹងប្រឈមការយាយី ការគំរាមកំហែង និងការចាប់ខ្លួនដាក់ពន្ធនាគារ ចំពោះសកម្មភាពតវ៉ាដោយសន្តិវិធីរបស់ពួកគេ\""។អ្នកស្រី យ៉ោម បុប្ផា ត្រូវបានសមត្ថកិច្ចចាប់ខ្លួនកាលថ្ងៃទី៤ ខែកញ្ញា ឆ្នាំ២០១២ និងត្រូវបានសាលាដំបូងរាជធានីភ្នំពេញ ផ្តន្ទាទោសដាក់ពន្ធនាគារ៣ឆ្នាំ និងបង្គាប់ឲ្យបង់ប្រាក់សរុប៦០លានរៀល ពីបទប្រើហិង្សាដោយចេតនា វាយអ្នករត់ម៉ូតូឌុបពីរនាក់ឲ្យរងរបួស។ ក្រោយមកសាលាឧទ្ធរណ៍បានប្តូរបទចោទ ទៅជាបទផ្តួចផ្តើមឲ្យមានហិង្សាដោយចេតនាវិញ បន្ទាប់ពីរកមិនឃើញកំហុស និងសម្រេចឲ្យទទួលទោស២ឆ្នាំ ដោយព្យួរទោសមួយឆ្នាំ និងបង្គាប់ឲ្យបង់ប្រាក់ ២០លានរៀល។បច្ចុប្បន្ននេះ អ្នកស្រី យ៉ោម បុប្ផា បានចេញពីពន្ធធនាគារហើយ ក្រោយពីតុលាការកំពូល បានសម្រេចឲ្យ នៅក្រៅ ឃុំ បណ្តោះ អាសន្ន។ អត្ថបទដកស្រង់ពីវិទ្យុសម្លេងប្រជាធិបតេយ្យ (VOD) ចុះផ្សាយថ្ងៃទី២៣ខែវិច្ឆិកា ឆ្នាំ២០១៣៕"