-
សង្គមស៊ីវិលចំនួន១០ អំពាវនាវឲ្យរដ្ឋាភិបាលកម្ពុជា គាំទ្រការបង្កើតស្ថាប័នសិទ្ធិមនុស្សឯករាជ្យ
- Issue Date 29-Nov-2013
សង្គមស៊ីវិលចំនួន១០ ចេញសេចក្តីថ្លែងការណ៍រួមគ្នាមួយ កាលពីថ្ងៃព្រហស្បតិ៍ម្សិលមិញ អំពាវនាវឲ្យរដ្ឋាភិបាលកម្ពុជា ស្ថាប័នជាតិ និងអន្តរជាតិ ដែលពាក់ព័ន្ធទាំងអស់ ចូលរួមគាំទ្របង្កើតស្ថាប័នសិទ្ធិមនុស្សឯករាជ្យមួយ ឲ្យស្របតាមគោលការណ៍ទីក្រុងប៉ារីស ស្តីពី ស្ថាប័នជាតិសិទ្ធិមនុស្ស ដើម្បីជួយដោះស្រាយបញ្ហាការរំលោភសិទ្ធិមនុស្សនៅកម្ពុជា។អនុប្រធានផ្នែកស៊ើបអង្កេតសិទ្ធិមនុស្ស និងជំនួយផ្នែកច្បាប់ នៃសមាគមអាដហុក លោក ណៃ វ៉ាន់ដា ដែលចូលរួមក្នុងសិក្ខាសាលាពិគ្រោះយោបល់ ស្តីពីគណៈកម្មាធិការជាតិសិទ្ធិមនុស្សដែលរៀបចំឡើងដោយក្រុមការងារ ដើម្បីយន្តការសិទ្ធិមនុស្សជាតិ និងអាស៊ាន កាលពីម្សិលមិញ ឲ្យដឹងថា សិក្ខាសាលានេះ ធ្វើឡើងក្នុងគោលបំណងឲ្យស្ថាប័នពាក់ព័ន្ធដែលធ្វើការលើវិស័យសិទ្ធិមនុស្ស គាំទ្រការបង្កើតស្ថាប័នសិទ្ធិមនុស្សឯករាជ្យមួយ សម្រាប់ប្រទេសកម្ពុជា ដែលកំពុងប្រឈមនឹងបញ្ហារំលោភសិទ្ធិមនុស្សជាប្រចាំ។លោក ណៃ វ៉ាន់ដា ឲ្យដឹងទៀតថា តាមលក្ខណ្ឌនៃការបង្កើតស្ថាប័នសិទ្ធិមនុស្សឯករាជ្យនេះ នឹងត្រូវជ្រើសរើសបេក្ខជន-បេក្ខនារី ដែលមានអាយុចាប់ពី៣០ឆ្នាំឡើង និងបញ្ចប់ថ្នាក់បរិញ្ញាប័ត្រ ឬអនុបណ្ឌិត និងមានបទពិសោធយ៉ាងតិច៥ឆ្នាំ ដែលធ្វើការងារទាក់ទងវិស័យសិទ្ធិមនុស្ស។ លោកថា បេក្ខភាពដែលជ្រើសរើសនោះ រួមមាន តំណាងពីព្រះមហាក្សត្រចំនួន ២នាក់ ខាងរដ្ឋាភិបាល២នាក់ មេធាវី២នាក់ និងតំណាងសង្គមស៊ីវិលផ្សេងៗទៀត ដែលមិនពាក់ព័ន្ធនិងរឿងនយោបាយ ។ប៉ុន្តែ អ្នកនាំពាក្ររដ្ឋាភិបាល លោក ខៀវ កាញារីទ្ធ បានប្រាប់ VOD តាមរយៈអ៊ីម៉ែលនៅថ្ងៃព្រហស្បតិ៍នេះថា “បច្ចុប្បន្ននេះយើងមានអង្គការសិទ្ធិមនុស្សនៅកម្ពុជាជាច្រើនណាស់ ហើយប្រការដែលរាជរដ្ឋាភិបាលមានស្ថាប័នជាតិមួយបច្ចុប្បន្ននេះ គឺដើម្បីងាយស្រួលក្នុងការដោះស្រាយបញ្ហាជាមួយស្ថាប័នរដ្ឋឯទៀត ជាជាងមានអង្គការក្រៅស្ថាប័នមួយដែលមិនអាចទទួលបានកិច្ចសហការពីស្ថាប័ននានា” ។បណ្ឌិតវិទ្យាសាស្ត្រនយោបាយ លោក សុខ ទូច យល់ថា ការបង្កើតការបង្កើតស្ថាប័នសិទ្ធិមនុស្សឯករាជ្យនៅកម្ពុជា ធ្វើឲ្យខាតបង់ថវិកា។ លោកបញ្ជាក់ថា ដើម្បីដោះស្រាយបញ្ហារំលោភសិទ្ធិមនុស្សឲ្យមានប្រសិទ្ធិភាព សំខាន់ស្ថាប័នពាក់ព័ន្ធទាំងនោះមានឆន្ទៈគោរពតាមច្បាប់ជាតិ និងច្បាប់អន្តរជាតិដែលមានស្រាប់ នោះបានផលវិជ្ជមានហើយ។កាលពីឆ្នាំ២០០៦ លោក ហ៊ុន សែន បានប្រកាសគាំទ្រឲ្យមានស្ថាប័នជាតិសិទ្ធិមនុស្សឯករាជ្យនេះ និងស្របតាមកិច្ចព្រមព្រៀងទីក្រុងប៉ារីស ស្តីពីស្ថាប័នជាតិសិទ្ធិមនុស្ស។ លុះដល់ចន្លោះឆ្នាំ២០០៩-២០១០ គណៈកម្មាធិការសិទ្ធិមនុស្សកម្ពុជារបស់រដ្ឋាភិបាល ក៏ធ្លាប់ចូលរួមសហការជាមួយក្រុមការងារ ដើម្បីយន្តការសិទ្ធិមនុស្ស និងអាស៊ាន ក្នុងកិច្ចផ្តួចផ្តើមគំនិតធ្វើសេចក្តីព្រាងច្បាប់ ស្តីពី គណៈកម្មាធិការជាតិសិទ្ធិមនុស្សផងដែរ។អត្ថបទសកស្រង់ពីវិទ្យុសម្លេងប្រជាធិបតេយ្យ (VOD) ចុះផ្សាយថ្ងៃទី២៩ ខែវិច្ឆិកា ឆ្នាំ២០១៣៕