-
សង្គមស៊ីវិលជាតិ-អន្តរជាតិ៖ ច្បាប់ស្តីពីសិទ្ធិទទួលបានព័ត៌មាន ត្រូវមានការចូលរួមពិភាក្សាពីគណបក្សប្រឆាំង និងភាគីពាក់ព័ន្ធ
- Issue Date 05-Dec-2013
សង្គមស៊ីវិលជាតិ និងអន្តរជាតិប្រមាណជា៣០ នៅថ្ងៃព្រហស្បតិ៍នេះ នឹងដាក់អនុសាសន៍ចំនួន១០ទៅក្រសួងព័ត៌មាន ដើម្បីជាគំនិតសម្រាប់សេចក្តីព្រាងច្បាប់ស្តីពីសិទ្ធិទទួលបានព័ត៌មាន ដែលរដ្ឋាភិបាលកម្ពុជាគ្រោងបង្កើតនៅក្នុងអាណត្តិទី៥នេះ។អនុសាសន៍នេះ សម្រេចបានបន្ទាប់ពីមានការពិភាក្សាគ្នារយៈពេល១ថ្ងៃកន្លះចាប់ពីថ្ងៃទី០៤ ដល់ព្រឹកថ្ងៃទី០៥ខែធ្នូ នៅក្នុងសិក្ខាសាលាថ្នាក់ជាតិស្តីពី «សិទ្ធិទទួលបានព័ត៌មាននៅកម្ពុជា៖ ជំហានឆ្ពោះទៅមុខដើម្បីអភិវឌ្ឍន៍ច្បាប់ស្តីពីសិទ្ធិទទួលបានព័ត៌មាន»។នាយកនៃវិទ្យាស្ថានតស៊ូមតិ និងគោលនយោបាយ(API) លោក ណែប ស៊ីនថៃ មានប្រសាសន៍ថា ក្រោយពីសង្គមស៊ីវិលទាំងអស់ពិភាក្សាគ្នាលើឯកសារ និងទិន្នន័យដែលប្រមូលបានពីតាមមូលដ្ឋានក្នុងរយៈពេល១០ឆ្នាំមកនេះ សង្គមស៊ីវិលរកឃើញអនុសាសន៍ចំនួន១០ ដើម្បីដាក់ជូនក្រសួងព័ត៌មាននៅពេលខាងមុខ។ លោកថា អនុសាសន៍ទាំងនោះរួមមាន ស្នើឲ្យបង្កើតគណៈកម្មការអន្តរក្រសួងពាក់ព័ន្ធ ដើម្បីធ្វើសេចក្តីព្រាងច្បាប់ ត្រូវមានការចូលរួមពិភាក្សាពីគណបក្សប្រឆាំង ទទួលយកគំនិតយោបល់ពីគ្រប់មជ្ឈដ្ឋាន ដោយបង្កើតយន្តការនានា ដើម្បីឲ្យសង្គមស៊ីវិលចូលរួមផ្តល់យោបល់លើខ្លឹមសារច្បាប់ និងបញ្ចប់វប្បធម៌យកថវិកាចំពោះអ្នកស្នើសុំព័ត៌មានជាដើម ៖ "យើងក៏មានច្បាប់ជាគំរូដែលយើងបានពិភាក្សាតាមអ្នកជំនាញការ កម្ពុជា ទាំងអន្តរជាតិ នៅក្នុងចំណោមសង្គមស៊ីវិល ដើម្បីជាជំនួយស្មារតីមួយ ថាតើគំរូបែបនេះវានឹងអាចជួយអីខ្លះ នៅក្នុងក្រុមការងាររបស់ក្រសួងព័ត៌មាន ក៏ដូចជាអន្តរក្រសួង ដែលនឹងត្រូវធ្វើការលើបញ្ហានេះ អាចនឹងពិនិត្យឡើងវិញ ហើយបើសិនជាក្រុមការងារហ្នឹងចាប់ផ្តើមធ្វើការ មិនចាំបាច់ធ្វើការស្រាវជ្រាវអីផ្សេងទៀត ព្រោះយើងបានផ្តល់ឯកសារនេះ គឺជាមូលដ្ឋានគ្រឹះក្នុងការឈានទៅដល់ការធ្វើការក្នុងបញ្ហានេះ"។អនុសាសន៍ផ្សេងៗទៀតរួមមាន ក្រសួងព័ត៌មានធ្វើសេចក្តីព្រាងច្បាប់ដោយភាពលម្អិតច្បាស់លាស់ ដោយត្រូវកំណត់ពីការគ្រប់គ្រងព័ត៌មាន ឲ្យបានច្បាស់លាស់ក្នុងច្បាប់ មានចែងពីថវិកា និងច្បាប់ត្រូវធានាឲ្យមានថវិកាសម្រាប់អនុវត្ត ហើយខ្លឹមសារច្បាប់ត្រូវមានការការពារដល់អ្នកស្នើសុំ និងអ្នកផ្តល់ព័ត៌មានកំណត់ឲ្យច្បាស់លាស់អ្វីជាព័ត៌មានសម្ងាត់ និងអ្វីជាព័ត៌មានសារធារណៈ ច្បាប់ត្រូវអនុវត្តជាការប្រញាប់ សូមឲ្យមានការដាក់ទោសដល់អ្នកផ្តល់ព័ត៌មានមិនពិត និងស្នើដល់ក្រសួងពត៌មាន ឲ្យមានការបើកចំហរតាមរយៈរាជរដ្ឋាភិបាលចំពោះព័ត៌មានដែលមានស្រាប់ជាដើម។រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ មានប្រសាសន៍នៅរសៀលថ្ងៃព្រហស្បតិ៍នេះថា ក្រសួងស្វាគមន៍រាល់អនុសាសន៍របស់សង្គមស៊ីវិល ហើយលោកកំពុងរៀបចំជាឯកសារបង្កើតគណៈកម្មការចម្រុះ ដើម្បីបញ្ជូនទៅអង្គការសង្គមស៊ីវិល ឲ្យចាត់តំណាងចូលរួម។ លោកថា ក្រស្រួងទើបតែទទួលបានការចាត់តាំង២សប្តាហ៍ចុងក្រោយនេះ ដូច្នេះច្បាប់នេះត្រូវប្រើរយៈពេល៣ឆ្នាំទើបអាចបង្កើតបាន ៖ “គឺយើងនឹងធ្វើក្រុមតាក់តែងសេរីមួយ សម្រាប់ក្រុមដែលតាក់តែងព្រាងច្បាប់ ហើយបន្ទាប់មកទៀត យើងមានធ្វើសិក្ខាសាលាថ្នាក់ជាតិ ថ្នាក់ក្រោមជាតិ និងថ្នាក់អន្តរវិស័យ បានន័យថាយើងនឹងអញ្ជើញផ្នែកធុរកិច្ច ផ្នែកធនាគារ ផ្នែកសន្តិសុខ ប្រជុំគ្នាទៅដើម្បីគេជជែកគ្នាយល់ពីស្មារតីនេះ បន្ទាប់មកទៀតដើម្បីឲ្យគេដឹងកំណត់ថា ស្អីខ្លះដែលអាចថាជាព័ត៌មានសាធារណៈ អ្វីខ្លះដែលមិនអាចជាព័ត៌មានសាធារណៈ ដើម្បីឯកភាពគ្នាលើចំនុចនេះ”។តំណាងរាស្ត្រជាប់ឆ្នោតគណបក្សសង្គ្រោះជាតិ លោក សុន ឆ័យ មានប្រសាសន៍ថា កន្លងមកគណបក្សប្រឆាំង បានដាក់បញ្ជូលសេចក្តីព្រាងច្បាប់ស្តីពីសិទ្ធិទទួលបានព័ត៌មានចំនួន២លើក ទៅគណៈកម្មាធិការរដ្ឋសភា ហើយលោកសង្ឃឹមថា សេចក្តីព្រាងច្បាប់នោះ នឹងក្លាយជាឯកសារយោង ក្នុងការបង្កើតច្បាប់ស្តីពីសិទ្ធិទទួលបានព័ត៌មាន៕អត្ថបទដកស្រង់ពីវិទ្យុសម្លេងប្រជាធិបតេយ្យ (VOD) ចុះផ្សាយថ្ងៃទី០៥ ខែធ្នូ ឆ្នាំ២០១៣៕