-
សាលារាជធានីភ្នំពេញមិនអនុញ្ញាតអង្គការសង្គមស៊ីវិលដង្ហែក្បួនក្នុងទិវាសិទ្ធិមនុស្សអន្តរជាតិ ដូចឆ្នាំមុនៗ
- Issue Date 06-Dec-2013
សាលារាជធានីភ្នំពេញ មិនអនុញ្ញាតឲ្យអង្គការសង្គមស៊ីវិល ដង្ហែក្បួនក្នុងទិវាសិទ្ធិមនុស្សអន្តរជាតិ ១០ធ្នូ ដូចសព្វដង និងប្តូរទីតាំងជួបប្រជុំគ្នាទៅកាន់រមណីយដ្ឋានវត្តភ្នំ វិញ។ប្រធានក្រុមលេខាធិការគណៈកម្មាធិការប្រព្រឹត្តិកម្មនៃអង្គការសមាគមការពារសិទ្ធិកម្ពុជា លោក សួន ប៊ុនស័ក្តិ ប្រាប់VOD នៅព្រឹកថ្ងៃសុក្រនេះថា ក្រោយជំនួបជាមួយមន្ត្រីសាលារាជធានីថ្ងៃព្រហស្បតិ៍ ការស្នើសុំរបស់អង្គការសង្គមស៊ីវិលដង្ហែក្បួនពីពហុកីទ្បាដ្ឋានជាតិអូឡាំពិកឆ្លងកាត់មហាវិថីមួយចំនួនទៅកាន់ទីលានប្រជាធិតេយ្យ មិនត្រូវបានអនុញ្ញាតនោះទេ ដោយសាលារាជធានី អះអាងថា នៅថ្ងៃ១០ធ្នូនេះ មានក្បួនដង្ហែច្រើន ដែលក្នុងនោះមានសកម្មជនដីធ្លី និងសកម្មជនសិទ្ធិមនុស្ស ហែរមកពីបណ្តាខេត្តនានារួមនឹងក្បួនដង្ហែរបស់គណបក្សសង្គ្រោះជាតិ ចូលទៅកាន់ទីលានប្រជាធិបតេយ្យ។លោក សួន ប៊ុនស័ក្តិ បន្តថា ដោយមូលហេតុខ្លាចមានភាពចលាចល ប៉ះទង្គិចគ្នានេះ សាលារាជធានី បានអនុញ្ញាតឲ្យសង្គមស៊ីវិលដែលមានគ្នាជិត ៥០០០នាក់ មកពីបណ្តាញពហុវិស័យ ប្រជាសហគមន៍ យុវជន អង្គការសង្គមស៊ីវិលជាតិ និងអន្តរជាតិ ប្រារព្ធទិវាសិទ្ធិមនុស្សអន្តរជាតិ ដោយប្រមូលផ្តុំនៅលើរមណីយដ្ឋានវត្តភ្នំវិញ ក្រោមប្រធានបទ “យើងទាំងអស់គ្នាធ្វើការដើម្បីលើកកម្ពស់ និងការពារយុត្តិធម៌”។លោកបន្តថា សង្គមស៊ីវិលគ្រោងនឹងជួបជុំគ្នានៅវត្តភ្នំ ដោយគ្រោងនឹងសម្តែងមតិនៅទីនោះ។កាលពីថ្ងៃ៣០ ខែវិច្ឆិកា ប្រជាពលរដ្ឋ ព្រះសង្ឃ និងមន្ត្រីអង្គការសង្គមស៊ីវិល បានចាប់ផ្តើមដង្ហែធម្មយាត្រា ចេញពីខេត្តចំនួន៥ សំដៅមករាជធានីភ្នំពេញព្រមៗគ្នា នៅថ្ងៃទី១០ ខែធ្នូ ដើម្បីចូលរួមទិវាសិទ្ធិមនុស្សអន្តរជាតិ ទាមទារការគោរពសិទ្ធិមនុស្សនៅកម្ពុជា។ ខេត្តទាំងនោះរួមមាន ខេត្តស្វាយរៀង កំពង់ស្ពឺ កំពង់ធំ កំពត និងខេត្តពោធិ៍សាត់៕អត្ថបទដកស្រង់ពីវិទ្យុសម្លេងប្រជាធិបតេយ្យ (VOD) ចុះផ្សាយថ្ងៃទី៦ ខែធ្នូ ឆ្នាំ២០១៣៕