-
អង្គការចំនួន៣៣ ស្នើសុំឲ្យតុលាការឯករាជ្យ និងសុំរដ្ឋាភិបាល ធានាការគោរពសិទ្ធិមនុស្ស
- Issue Date 10-Dec-2013
អង្គការសង្គមស៊ីវិលចំនួន៣៣ ដែលធ្វើការពាក់ព័ន្ធនឹងសិទ្ធិមនុស្ស នៅថ្ងៃអង្គារនេះ ជំរុញឲ្យរាជរដ្ឋាភិបាលកម្ពុជា ស្ថាប័នរដ្ឋសភា និងស្ថាប័នព្រឹទ្ធសភា រួមទាំងតុលាការគ្រប់ជាន់ថ្នាក់ ត្រូវកែទម្រង់ប្រព័ន្ធច្បាប់មួយចំនួន ធានាតុលាការឯករាជ្យ និងធ្វើយ៉ាងណាគាំទ្រ និងការពារឲ្យមានការសម្តែងមតិ និងគោរពសិទ្ធិមនុស្ស ។សេចក្តីថ្លែងការណ៍រួមរបស់អង្គការសង្គមស៊ីវិលចំនួន៣៣ ចុះថ្ងៃទី១០ខែធ្នូ ឲ្យដឹងថា ក្រុមអង្គការសង្គមស៊ីវិល នៅតែមានក្តីកង្វល់ និងបញ្ហាប្រឈមធ្ងន់ធ្ងរជាច្រើន ដែលត្រូវបានសង្កេតដោយសង្គមស៊ីវិល ដូចជា ដំណើរការយឺតយ៉ាវនៃកំណែទម្រង់ច្បាប់ និងយុត្តិធម៌ ឆ្ពោះទៅរកតុលាការឯករាជ្យ ដែលកំពុងធ្វើការ ដោយមិនមានការជ្រៀតជ្រែកខាងនយោបាយ និងអំពើពុករលួយ។ អង្គការទាំងនោះ ជំរុញឲ្យមានការកសាងច្បាប់មូលដ្ឋានសំខាន់ៗ ការពារកុំឲ្យមានការរំលោភយកដីធ្លី ការបណ្តេញចេញដោយបង្ខំ ការគំរាមគំហែងប្រឆាំងនឹងអ្នកការពារសិទ្ធិមនុស្ស ព្រមទាំងការហាមឃាត់ ឬការរឹតត្បិតសេរីភាពនៃការប្រមូលផ្តុំដោយសន្តិវិធី និងសេរីភាពនៃការសម្តែងមតិនៅទីសាធារណៈ។សេចក្តីថ្លែងការណ៍បន្តថា បញ្ហារំលោភបំពានសិទ្ធិមនុស្ស នៅតែកើតឡើងនៅកម្ពុជា បូករួមទាំងការជួញដូរ និងការកេងប្រវ័ញ្ចស្ត្រីនិងកុមារ ការរំលោភបំពានប្រឆាំងនឹងជនជាតិដើមភាគតិច ទាក់ទងនឹងកម្មសិទ្ធិដីសហគមន៍ ការរើសអើងប្រឆាំងនឹងជនពិការ ការរំលោភបំពានលើសិទិ្ធទទួលបានយុត្តិធម៌របស់ជនជាប់ចោទ តាមរយៈតំណាងផ្លូវច្បាប់គ្រប់គ្រាន់ និងការរំលោភបំពានសិទ្ធិការងារមូលដ្ឋាន។នៅថ្ងៃអង្គារនេះ ស្ថានទូតអាមេរិកប្រចាំកម្ពុជា ក៏បានប្រកាសថា ខ្លួនចង់ឃើញកម្ពុជា លុបបំបាត់នូវភាពមិនល្អទាក់ទងនឹងបញ្ហារំលោភសិទ្ធិមនុស្ស ដែលក្នុងនោះ មានការបញ្ចប់បញ្ហាជម្លោះដីធ្លី ការបណ្តេញចេញ អំពើពុករលួយ និងការរត់ពន្ធមនុស្ស។សេចក្តីថ្លែងការណ៍របស់ស្ថានទូតអាមេរិក ឲ្យដឹងថា សហរដ្ឋអាមេរិកធ្វើការតាំងចិត្តយ៉ាងមុតមាំ ក្នុងការសម្រេចបានជោគជ័យនូវការគោរពសិទ្ធិមនុស្ស ដែលមានចែងនៅក្នុងសេចក្តីប្រកាសជាសកលស្តីពីសិទ្ធិមនុស្ស។សេចក្តីថ្លែងការណ៍ឲ្យដឹងទៀតថា នៅក្នុងប្រទេសកម្ពុជា ពុំមានអាទិភាពណាសំខាន់សម្រាប់សហរដ្ឋអាមេរិកជាងការលើកកម្ពស់ ការគោរពសិទ្ធិមនុស្សនិងគោលការណ៍នៃលទ្ធិប្រជាធិបតេយ្យនោះឡើយ។អ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន មានប្រសាសន៍ថា រយៈពេលប៉ុន្មានឆ្នាំចុងក្រោយនេះ ការគោរពសិទ្ធិមនុស្សនៅកម្ពុជា មានភាពប្រសើរឡើងច្រើនហើយរដ្ឋាភិបាលបានប្តេជ្ញាថាធ្វើអ្វីៗ ដែលគេបានលើកឡើងហ្នឹង រឹតឲ្យបានប្រសើរប្រកបដោយគុណភាព។ លោកបញ្ជាក់ថា៖ «រដ្ឋាភិបាលធ្វើជាមួយនឹងគោលការណ៍ ទន្ទឹមនឹងគោលការណ៍យើងមានច្បាប់ ដើម្បីឲ្យការប្រតិបត្តិច្បាប់ អីហ្នឹងការអនុវត្តច្បាប់ហ្នឹងបានប្រសើរ គឺប្រជាពលរដ្ឋទាំងអស់គ្នាហ្នឹង ត្រូវស្ថិតនៅក្នុងការដឹងការយល់និងការចូលរួមចំណែកទាំងប្រតិបត្តិ និងការអនុវត្តច្បាប់នេះឯង»៕អត្ថបទដកស្រង់ពីវិទ្យុសម្លេងប្រជាធិបតេយ្យ (VOD) ចុះផ្សាយថ្ងៃទី១០ ខែធ្នូ ឆ្នាំ២០១៣៕