-
សហជីពកម្មករចំនួន៩ ទុកពេលបីថ្ងៃឲ្យរាជរដ្ឋាភិបាល និងនិយោជក ដំទ្បើងប្រាក់ឈ្នួលកម្មករដល់១៦០ដុល្លារ
- Issue Date 02-Jan-2014
សហជីពកម្មករចំនួន៩ ព្រមានធ្វើមហាបាតុកម្មទូទាំងប្រទេស ដោយទុកពេលឲ្យរាជរដ្ឋាភិបាល និងនិយោជក បីថ្ងៃ ចាប់ពីថ្ងៃព្រហស្បតិ៍នេះទៅ ដើម្បីដោះស្រាយការទាមទារដំឡើងប្រាក់ឈ្នួលអប្បបរមាដល់កម្មករឲ្យបាន១៦០ដុល្លារអាមេរិកក្នុងមួយខែ។ក្នុងសន្និសីទសារព័ត៌មាន នៅព្រឹកថ្ងៃទី២ ខែមករា ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា(C-CAWDU) លោក អាត់ ធន់ មានប្រសាសន៍ថា កម្មករបានផ្ទុះការតវ៉ាដោយខ្លួនឯង ហើយប្រសិនបើនិយោជក និងរាជរដ្ឋាភិបាលមិនធ្វើអន្តរាគមន៍ក្នុងរឿងនេះទេ បាតុកម្មទូទាំងប្រទេសនឹងកើតទ្បើង ដោយមានទ្រង់ទ្រាយធំជាងលើកនេះទៅទៀត ៖ប្រធានសម្ព័ន្ធសហជីពចលនាកម្មកររបស់លោក ប៉ាវ ស៊ីណា រិះគន់ថា កន្លងមករាជរដ្ឋាភិបាល បានដាក់កម្លាំងសមត្ថកិច្ចចម្រុះ ចុះបង្ក្រាបក្រុមសហជីពឯករាជ្យ ដែលទាមទារសិទ្ធិជូនកម្មករ។ លោក ថា ប៉ុន្តែទោះយ៉ាងណា ក្រុមសហជីពកម្មករមិនរាថយទេ ពីព្រោះការតវ៉ាទាំងនោះ ធ្វើឡើងស្របតាមច្បាប់។ លោកអំពាវនាវដល់រាជរដ្ឋាភិបាលបញ្ឈប់សកម្មភាពគំរាមកំហែងទាំងនោះ និងព្យាយាមដោះស្រាយការទាមទាររបស់កម្មករ។កាលពីថ្ងៃទី៣១ ខែធ្នូ ឆ្នាំ២០១៣ ក្រសួងការងារ បានចេញសេចក្តីប្រកាសពីការដំទ្បើងប្រាក់ឈ្នួលអប្បបរមាសម្រាប់កម្មករ-និយោជិតផ្នែកវាយនភណ្ឌ កាត់ដេរសម្លៀកបំពាក់ និងដេរស្បែកជើង ពី៨០ដុល្លារអាមេរិក ដល់១០០ដុល្លារអាមេរិក ចាប់ពីខែកុម្ភៈ ឆ្នាំ២០១៤ ដោយបន្ថែមលើប្រាក់អត្ថប្រយោជន៍ផ្សេងៗទៀតដែលមានស្រាប់។ប្រធានសហព័ន្ធសហជីពនៃឧស្សាហកម្មវាយនភណ្ឌកាត់ដេរកម្ពុជា លោកស្រី ម៉ម ញឹម ប្តេជ្ញាថានឹង តស៊ូដាច់ខាតឲ្យកម្មករទទួលបានប្រាក់ឈ្នួល១៦០ដុល្លារអាមេរិក បើទោះបីជាកន្លងមក មានក្រុមខិលខូចមួយចំនួនលួចធ្វើសកម្មភាពមិនល្អ ដើម្បីទម្លាក់កំហុសដាក់សហជីពឯករាជ្យក៏ដោយ។អ្នកនាំពាក្យប្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ មិនខ្វល់នឹងការព្រមានរបស់ក្រុមសហជីពនោះទេ។ លោកថា រាជរដ្ឋាភិបាលបានធ្វើអ្វីដែលខ្លួនបានធ្វើរួចហើយ។ លោកស្នើឲ្យក្រុមសហជីពទាំងអស់ មុនពេលធ្វើសកម្មភាពរបស់ខ្លួន ត្រូវគិតគូរឲ្យបានច្បាស់លាស់ ធ្វើយ៉ាងណាកុំឲ្យប្រាស់ចាកទៅនឹងច្បាប់។អត្តបទដកស្រង់ពីវិទ្យុសំលេងប្រជាធិបតេយ្យ VOD ចុះផ្សាយនៅថ្ងៃទី០២ ខែមករា ឆ្នាំ២០១៤