-
ព្រះសង្ឃ និងសកម្មជនសិទ្ធិមនុស្ស ដែលសមត្ថកិច្ចឃាត់ខ្លួន នៅខេត្តព្រះវិហារ ត្រូវបានដោះលែង
- Issue Date 03-Jan-2014
ព្រះសង្ឃចំនួនពីរអង្គ និងសកម្មជនសិទ្ធិមនុស្សបីរូបទៀត ដែលសមត្ថកិច្ចឃាត់ខ្លួន នៅខេត្ដព្រះវិហារ កាលពីម្សិលមិញ ត្រូវបានដោះលែងវិញ នៅព្រឹកថ្ងៃសុក្រនេះ បន្ទាប់ពីមានអន្ដរាគមន៍ពីពលរដ្ឋ អង្គការសង្គមស៊ីវិល និងមេធាវីការពារ។មន្ដ្រីការពារសិទ្ធលំនៅឋាននៃមជ្ឈមណ្ឌលអប់រំច្បាប់ សម្រាប់សហគមន៍ CLEC លោក ប៊ូ ពៅ ដែលត្រូវបានដោះលែង ប្រាប់VODថា ព្រះសង្ឃពីរព្រះអង្គ និងមន្ដ្រីរបស់លោកពីរនាក់ទៀត ត្រូវបានដោះលែង នៅម៉ោងជិត១០ព្រឹកថ្ងៃនេះ បន្ទាប់ពីមានមេធាវីការពារក្តី និងមានជួយអន្ដរាគមន៍ ពីពលរដ្ឋជនជាតិគួយ និងអង្គការសង្គមស៊ីវិល។ លោកថា លោកត្រូវបានសមត្ថកិច្ច ឃាត់ខ្លួនអស់មួយយប់ ដោយចោទថា ញុះញង់ពលរដ្ឋឲ្យមានចលាចល និងបង្កឲ្យប៉ះពាល់ដល់សន្ដិសុខជាតិ ៖ចំណែក ព្រះតេជគុណ ប៊ុត ប៊ុនតិញ មានថេរៈដីកាថា ការឃាត់ព្រះកាយព្រះអង្គ និងបុគ្គលិកអង្គការ នោះជាការរំលោភសិទ្ធិពលរដ្ឋ ដោយគ្រាន់តែ ពួកគាត់សំណេះសំណាល និងសួរសុខទុក្ខពលរដ្ឋ ខណៈពលរដ្ឋ រងការរំលោភដីធ្លី ពីក្រុមហ៊ុនចិននៅតំបន់នោះ។ព្រះអង្គបន្ដថា សមត្ថកិច្ចបានប្រើអាវុធភ្ជង់ព្រះអង្គ ហើយឃាត់ព្រះកាយព្រះអង្គ អស់ជាច្រើនម៉ោង ៖VOD មិនអាចទាក់ទងស្នងការនគរបាល ខេត្ដព្រះវិហារ លោក ស៊ី ការី ដើម្បីបំភ្លឺពីការឃាត់ខ្លួសកម្មជនសិទ្ធិមនុស្ស និងព្រះសង្ឃនោះបានទេ ដោយទទួលទូរស័ព្ទហើយ ផ្ដាច់ទៅវិញ បន្ទាប់ពីសាកសួរពីរឿងនេះ។អ្នកសម្របសម្រួលសមាគមអាដហុក ប្រចាំខេត្ដព្រះវិហារ លោក ឡោ ចាន់ មានប្រសាសន៍ថា ទង្វើរបស់សមត្ថកិច្ចនៃការឃាត់ខ្លួននេះ ជាករណីខុសច្បាប់ និងរំលោភសិទ្ធិមនុស្ស។ លោកស្នើឲ្យអាជ្ញាធរបញ្ឈប់គំរាមកំហែងពលរដ្ឋ ដែលមិនមានកំហុស និងជំរុញឲ្យជួយដោះស្រាយជំលោះដីធ្លីពលរដ្ឋប្រសើរជាងប្រើហឹង្សា។កាលពីរសៀលថ្ងៃទី២ ខែមករា ឆ្នាំ២០១៤ សមត្ថកិច្ចខេត្ដព្រះវិហារ ប្រមាណជាង៥០នាក់ប្រដាប់ដោយអាវុធ បានប្រើកាំភ្លើងភ្ជង់ ឃាត់ខ្លួនបុគ្គលិកអង្គការចំនួន៣រូប និងព្រះសង្ឃពីរព្រះអង្គ បន្ទាប់ពីពួកគេ ចេញពីសំណេះសំណាល និងសួរសុខទុក្ខពលរដ្ឋជនជាតិគួយ ដែលតវ៉ារឿងជម្លោះជាមួយក្រុមហ៊ុនចិន ឡានហ្វេង ក្នុងស្រុកត្បែងមានជ័យ ខេត្ដព្រះវិហារ។ព្រះសង្ឃដែលត្រូវឃាត់ព្រះកាយនោះ ព្រះនាម ប៊ុត ប៊ុនទិញ និងព្រះនាម ណាម ចាន់ថេន និងបុគ្គិល មជ្ឈមណ្ឌលអប់រំច្បាប់ សម្រាប់សហគមន៍ បីរូបទៀត មាន លោក ប៊ូ ពៅ លោក ឯម សារ៉ុម និង លោក ឆេន សំបូរ៕អត្តបទដកស្រង់ពីវិទ្យុសំលេងប្រជាធិបតេយ្យ VOD ចុះផ្សាយនៅថ្ងៃទី០៣ ខែមករា ឆ្នាំ២០១៤