-
ពលរដ្ឋតវ៉ាមុខការិយាល័យអ.ស.បទាមទារឲ្យដោះលែងអ្នកជាប់ឃុំ២៣នាក់
- Issue Date 13-Jan-2014
ក្រុមអ្នកតវ៉ាប្រមាណ ១០០នាក់ នៅថ្ងៃទី១៣ មករា បាននាំគ្នាតវ៉ាមុខការិយាល័យឧត្ដមស្នងការអង្គការសហប្រជាជាតិ (អ.ស.ប) ទទួលបន្ទុកសិទ្ធិមនុស្សប្រចាំកម្ពុជា ទាមទារឲ្យដោះលែងអ្នកជាប់ឃុំ ២៣នាក់ នៅគុកត្រពាំងផ្លុង ខេត្តកំពង់ចាម។អ្នកតវ៉ាទាំងនោះមានតំណាងសហជីពនានា រួមទាំងប្រជាពលរដ្ឋរងគ្រោះដោយសារការរឹបអូសយកដីធ្លីនៅបឹងកក់ និងបុរីកីឡា បានស្រែកទាមទារនៅមុខការិយាល័យឧត្ដមស្នងការអង្គការសហប្រជាជាតិ ហើយបានដាក់ញត្តិទាមទារឲ្យដោះលែងអ្នកជាប់ឃុំចំនួន ២៣នាក់ នៅគុកត្រពាំងផ្លុង។អ្នករាយការណ៍ពិសេសរបស់អង្គការសហប្រជាជាតិ លោក សុរិយា ស៊ូប៊ែឌី (Surya Subedi) បានចេញមកទទួលញត្តិហើយបានប្រាប់ក្រុមអ្នកតវ៉ាថា នឹងយកសំណើនេះទៅពិភាក្សាជាមួយភាគីពាក់ព័ន្ធ។ស្របពេលនេះដែរ នៅថ្ងៃដដែលនេះ មានអង្គការមិនមែនរដ្ឋាភិបាលនិងសមាគមចំនួន ៦៥ បានធ្វើសន្និសីទកាសែតមួយនៅរាជធានីភ្នំពេញ ទាមទារឲ្យរដ្ឋាភិបាលដោះលែងអ្នកជាប់ឃុំចំនួន ២៣នាក់ជាបន្ទាន់និងដោយឥតលក្ខខណ្ឌ។សង្គមស៊ីវិលក៏បានសុំឲ្យរដ្ឋាភិបាលបង្កើតគណៈកម្មាធិការឯករាជ្យមួយ បើកការស៊ើបអង្កេតដើម្បីចាប់ជនដៃដល់ដែលបាញ់ប្រហារលើក្រុមបាតុករធ្វើបាតុកម្មទាមទារប្រាក់ខែគោលកាលពីថ្ងៃទី២ និងទី៣ មករា ឆ្នាំ២០១៤ នៅជាយរាជធានីភ្នំពេញ បណ្ដាលឲ្យកម្មករយ៉ាងហោចណាស់ ៤នាក់ស្លាប់ ជិត ៤០នាក់រងរបួស ព្រមទាំង ២៣នាក់ផ្សេងទៀតត្រូវបានចាប់ខ្លួនដាក់គុកត្រពាំងផ្លុង ក្នុងខេត្តកំពង់ចាម ជាប់ព្រំដែនវៀតណាម។ដកស្រង់ចេញពី វិទ្យុអាស៊ីសេរី (RFA) ចុះថ្ងៃទី១៣ ខែមករា ឆ្នាំ២០១៤។