-
ប្រជាជនប្រមាណ១ម៉ឺននាក់ប្រមូលផ្តុំនៅមុខសាលាដំបូងរាជធានីភ្នំពេញនៅព្រឹកនេះ
- Issue Date 14-Jan-2014
ប្រជាជនមកពីតាមបណ្តាខេត្ត និងនៅរាជធានីភ្នំពេញប្រមាណ១ម៉ឺននាក់បានប្រមូលផ្តុំនៅមុខសាលាដំបូងរាជធានីភ្នំពេញនៅព្រឹកថ្ងៃអង្គារនេះ ដើម្បីរង់ចាំស្តាប់លទ្ធផលនៃការចូលបំភ្លឺរបស់លោក សម រង្ស៊ី លោក កឹម សុខា និងលោក រ៉ុង ឈុន។ប្រជាជនមកពីតាមបណ្តាខេត្ត និងនៅរាជធានីភ្នំពេញបានប្រមូលផ្តុំកកកុញនៅមុខសាលាដំបូងរាជធានីភ្នំពេញចាប់ពីចំណុចស្តុបអាងទឹកដល់ស្តុបនាងគង់ហ៊ីង ដែលចាប់ពីម៉ោង៩ព្រឹក។ឡាន ឬម៉ូតូមិនអាចធ្វើចរាចរណ៍ឆ្លងកាត់ទីនោះបានទេ។ប្រជាជនដែលប្រមូលផ្តុំនោះ បានលើកបដា សរសេរថា អក្សរថា លោក សម រង្ស៊ី លោក កឹម សុខា និង លោក រ៉ុង ឈុន មិនបានប្រព្រឹត្តកំហុសដូចការចោទកាន់របស់តុលាការទេ ហើយក៏មានបដាខ្លះសរសេរថា«ពួកយើងត្រូវការតុលាការឯករាជ្យ»។ទន្ទឹមនឹងចំនួនប្រជាជនកកកុញនោះ កម្លាំងសមត្ថកិច្ចមានប្រមាណតែ១០០នាក់ទេ ដែលនៅចាំជួយសម្របសម្រួលសន្តិសុខ។ តែនៅក្នុងបរិវេណពហុកីឡាដ្ឋានជាតិអូឡាំពិក មានកម្លាំងសមត្ថកិច្ចមួយចំនួនទៀតដាក់ប្រចាំនៅក្នុងនោះ។រហូតដល់ម៉ោងជិត១០នេះ មិនទាន់មានព័ត៌មានពីការប៉ះទង្គិចរវាងសមត្ថកិច្ច និង ប្រជាជនកើតឡើងទេ។លោក សម រង្ស៊ី ប្រធាន លោក កឹម សុខា អនុប្រធានគណបក្សសង្គ្រោះជាតិ និងលោក រ៉ុង ឈុន ប្រធានសភាពសហជីពកម្ពុជា ត្រូវអយ្យការអមសាលាដំបូងរាជធានីភ្នំពេញ បានកោះហៅ ឲ្យចូលបំភ្លឺ នៅថ្ងៃទី១៤ ខែមករាពីបទចោទដូចគ្នាគឺ ករណីញុះញង់ឲ្យប្រព្រឹត្តបទឧក្រិដ្ឋ ឬអំពើបង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ពាក់ព័ន្ធការដឹកនាំប្រជាជន និងកម្មករធ្វើបាតុកម្ម៕ដកស្រង់ចេញពីវិទ្យុសម្លេងប្រជាធិបតេយ្យ(VOD) ចុះថ្ងៃទី១៤ ខែមករា ឆ្នាំ២០១៤។