-
CCIM៖ ការកាត់ទោសអ្នកលេងហ្វេសប៊ុក ជាការគំរាមលើសេរីភាពបញ្ចេញមតិ តាមអ៊ីធើណែត
- Issue Date 17-Feb-2014
មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) ចាត់ទុកការកាត់ទោសអ្នកប្រើប្រាស់ហ្វេសប៊ុក គឺជាការគំរាមកំហែងលើសិទ្ធិសេរីភាព បញ្ចេញមតិ តាមប្រព័ន្ធអ៊ីនធើណែត។លើសំណុំរឿងបណ្តឹងម្ចាស់ហាងខ្មែរឌីហ្សាញ ប្រឆាំងពិធីការិនី ឌួង ហ្សូរីដា ដោយសម្រេចចោទប្រកាន់ពីបទ សរសេរសារមិនសមរម្យ និងបរិហាកេរ្តិ៍នៅលើគេហទំព័រហ្វេសប៊ុក និងផាកពិន័យប្រាក់ចំនួន២លានរៀល (៥០០ដុល្លារ) សងជំងឺចិត្តដើមបណ្តឹងចំនួន៥លានរៀល (១២៥០ដុល្លារ)។ក្នុងសេចក្តីប្រកាសព័ត៌មាននេះ នាយកប្រតិបត្តិ CCIM លោក ប៉ា ងួនទៀង យល់ថា ការបញ្ចេញមតិនោះ មិនមែនជាការបរិហាកេរ្តិ៍នោះឡើយ គ្រាន់តែជាមតិផ្ទាល់ខ្លួនរបស់នាង ដែលជាសិទ្ធិមូលដ្ឋានរបស់ប្រជាពលរដ្ឋទូទៅ។ លោកបន្តថា ករណីនេះ ឆ្លុះបញ្ចាំងពីយន្តការបង្ក្រាបលើកដំបូង ចំពោះការប្រើប្រាស់ប្រព័ន្ធទំនាក់ទំនងសង្គមនៅកម្ពុជា ខណៈដែលហ្វេសប៊ុក កំពុងទទួលការពេញនិយម សម្រាប់ស្វែងរកព័ត៌មានឯករាជ្យ នៅពេលដែលទូរទស្សន៍ និងវិទ្យុក្នុងស្រុកមួយចំនួនកំពុងស្ថិតក្រោមការគ្រប់គ្រងរបស់រដ្ឋាភិបាល។ទន្ទឹមនឹងនេះ CCIM ក៏ជំរុញឲ្យរដ្ឋាភិបាល បង្កើនកិច្ចប្រឹងប្រែង គ្រប់គ្រងសេរីភាពបញ្ចេញមតិ តាមប្រព័ន្ធអ៊ីធើណែត និងអនុម័តច្បាប់ ដើម្បីផ្តល់កិច្ចការពារពេញលេញ ដល់សិទ្ធិពលរដ្ឋ ទាំងក្នុង និងក្រៅប្រព័ន្ធអ៊ីនធើណែត។កញ្ញាដួង ហ្សូរីដា ត្រូវបានចៅក្រមសាលាដំបូង ផ្ដន្ទាទោសដោយផ្អែកលើមាត្រា ៣០៥ នៃក្រុមព្រហ្មទណ្ឌ ព្រះរាជាណាចក្រកម្ពុជា។ កាលពីខែមករាដើមឆ្នាំនេះ លោកណុប បាយ៉ារិទ្ធិ ក៏មានរឿងរ៉ាវប្ដឹងផ្ដល់គ្នាស្រដៀងគ្នា ដោយសារការសរសេរសរនៅលើគេហទំព័រហ្វេសប៊ុករបស់លោកផង ដែរ។ដកស្រង់ចេញពីវិទ្យុសម្លេងប្រជាធិបតេយ្យ (VOD) ចុះថ្ងៃទី១៧ ខែកុម្ភៈ ឆ្នាំ២០១៤។