-
សមត្ថកិច្ចរារាំងយុវជន៩នាក់មិនឲ្យជួបជុំនៅទីលានប្រជាធិបតេយ្យសមត្ថកិច្ចចាប់ខ្លួនយុវជនម្នាក់ដែលឈរមើលការប្រមូលផ្តុំនៅទីលានប្រជាធិបតេយ្យ
- Issue Date 21-Feb-2014
យុវជនធ្វើដំណើរម្នាក់ត្រូវបានចាប់ខ្លួន នៅព្រឹកថ្ងៃព្រហស្បតិ៍នេះ ក្បែរទីលានប្រជាធិបតេយ្យ នៅពេលដែលតាមមើលយុវជន០៩នាក់ រៀបចំការប្រមូលផ្តុំនៅទីលានប្រជាធិបតេយ្យ ដើម្បីប្រារព្ធទិវាយុត្តិធម៌សង្គមអន្តរជាតិ។ នៅព្រឹកនេះយុវជន ០៩នាក់ រៀបចំពិធីជួបជុំនៅទីលានប្រជាធិបតេយ្យ ដើម្បីថ្លែងសុន្ទរកថា អបអរទិវាយុត្តិធម៌សង្គមអន្តរជាតិ ដោយរៀបរាប់ពីស្ថានភាពនៃការទទួលបានយុត្តិធម៌នៅកម្ពុជា។ តែពិធីនោះមិនទាន់ដំណើរផង ក៏មានសមត្ថកិច្ចប្រមាណ២០នាក់ ចុះទៅបំបែក និងបានចាប់ខ្លួនយុវជនម្នាក់ឈ្មោះ ភ័ក្រ យកទៅសាលាខណ្ឌ។ការចាប់ខ្លួនធ្វើឡើងពេលដែលយុវជនរូបនោះ បានរិះគន់អាជ្ញាធរ ដែលកំពុងបំបែកក្រុមយុវជន០៩នាក់ថា បំបិទសិទ្ធិសេរីភាពការបញ្ចេញមតិ និងការប្រមូលផ្តុំរបស់ប្រជាពលរដ្ឋ។អ្នកសម្របសម្រួលយុវជនឯករាជ្យ លោក រិន ចាន់រិទ្ធិ ដែលដឹកនាំរៀបចចំពិធីជួបជុំ នៅទីលានប្រជាធិបតេយ្យនោះ មានប្រសាសន៍នៅមុខឧត្តមស្នងការអង្គការសហប្រជាជាតិថា អាជ្ញាធរកំពុងតែ រំលោភសិទ្ធិមនុស្សយ៉ាងធ្ងន់ធ្ងរ ព្រោះប្រជាពលរដ្ឋគ្រាន់តែបញ្ចេញមតិ និងដើរតាមផ្លូវសោះ ក៏ធ្វើការចាប់ខ្លួនភា្លម។ លោកអំពាវនាវឲ្យអាជ្ញាធរ រាជធានីភ្នំពេញដោះលែង យុវជនម្នាក់នោះដោយគ្មានលក្ខខណ្ឌ ព្រោះគេមិនមានកំហុសទេ «ពួកខ្ញុំគិតថា នេះគឺជារំលោភសិទ្ធិសេរីភាពនៃការជួបជុំគ្នា យ៉ាងធ្ងន់ធ្ងរ ព្រោះខ្ញុំទទូចចង់បានម្តងហើយម្តងទៀត ថាខ្ញុំសុំជួបគ្នាតែ១៥នាទីទេ ប៉ុន្តែគាត់នៅតែបន្តរារាំង ដេញ លក្ខណៈដេញវ៉ៃពួកខ្ញុំ អ៊ឹចឹងពួកខ្ញុំដើររហូត ដើរគេចចេញពីកន្លែងហ្នឹង ដើរទៅដល់ផ្សារថ្មី ពួកគាត់ដើរទៅតាមពួកខ្ញុំ ពួកគាត់ក៏បានឃាត់ពួកខ្ញុំ ឃាត់ហើយពួកគាត់ព្រមានថា មិនឲ្យរញ៉េរញ៉ៃច្រើនទេ តែហ៊ានប្រឆាំងនឹងគាត់ គឺគាត់វ៉ៃបែកក្បាល»។លោក រិន ចាន់រិទ្ធិ អំពាវនាវទៅដល់អង្គការសង្គមស៊ីវិល និងអង្គការសហប្រជាជាតិឲ្យជួយអន្តរាគមន៍លើករណីនេះ។ប្រធានអង្គការសិទ្ធិមនុស្សលីកាដូ លោកស្រី ពុង ឈីវកេក រិះគន់ចំពោះចំណាត់ការរបស់អាជ្ញាធររាជធានីភ្នំពេញ ដែលធ្វើឡើងផ្ទុយនឹងលទ្ធិប្រជាធិបតេយ្យ ព្រោះប្រទេសកម្ពុជាធ្លាប់បានចុះសន្ធិសញ្ញាច្រើនជាមួយនឹងអន្តរជាតិ ដែលទាក់ទងនឹងការផ្តល់សិទ្ធិសេរីភាព ដល់ប្រជាពលរដ្ឋក្នុងការបញ្ចេញមតិ «ខ្ញុំមានការលោកស្តាយមែនទែន សោកស្តាយថា ទី១ រដ្ឋាភិបាលហាមឃាត់មិនឲ្យជួបជុំគ្នា ទី២ ហាមឃាត់មិនឲ្យជួបជុំគ្នាលើសពី ៩នាក់។ ឥឡូវនេះក្រែងហ្នឹងយុវជនជួបជុំតែ ៩នាក់ទេ អ៊ឹចឹង មិនត្រូវមកចាប់ទេ ហើយថ្ងៃនេះ ជាថ្ងៃទិវាអន្តរជាតិ សម្រាប់យុត្តិធម៌ -ល- ដូច្នេះគួរតែទុកឲ្យយុវជនជួបគ្នាជជែកគ្នាទៅ មិនខុសខាតអី មិនមែនជាប៉ះពាល់អីសណ្តាប់ធ្នាប់អីទេ»។នាយកប្រតិបត្តិក្រុមអ្នកច្បាប់ការពារសិទ្ធិកម្ពុជា សុក សំអឿន មានប្រសាសន៍ថា ការដែលអាជ្ញាធរមានចាប់ប្រជាពលរដ្ឋ ដែលគ្រាន់តែចេញមកបញ្ចេញមតិបែបនេះ គឺផ្ទុយនឹងច្បាប់រដ្ឋធម្មនុញ្ញ នៃព្រះរាជាណាចក្រកម្ពុជាហើយ «បើយើងមើលតាមរដ្ឋធម្មនុញ្ញ យើងជាប្រទេសប្រកាន់លទ្ធិប្រជាធិបតេយ្យ សេរី មានសេរីភាពការបញ្ចេញមតិ ប្រសិនការអនុវត្តន៍សព្វថ្ងៃនេះ អត់ទេ វាអត់មាន ប៉ុន្តែខាងរដ្ឋាភិបាល គេថា គេសុំប្រកាសភាពអាសន្ន។ អ៊ឹចឹង យើងមិនដឹងថាម៉េច តែបើយើងនិយាយពីបញ្ហាផ្លូវច្បាប់ វាដូចជាមិនអាចធ្វើអ៊ឹចឹងកើតទេ ដូច្នេះមានន័យថាម៉េច? មានន័យថា ប្រទេសយើងសព្វថ្ងៃកំពុងតែ មិនមានលទ្ធិប្រជាធិបតេយ្យ សេរីពេញលេញទេ»។ស្នងការរងនគរបាលរាជធានីភ្នំពេញ លោក ជួន ណារិន មានប្រសាសន៍ថា នគរបាលទាំងអស់មិនបាន ដឹងពីការការចាប់ខ្លួនយុវជននោះទេ ហើយថា នោះជាការងារសាលាខណ្ឌ។ករណីនេះ VOD មិនទាន់អាចសុំការបំភ្លឺពីលោក ហ៊ុន សុធី អធិការខណ្ឌដូនពេញបានទេ ព្រោះលោកមិនលើកទូរស័ព្ទទេ។កាលពីថ្ងៃទី០៤ ខែមករា ក្រសួងមហាផ្ទៃបានចេញបម្រាមមួយ ដោយហាមការប្រមូលផ្តុំមនុស្សចាប់ពី១០នាក់ឡើងទៅនៅទីសាធារណៈទេ ដើម្បីរក្សាសន្តិសុខសណ្តាប់ធ្នាប់សង្គម។ ក្រោយការចេញបម្រាមនោះ សមត្ថកិច្ចតែងបង្ក្រាបជាញឹកញាប់ លើការប្រមូលផ្តុំរបស់អង្គការសង្គមស៊ីវិល ប្រជាពលរដ្ឋមានជម្លោះដីធ្លី និងកម្មករជាដើម៕ ដកស្រង់ចេញពីវិទ្យុសម្លេងប្រជាធិបតេយ្យ (VOD) ចុះថ្ងៃទី២០ ខែកុម្ភៈឆ្នាំ២០១៤។