-
ពលរដ្ឋ និងព្រះសង្ឃជិត ១០០០អង្គនាក់ ប្រមូលផ្តុំនៅទីលានប្រជាធិបតេយ្យ ទាមទារស្ថានទូតវៀតណាម សុំទោស ករណីទឹកដីកម្ពុជាក្រោម
- Issue Date 11-Aug-2014
ប្រជាពលរដ្ឋ និងព្រះសង្ឃប្រមាណ១០០០អង្គនាក់ ជួបជុំគ្នានៅទីលានប្រជាធិបតេយ្យដើម្បី ទាមទារឲ្យស្ថានទូតវៀតណាមធ្វើការសុំទោសជាផ្លូវការ ចំពោះការអះអាងថា ទឹកដីខ្មែរកម្ពុជាក្រោមជាទឹកដីរបស់វៀតណាមមុនបារាំងកាត់ឲ្យ។ការជួបជុំនៅព្រឹកថ្ងៃចន្ទនេះ ដឹកនាំដោយសម្ព័ន្ធយុវជនខ្មែរដើម្បីលទ្ធិប្រជាធិតេយ្យ និងសហគមន៍ខ្មែរកម្ពុជាក្រោមដោយមានការចូលរួមពីព្រះសង្ឃ ប្រជាពលរដ្ឋ និងសិស្សនិស្សិត ប្រមាណ ១ពាន់អង្គនាក់។ការជួបជុំជាថ្មីនេះ ធ្វើឡើងបន្ទាប់ពីអ្នកនាំពាក្យស្ថានទូតវៀតណាមលោក ត្រឹង វ៉ាន់ថុង មិនបានចេញមុខសុំទោសជាសាធារណៈ នៅពេលដែលបាតុករបានយកញត្តិដាក់ទៅស្ថានទូតវៀតណាម កាលពីថ្ងៃទី២២ ខែកក្កដា។ មន្ត្រីស្ថានទូតវៀតណាម មិនបានចេញមកទទួលយកញត្តិទេ តែមន្ត្រីសាលារាជធានីភ្នំពេញបានទទួលញត្តិ ដោយអះអាងថាបញ្ជូនទៅក្រសួងការបរទេសកម្ពុជា។ ចំណែកឯ មន្ត្រីក្រសួងការបរទេសកម្ពុជា អះអាងថា បានផ្ញើញត្តិទៅស្ថានទូតវៀតណាមរួចហើយ។ នាយកប្រតិបត្តិសហគមន៍ខ្មែរកម្ពុជាក្រោមលោក ថាច់ សេដ្ឋា ឲ្យដឹងថា នៅព្រឹកនេះ ពួកគាត់ នឹងជួបជុំដើម្បីធ្វើសេចក្ដីថ្លែងការណ៍ និងបញ្ចេញមតិនៅឯទីលានប្រជាធិបតេយ្យ ហើយបន្ទាប់ពីសម្រាកបាយថ្ងៃត្រង់ ពួកគេនឹងដង្ហែក្បួនទៅក្រសួងការបរទេស ដើម្បីសាកសួរពីលទ្ធផលនៃការដាក់ញត្តិ កាលពីលើកមុន ។លោក ថាច់ សេដ្ឋា បន្តថា បន្ទាប់ពីនោះ ពួកគេ នឹងដើរទៅស្ថានទូតប្រទេសក្នុងអាស៊ានពីរ គឺប្រទេសភូមា និងប្រទេសឡាវដើម្បីដាក់ញត្តិ។ គេសង្កេតឃើញមានកងកម្លាំងប្រដាប់អាវុធប្រមាណ១០ឡានបើកជុំវិញទីលាន ប្រជាធិបតេយ្យ តែពុំបានឈប់ចតទេ។កន្លងទៅអ្នកនាំពាក្យស្ថានទូតវៀតណាមប្រចាំកម្ពុជា លោក ត្រឹង វ៉ានថុង មានប្រសាសន៍ថាលោកមិនសុំទោសចំពោះការថ្លែងរបស់លោកតាមការទាមទារ ឡើយ ដោយចាត់ទុកការតវ៉ារបស់ប្រជាពលរដ្ឋខ្មែរ ជាការរំលោភច្បាប់កម្ពុជា និងអន្តរជាតិ៕ដកស្រង់ចេញពី វិទ្យុសម្លេងប្រជាធិបតេយ្យ ចេញផ្សាយថ្ងៃទី១១ ខែសីហា ឆ្នាំ ២០១៤ ។