-
គណៈកម្មការសិទ្ធិមនុស្សថៃ ថាក្រុមហ៊ុនស្ករអំពៅ KSL កំពុងតែផលិតស្ករឈាម និងរំលោភសិទ្ធិមនុស្សនៅកម្ពុជាយ៉ាងធ្ងន់ធ្ងរ
- Issue Date 14-Aug-2014
ស្នងការនៃគណៈកម្មការសិទ្ធិមនុស្សថៃ នៅថ្ងៃពុធនេះ អៈអាងថាក្រុមហ៊ុនស្ករអំពៅ ខុន ខេន ស៊ូហ្គើរ កំពុងតែផលិតស្ករឈាម (Blood Sugar) ហើយពិតជាបានរំលោភសិទ្ធិមនុស្សយ៉ាងធ្ងន់ធ្ងរ នៅទីតាំងដែលខ្លួនកំពុងវិនិយោគក្នុងខេត្ត កោះកុង និង ឧត្ដរមានជ័យ ព្រំដែនកម្ពុជា-ថៃ ។ក្នុងសន្និសីទសារព័ត៌មាននៅ ផ្ទះមេត្តា (Meta House) ក្នុងរាជធានីភ្នំពេញ កាលពីព្រឹកថ្ងៃពុធនេះ ស្នងការនៃគណៈកម្មការសិទ្ធិមនុស្សថៃលោក នីរុន ភីតាកវ៉ាតឆារ៉ា (Dr. Nirun Phitakwatchara) ថ្លែងតាមរយៈអ្នកបកប្រែដោយទទួលស្គាល់ថា ក្រុមហ៊ុន ខុន ខេន ស៊ូហ្គើរ KSL (Khon Kaen Sugar Industry Public Company Limited) បានរំលោភសិទ្ធិមនុស្សយ៉ាងធ្ងន់ធ្ងរនៅក្នុងខេត្តកោះកុង និងឧត្ដរមានជ័យ ដោយធ្វើការរំលោភយកដីពលរដ្ឋដោយមិនមានសំណងសមស្របនោះទេ។លោក នីរុន បន្ថែមថា ក្រោយពីបានតាមដាន និងចុះត្រួតពិនិត្យដល់កន្លែងជាក់ស្ដែងអស់រយៈពេលប្រមាណពីរឆ្នាំ មកឃើញថា ក្រុមហ៊ុនបានយកដីដែលរំលោភពីពលរដ្ឋទៅដាំដំឡូង ដោយមិនទាន់បានធ្វើការអភិវឌ្ឍន៍តាមអ្វីដែលខ្លួនអៈអាងនោះទេ ហើយពលរដ្ឋកំពុងជួបនូវផលពិបាកយ៉ាងធ្ងន់ធ្ងរ។ លោកសន្យានឹងដាក់របាយការណ៍ ពីការរំលោភសិទ្ធិមនុស្សនេះទៅតំណាងសហគមន៍អឺរ៉ុប អង្គការសហប្រជាតិ និងរដ្ឋាភិបាលថៃ ដើម្បីស្វែងរកដំណោះស្រាយជាបន្ទាន់។ដោយឡែកប្រធានមជ្ឍមណ្ឌលអប់រំច្បាប់សម្រាប់សហគមន៍ លោក យ៉េង វីរៈ មានប្រសាសន៍ថា ពលរដ្ឋក្នុងតំបន់ដីសម្បទាន កំពុងទទួលរងភាពអយុត្តិធម៌យ៉ាងខ្លាំង ពីការផ្ដល់ដីសម្បទានរបស់រដ្ឋាភិបាលដល់ក្រុមហ៊ុនស្ករអំពៅនេះ។ លោកសន្យានឹងបន្តការជួយផ្នែកផ្លូវច្បាប់ ដល់ពលរដ្ឋរងគ្រោះទាំងអស់ ក្នុងការទាមទារយុត្តិធម៌ពីសំណាក់ក្រុមហ៊ុនមកវិញ។ចំណែក តំណាងពលរដ្ឋរងគ្រោះខេត្តកោះកុង លោក តេង កៅ ឲ្យដឹងថា ពលរដ្ឋក្នុងសហគមន៍របស់លោក កំពុងជួបទុកលំបាកយ៉ាងខ្លាំង ក្រោយពីក្រុមហ៊ុនស្ករអំពៅ (KSL) បានរំលោភយកដីដោយមិនមានសំណង។ លោកបន្តថា ពលរដ្ឋខ្វះខាតដីបង្កបង្កើនផលសម្រាប់ចិញ្ចឹមជីវិត ហើយបានបង្ខំចិត្តធ្វើចំណាកស្រុក ដោយសារខ្វះដី។ដូចគ្នានេះដែរតំណាងពលរដ្ឋរងគ្រោះខេត្តឧត្តរមានជ័យ អ្នកស្រី ហួយ មៃ ថ្លែងថា ក្រុមហ៊ុនបានរំលោភយកដីពីពលរដ្ឋដោយគ្មានសំណង ដោយគ្មានដំណោះស្រាយអ្វីទាំងអស់ ស្របពេលដែលពលរដ្ឋបានស្នើសុំអន្តរាគមន៍ពីអាជ្ញាធរពាក់ព័ន្ធជា ច្រើនលើកច្រើនសារ។ អ្នកស្រីបន្តថា ពលរដ្ឋកំពុងរស់នៅដោយភាពលំបាកវេទនា ខ្វះដីបង្កបង្កើនផល ខ្វះជម្រក ដូចនេះស្នើដល់រដ្ឋាភិបាលកម្ពុជាជួយដោះស្រាយបញ្ហាដែលពលរដ្ឋកំពុងតែ ប្រឈម។ប្រធានអង្គការសមធម៌លោក អៀង វុទ្ធី មានប្រសាសន៍ថាដីសម្បទានទាំងនោះត្រូវបានប្រគល់ទៅឲ្យក្រុមហ៊ុន ខុន ខេន ស៊ូហ្គើរ ដែលជាក្រុមហ៊ុនធំមួយមកពីប្រទេសថៃមកវិនិយោគក្នុងប្រទេសកម្ពុជា ក្រោមឈ្មោះក្រុមហ៊ុន៣ផ្សេងគ្នាគឺក្រុមហ៊ុន អង្គរស៊ូហ្កា (Angkor Sugar Company) ក្រុមហ៊ុន ទន្លេស៊ូហ្កាខេន (Tonle Sugar Cane Company) និងក្រុមហ៊ុន ខេន អែន ស៊ូហ្ហា វ៉ាឡេ (Cane and Sugar Valley Company) ដើម្បីទទួលបានទំហំដីសម្បទានច្រើន ហើយក្រុមហ៊ុនទាំងបីមានលោក លី យ៉ុងផាត់ ជាដៃគូនៅស្រុកខ្មែរ ៕ទំនាស់ដីធ្លីរវាង ក្រុមហ៊ុន ជាមួយប្រជាពលរដ្ឋកើតមានឡើងនៅឆ្នាំ២០០៦ នៅស្រុកស្រែអំបិល ខេត្តកោះកុង លើផ្ទៃដី១៣៦៥ហិកតា និងនៅឆ្នាំ២០០៧ក្នុងខេត្តឧត្តរមានជ័យលើផ្ទៃដី ៤៥០០ហិកតា៕ដកស្រង់ចេញពី វិទ្យុសម្លេងប្រជាធិបតេយ្យ ចេញផ្សាយថ្ងៃទី១៣ ខែសីហា ឆ្នាំ ២០១៤ ។