-
អតីតអ្នកបឹងកក់តវ៉ាមុខរដ្ឋសភាដាក់ញត្តិទាមទារសំណងបន្ថែម
- Issue Date 14-Aug-2014
អតីតអ្នកសហគមន៍បឹងកក់ប្រមាណ៥០នាក់ នៅព្រឹកថ្ងៃព្រហស្បតិ៍នេះ ប្រមូលផ្ដុំគ្នានៅមុខរដ្ឋសភាដើម្បីដាក់ញត្តិទាមទារឲ្យ តំណាងរាស្ត្រអន្តរាគមន៍ ទៅរដ្ឋាភិបាលឲ្យផ្តល់សំណងបន្ថែម បន្ទាប់ពីបណ្តេញចេញពីបឹងកក់។អតីតសហគមន៍បឹងកក់ កញ្ញា អ៊ឹម ស្រីទូច ឲ្យដឹងថា ពួកគាត់កំពុងជួបការលំបាក ដោយសារទទួលបានសំណងតិចតួច « កាលពីរដ្ឋាភិបាលអភិវឌ្ឍនៅតំបន់បឹងកក់ គឺគាត់បណ្តេញពួកខ្ញុំដោយបង្ខំ ហើយដោយឲ្យសំណងបន្តិចបន្តួច ធ្វើបាបពួកខ្ញុំគ្រប់បែបយ៉ាង គំរាមគ្រប់រូបភាព បូមខ្សាច់បន្លិចផ្ទះពួកខ្ញុំ។ ពួកខ្ញុំចេញទៅវេទនា រស់នៅបាត់បង់មុខរបរ បាត់បង់ទីជម្រក»។មន្ត្រីរដ្ឋសភាបានអនុញ្ញាតឲ្យតំណាងសហគមន៍ទាំងនោះចំនួន៦នាក់ ចូលពិភាក្សាលើករណីនេះ តែពុំទាន់ទទួលបានលទ្ធផលយ៉ាងណានៅឡើយទេ។តំណាងម្នាក់ទៀត អ្នកស្រី ស៊ា ណារ៉េត ព្រមានថា ពួកគាត់ទុករយៈពេលឲ្យរដ្ឋសភា ចំនួន២សប្តាហ៍ ដើម្បីជួយអន្តរាគមន៍ទៅរដ្ឋាភិបាលឲ្យពន្លឿនដោះស្រាយបញ្ហាជូន ពួកគាត់។ អ្នកស្រីថា បើ២សប្តាហ៍ មិនមានលទ្ធផល គឺពួកគាត់និងប្រមូលផ្តុំនៅមុខរដ្ឋសភាជាថ្មីទៀត «បើមិនធ្វើទេ ខ្ញុំនឹងមកទៀត នឹងមានជាពងមាន់ ពងទា យកមកគប់នៅសភាតែម្តង»។អ្នកគ្រប់គ្រងបច្ចេកទេសឃ្លាំមើលការរំលោភសិទ្ធិមនុស្ស អង្គការលីកាដូ លោក អំ សំអាត យល់ថា រដ្ឋសភាត្រូវជួយដោះស្រាយបញ្ហាជូនអតីតប្រជាសហគមន៍បឹងកក់ឲ្យបាន ឆាប់ បើពុំដូច្នេះ បញ្ហាប្រឈមនៅតែបន្តកើតមាន ដោយសារពួកគេមិនអស់ចិត្តនិងដំណោះស្រាយកន្លងមក «យើងបារម្ភ ខ្លាចលនៅពេលណាមួយដែលប្រើប្រាស់អំពើហិង្សា ទៅលើពួកគាត់ទៀត ប៉ះពាល់ពីការអភិវឌ្ឍ ហើយរងទុក្ខដោយសារការទាមទារតវ៉ា ដើម្បីសិទ្ធិមានលំនៅដ្ឋាន មានដីធ្លី និងសិទ្ធិរស់នៅសមរម្យជាប្រជាពលរដ្ឋ»។ក្រុមអ្នកតវ៉ាឲ្យដឹងទៀតថា ពួកគាត់ធ្លាប់ទទួលបានសំណងពីមុនខ្លះ ដោយអ្នកខ្លះទទួលបានប្រាក់សំណង៥០០ដុល្លារ អ្នកខ្លះទៀតទទួលបាន៨០០០ដុល្លារ និង២លានរៀល ហើយអ្នកខ្លះទៀតព្រមទទួលយកផ្ទះល្វែងនៅបុរីសន្តិភាព២ នៅខណ្ឌពោធិ៍សែនជ័យ ទំហំ ៤ម៉ែត្រគុណ១២ម៉ែត្រ និងទឹកប្រាក់២លានរៀល ។ទោះបីជាយ៉ាងណា ពួកគាត់ថា សំណងទាំងនោះមិនស្មើនឹងផលប៉ះពាល់ពួកគាត់ប្រឈមទេ ហើយកាលដែលពួកគាត់ទទួលយកសំណង គឺទាំងបង្ខំ ដោយកាលណោះ ខាងក្រុមហ៊ុនបានបូមខ្សាច់ ធ្វើឲ្យលិចផ្ទះរបស់ពួកគាត់។របាយការណ៍នានារបស់ក្រុមអង្គការសង្គមស៊ីវិល ឲ្យដឹងថា ការដែលរដ្ឋាភិបាលជួលបឹងកក់ឲ្យក្រុមហ៊ុនស៊ូកាគូអ៊ីន របស់លោក ឡាវ ម៉េងឃិន សមាជិកព្រឹទ្ធសភា មកពីគណបក្សប្រជាជនកម្ពុជា ដើម្បីអភិវឌ្ឍន៍រយៈពេល៩៩ឆ្នាំនេះ ធ្វើឲ្យប៉ះពាល់ដល់ប្រជាពលរដ្ឋនៅតំបន់នោះជាង៤០០០គ្រួសារ ក្នុងនោះជិត១០០០គ្រួសារ មិនព្រមចាកចេញ និងជាង៣០០០គ្រួសារត្រូវអាជ្ញាធរាជធានីភ្នំពេញបណ្តេញចេញទាំងបង្ខំ ដែលធ្វើឲ្យជម្លោះបន្តអូសបន្លាយរហូតបច្ចុប្បន្ននេះ៕ដកស្រង់ចេញពី វិទ្យុសម្លេងប្រជាធិបតេយ្យ ចេញផ្សាយថ្ងៃទី១៤ ខែសីហា ឆ្នាំ ២០១៤ ។