-
អ្នកមានជម្លោះដីធ្លីនៅព្រំប្រទល់ខេត្តបន្ទាយមានជ័យ និងបាត់ដំបង មករកអន្តរាគមន៍ពីនាយករដ្ឋមន្ត្រី
- Issue Date 25-Aug-2014
អ្នកមានជម្លោះដីធ្លីប្រមាណ២០០នាក់ ឋិតនៅព្រំប្រទល់ខេត្តបន្ទាយមានជ័យ និងខេត្តបាត់ដំបង នៅថ្ងៃចន្ទនេះ ឡើងមកតវ៉ានៅរាជធានីភ្នំពេញ ដើម្បីរកអន្តរាគមន៍ពីលោក នាយករដ្ឋមន្ត្រី ហ៊ុន សែន បន្ទាប់ពីការពិភាក្សានៅសាលាខេត្តបាត់ដំបងកាលពីព្រឹកមិញមិន ទទួលបានលទ្ធផល។តំណាងប្រជាពលរដ្ឋម្នាក់ លោក ក្រុម សំអយ មកពីភូមិប្រាសាទ ឃុំតាគង់ ស្រុកម៉ាឡៃ ខេត្តបន្ទាយមានជ័យ ប្រាប់VODថា កាលពីព្រឹកមិញនេះ ប្រជាពលរដ្ឋមកពី៣ភូមិបានប្រមូលផ្តុំគ្នានៅក្រោមដើមពោធិក្នុង វត្តដំរីស រង់ចាំលទ្ធផលនៃការចូលចរចាអ្នកតំណាង៦នាក់នៅសាលាខេត្តបាត់ដំបង ។លោកបន្តថា ការចរចានេះមិនទទួលបានលទ្ធផលទេ ដោយលោកអភិបាលរងខេត្តបាត់ដំបងលោក ងួន រតនៈ ថាមិនមែនជាសមត្ថកិច្ចរបស់ខ្លួន ពីព្រោះមានពាក់ព័ន្ធនឹងដីកាសម្រេចរបស់តុលាការ ដូចនេះប្រជាពលរដ្ឋបានសម្រេចគ្នាឡើងមកភ្នំពេញ ដើម្បីស្វែងរកដំណោះស្រាយពីលោកនាយករដ្ឋមន្ត្រី ហ៊ុន សែន ។លោក ក្រុម សំអយ ឲ្យដឹងថា នៅក្នុងឆ្នាំ២០០៦ លោក សន ថន លោក ស៊ុន ប៊ុនធឿន និងលោក ប៉ែន កិ ដែលជាអ្នកពាក់ព័ន្ធនឹងជម្លោះនេះ បានយកគ្រឿងចក្រមកឈូសឆាយ និងជីកប្រឡាយជុំវិញដីជម្លោះនោះ ហេតុដូចនេះប្រជាពលរដ្ឋបានធ្វើការតវ៉ាទៅអភិបាលខេត្ត ដើម្បីស្វែងរកដំណោះស្រាយ។លោកបន្តថា អភិបាលខេត្តបន្ទាយមានជ័យលោក អន ស៊ុំ និងអភិបាលខេត្តបាត់ដំបងនាពេលនោះគឺលោក ប្រាជ្ញ ច័ន្ទ បានសម្រេចដកហូតគ្រឿងចក្រ និងដកហូតដីនោះជាសម្បត្តិរដ្ឋ ដោយមិនបានបញ្ជាក់ថាប្រជាពលរដ្ឋមិនអាចអាស្រ័យនៅលើដីនោះបានទេ។លោក ក្រុម សំអយ បន្តថាជម្លោះនេះបានស្ងប់ស្ងាត់រយៈពេលជាច្រើនឆ្នាំទើបតែក្នុងឆ្នាំ ២០១២ សាលាដំបូងបានសម្រេចចេញដីការក្សាការពារលើដីជម្លោះនោះ ដោយមិនអនុញ្ញាតិឲ្យប្រជាពលរដ្ឋអាស្រ័យផលលើដីទៀតឡើយ ដោយប្រគល់សិទិ្ធកាន់កាប់ទៅឲ្យលោក សន ថន លោក ស៊ុន ប៊ុនធឿន និងលោក ប៉ែន កិ ទៅវិញ។លោកបន្ថែមថា បុគ្គលទាំងបីនេះ ធ្លាប់បានគំរាមគំហែងប្រជាពលរដ្ឋ និងបានចាប់កូនប្រុសរបស់អ្នកតំណាងជម្លោះដីម្នាក់ដាក់ពន្ធនាគាររយៈ ពេល៣ខែ នៅពេលប្រជាពលរដ្ឋព្រមទាំងកូនប្រុសអ្នកតំណាងជម្លោះដី នាំគ្នារារាំងមិនឲ្យគ្រឿងចក្រឈូសឆាយលើដីជម្លោះ។អនុប្រធានភូមិប្រាសាទរ៉ាង លោក ប៊ុន ថន អះអាងថា ប្រជាពលរដ្ឋបានរស់នៅ និងអាស្រ័យផលនៅដីជម្លោះនោះតាំងពីឆ្នាំ២០០៤មកម្ល៉េះ និងមានប័ណ្ណកាន់កាប់បញ្ជាក់ពីឃុំផងដែរ។ លោកបន្តថា ប្រជាពលរដ្ឋបានដាក់ញ្ញត្តិជាបន្តបន្ទាប់ទៅតាមស្ថាប័ននានា ដើម្បីរកដំណោះស្រាយ ប៉ុន្តែមិនទទួលលទ្ធផល ហើយនៅថ្ងៃទី៨ ខែសីហា ឆ្នា២០១៤ តំណាងប្រជាពលរដ្ឋ២រូប បានទៅបំភ្លឺនៅសាលាឧទ្ធរណ៍ ពីករណីពាក់ព័ន្ធនឹងការដកហួតនូវដីការក្សាការពារ ហើយក៏មិនទទួលលទ្ធផលដែរ ដោយចៅក្រមមិនបានសុំការបំភ្លឺ និងសាកសួរប្រជាពលរដ្ឋពីបញ្ហានេះ។មន្ត្រីសម្របសម្រួលនៅសមាគមការពារសិទ្ធិមនុស្សអាដហុក ប្រចាំខេត្តបាត់ដំបង លោក យិន ម៉េងលី មានប្រសាសន៍ថា តុលាការកំពុងធ្វើខុសនីតិវិធីច្បាប់ ហើយអាជ្ញាខេត្តមិនយកចិត្តទុកដាក់ និងធ្វេសប្រហែសពីបញ្ហានេះ ដោយសារតែដីជម្លោះនេះជាដីគម្របព្រៃឈើដែលជាដីសាធារណៈ ដែលមិនអាចសុំដីការក្សាការពារលើដីសាធារណៈរបស់រដ្ឋបានទេ ហើយដីនោះមិនទាន់អនុប្រយោគទៅជាដីឯកជនរបស់រដ្ឋនៅឡើយទេ ដូចនេះមិនអាចប្រគល់សិទិ្ធកាន់កាប់ឲ្យឯកជនណាមួយឡើយ។លោកបន្តថា កាលពីអភិបាលខេត្តទាំងពីរបានដកហូតដីនោះជាសម្បតិ្តរដ្ឋ គឺលោកមិនបានដេញប្រជាពលរដ្ឋចេញទេ ដោយឲ្យប្រជាពលរដ្ឋរស់នៅ និងអាស្រ័យផលនោះប្រមាណជា១០ឆ្នាំហើយ ហេតុនេះអ្នកដែលមានសិទិ្ធកាន់កាប់លើដីជម្លោះនោះគួរតែប្រជាពលរដ្ឋ ។VOD មិនអាចសុំការអធិប្បាយជុំវិញបញ្ហានេះពីអនុអភិបាលរងខេត្តបាត់ដំបងលោក ងួន រតនៈ បានទេដោយលោកថាជាប់រវល់ប្រជុំ។ប្រជាពលរដ្ឋឲ្យដឹងថា ជម្លោះដីបានប៉ះពាល់ប្រជាពលរដ្ឋចំនួន៣០០គ្រួសារនៅព្រំប្រទល់ខេត្ត បាត់ដំបង និងបន្ទាយមានជ័យ ដែលស្ថិតនៅភូមិប្រាសាទរ៉ាង ឃុំតាគង់ ស្រុកម៉ាឡៃ ខេត្តបន្ទាយមានជ័យ និងនៅភូមិក្រពើសែសិប ឃុំបឹង២ ស្រុកបវេល ខេត្តបាត់ដំបង លើទំហំដី៦១២ហិកតា។ ចំណែកអ្នកភូមិអូរវល្លិព្រេង ឃុំខ្នាចរមាស ស្រុកបវេល ខេត្តបាត់ដំបង កើតមានជម្លោះតាំងពីឆ្នាំ១៩៩៩ ដែលកន្លងមកប្រជាពលរដ្ឋរងការចោទប្រកាន់ពីសិទិ្ធកាន់កាប់ខុសច្បាប់ និងជាប់ពន្ធនាគារ។ដកស្រង់ចេញពី វិទ្យុសម្លេងប្រជាធិបតេយ្យ ចុះថ្ងៃទី ២៥ ខែសីហា ឆ្នាំ២០១៤។