-
ជនជាតិដើមភាគតិចមានបញ្ហាដីធ្លីតវ៉ាមុខមន្ទីរដែនដីខេត្តព្រះវិហារ
- Issue Date 27-Nov-2014
ប្រជាពលរដ្ឋ និងមន្ត្រីអង្គការសិទ្ធិមនុស្សក្នុងខេត្តព្រះវិហារឲ្យដឹងថា ជនជាតិដើមភាគតិចមានបញ្ហាដីធ្លីចំនួន២៨គ្រួសានៅឃុំព្រះមេ ស្រុកត្បែងមានជ័យ បាននាំគ្នាមកតវ៉ានៅមុខមន្ទីរដែនដីនគរូបនីយកម្ម និងសំណង់ខេត្ត នៅព្រឹកថ្ងៃពុធនេះ ដើម្បីទាមទារឲ្យមន្ទីរបង្ហាញលេខក្បាលដីរបស់ពួកគាត់ និងលេខវិញ្ញាបនបត្របញ្ជាក់អចលនវត្តុ ។ពលរដ្ឋជាជនជាតិដើមភាគតិចម្នាក់អ្នកស្រី រឿង ខាត់ បានឲ្យ VOD ដឹងនៅព្រឹកថ្ងៃពុធនេះថា ពួកគាត់នាំគ្នាមកតវ៉ាមន្ទីរដែនដីខេត្ត ដោយអ្នកស្រីអះអាងថា អ្នកវាស់វែងដីឯកជនម្នាក់បានវាស់ដីជាន់ទៅលើដីសមូហភាពរបស់ពួកយើង ហើយដីនោះក៏ប៉ះពាល់ជាក្រុមហ៊ុនរុយហ្វេង និងក្រុមហ៊ុនឡានហ្វេងដែរ ។ អ្នកស្រីបន្តថា ពួកគាត់បានមកតវ៉ាមុខក្រសួងដែនដី ចំនួនពីរថ្ងៃហើយ ក្រោយមកអាជ្ញាធរបានឲ្យពួកគាត់ដាក់ពាក្យស្នើសុំ ដើម្បីងាយស្រួលពិនិត្យមើលឲ្យដឹងថា ក្បាលដីរបស់ពួកគាត់មានប៉ុន្មាន ហើយនៅតំបន់ណាខ្លះ ។អ្នកស្រី រឿង ខាត់ អំពាវនាវ ឲ្យអាជ្ញាធរជួយដោះស្រាយឲ្យពួកគាត់ ហើយបើអាជ្ញាធរមិនដោះស្រាយទេពួកគាត់នឹងនាំគ្នាមកតវ៉ាបន្តទៀត ។អ្នកសម្របសម្រួលអង្គការអាដហុកប្រចាំខេត្តព្រះវិហារ លោក ឡោ ចាន់ មានប្រសាសន៍ថា ប្រជាសហគមន៍ឃុំព្រះមេ នាំមកតវ៉ាដោយសារតែខាងមន្ទីរបានចេញប័ណ្ណកម្មសិទ្ធិទៅឲ្យអាជ្ញាធរ ស្រុក និងអ្នកមានអំណាចមួយចំនួននៅក្នុងតំបន់របស់គាត់ ធ្វើឲ្យដីរបស់ពួកគាត់ជាន់ជាមួយដីដែលមានប្លង់ស្រាប់ ។ប្រធានមន្ទីរខេត្តព្រះវិហារ លោក គង់ សោភ័ណ មានប្រសាសន៍ប្រាប់ VOD យ៉ាងខ្លី ដោយបដិសេធថាមិនមានក្រុមប្រជាពលរដ្ឋពីឃុំខាងលើមកតវ៉ានៅមុខ មន្ទីរទេ ។ លោកថា មានតែពលរដ្ឋម្នាក់ប៉ុណ្ណោះមកសុំមើលលេខក្បាលដី ហើយលោកមិនបានអនុញ្ញាតឲ្យមើលនោះទេ ដោយតម្រូវឲ្យដាក់ពាក្យស្នើសុំជាផ្លូវការជាមុនសិន ។ដកស្រង់ចេញពី វិទ្យុសម្លេងប្រជាធិបតេយ្យ(VOD) ចេញផ្សាយថ្ងៃទី២៦ ខែវិច្ឆិកា ឆ្នាំ២០១៤ ។