-
ពលរដ្ឋ៣១គ្រួសារនៅក្រចេះអះអាងថាស៊ូស្លាប់មិនចាកចេញពីដីមានជម្លោះ
- Issue Date 27-Jan-2015
អាជ្ញាធរខេត្តក្រចេះ ដោះស្រាយជម្លោះដីធ្លីរវាងពលរដ្ឋពីរក្រុម ដោយឲ្យពលរដ្ឋមួយក្រុមចាកចេញពីដីមានជម្លោះ។ ប៉ុន្តែក្រុមពលរដ្ឋដែលអាជ្ញាធរគ្រោងបញ្ជូនចេញ បដិសេធដំណោះស្រាយនេះ និងថាស៊ូស្លាប់លើដីរបស់ខ្លួន។ប្រតិកម្មភ្លាមៗនឹងដំណោះស្រាយរបស់អាជ្ញាធរខេត្តក្រចេះ ក្រុមពលរដ្ឋ ៣១គ្រួសារ ដែលអាជ្ញាធរគ្រោងបញ្ជូនពួកគេចេញទៅទីតាំងថ្មី មិនព្រមទទួលយកដំណោះស្រាយនេះទេ។ ទោះមានការបដិសេធយ៉ាងនេះក៏ដោយ អាជ្ញាធរខេត្តអះអាងថា ពួកគេគ្មានជម្រើសអ្វីដែលល្អជាងនេះឡើយ។តំណាងពលរដ្ឋ ៣១គ្រួសារ លោកស្រី យស សាអែម ឲ្យដឹងថា ក្រុមប្រជាពលរដ្ឋទាំងអស់មិនព្រមទទួលយកដំណោះស្រាយរបស់អាជ្ញាធរ ខេត្តក្រចេះ ទេ។ លោកស្រី យស សាអែម បន្តទៀតថា ក្រុមពលរដ្ឋ ៧២គ្រួសារចូលមករស់នៅក្រោយក្រុមលោកស្រី ប៉ុន្តែក្រុមការងារខេត្តបែរជាសម្រេចឲ្យក្រុមលោកស្រីចាកចេញទៅ វិញ៖ «ពួកខ្ញុំមិនមែនជាមនុស្សទេអី បានជាយកក្រុម ៧២គ្រួសារដាក់ពីលើ ហើយពេលនេះបណ្ដេញពួកខ្ញុំចេញទៀត»។ទំនាស់ដីធ្លីរវាងពលរដ្ឋ ៣១គ្រួសារ និងពលរដ្ឋ ៧២គ្រួសារ នៅភូមិប្រឡាយត្រៀក ឃុំដីរីផុង ស្រុកឆ្លូង ខេត្តក្រចេះ លើដីមានជម្លោះទំហំ ១៦៨ហិកតារ។ ក្រុមពលរដ្ឋ ៣១គ្រួសារអះអាងថា ក្រុមពលរដ្ឋ ៧២គ្រួសារដែលមករស់នៅថ្មីលើដីមានជម្លោះ គឺតាមការចាត់តាំងរបស់ក្រុមអាជ្ញាធរខេត្តក្រចេះ។ ជារឿយៗ អ្នកទាំងពីរក្រុមនេះតែងមានជម្លោះនឹងគ្នា។អភិបាលរងខេត្តក្រចេះ ទទួលបន្ទុកដោះស្រាយដីធ្លីស្រុកឆ្លូង លោក ខាន់ ចំណាន មានប្រសាសន៍ថា ទំហំដីដែលពលរដ្ឋកំពុងមានជម្លោះ មិនគ្រប់គ្រាន់ឲ្យពលរដ្ឋទាំងពីរក្រុមរស់នៅបានទេ ដូច្នេះមានតែបញ្ជូនពលរដ្ឋក្រុម ៣១គ្រួសារចេញទៅទីតាំងថ្មី ព្រោះពួកគេមករស់នៅលើដីមានជម្លោះមិនមានការអនុញ្ញាតពីអាជ្ញាធរ។ លោកថា នេះជាជម្រើសមួយល្អ ដែលមិនធ្វើឲ្យពលរដ្ឋទាំងពីរក្រុមមានជម្លោះគ្នាទៀត៖ «ការពិតដែលក្រុមយើងខ្ញុំចុះសិក្សា គឺមិនមានផលប៉ះពាល់ទេ បានជាយើងលើកទៅ។ យើងមិនចង់មានបញ្ហាទេ»។លោកអភិបាលរងខេត្តបន្តទៀតថា នៅថ្ងៃទី២៨ ខែមករា ក្រុមការងារចម្រុះខេត្ត នឹងចុះទៅចង្អុលបង្ហាញប្រាប់ដល់ពលរដ្ឋ ៧២គ្រួសារ ពីទីតាំងដីរបស់ពួកគេ។ ប៉ុន្តែចំពោះករណីពលរដ្ឋ ៣១គ្រួសារដែលជម្លៀសចេញពីដីមានជម្លោះ លោកមិនទាន់ឲ្យដឹងថាត្រូវធ្វើនៅពេលណានៅឡើយទេ។មន្ត្រីសិទ្ធិមនុស្សនៃសមាគមការពារសិទ្ធិមនុស្សអាដហុក (Adhoc) លោក ហេង ភារៈ ទាមទារឲ្យអាជ្ញាធរខេត្តផ្តល់ដំណោះស្រាយណាមួយដែលពលរដ្ឋទាំងពីរ ភាគីព្រមទទួលយក និងមិនមែនជាការបណ្ដេញចេញ។ បើតាមមន្ត្រីសិទ្ធិមនុស្សរូបនេះ ពលរដ្ឋ ៣១គ្រួសារគួរទទួលបានសិទ្ធិរស់នៅលើដីសព្វថ្ងៃ៖ «ក្នុងនាមជាសង្គមស៊ីវិល ស្នើឲ្យអាជ្ញាធរដោះស្រាយដោយសន្តិវិធី កុំឲ្យមានការប្រើប្រាស់កម្លាំងប៉ូលិសទាហាន»។កាលពីថ្ងៃទី១៩ ដល់ថ្ងៃទី២១ ខែមករា គណៈកម្មការទី១នៃរដ្ឋសភា ទទួលបន្ទុកសិទ្ធិមនុស្ស និងពាក្យបណ្ដឹង ចុះទៅអង្កេតករណីជម្លោះដីធ្លីខេត្តក្រចេះ និងស្នើឲ្យអាជ្ញាធរខេត្តផ្តល់ដំណោះស្រាយណាដែលមិនបង្ខំ ឬប្រើវិធានការរដ្ឋបាលឡើយ។ ពលរដ្ឋ ៣១គ្រួសារ ពួកគេមានផ្ទះ មានដំណាំពេញដីទៅហើយ ដូច្នេះពួកគេមិនចេញទៅណាទេ៕ដកស្រង់ចេញពី វិទ្យុអាស៊ីសេរី (RFA) ចេញផ្សាយថ្ងៃទី២៧ ខែមករា ឆ្នាំ២០១៥ ។