-
ពលរដ្ឋខេត្តកំពង់ឆ្នាំងប្រតិកម្មនឹងសំណងប៉ះពាល់ពីគម្រោងសង់ប្រព័ន្ធធារាសាស្ត្រអាចាង
- Issue Date 29-Jan-2015
តំណាងសហគមន៍ និងអ្នកភូមិនៃឃុំពេជ្រចង្វា ស្រុកបរិបូរណ៍ ខេត្តកំពង់ឆ្នាំង ជំរុញឲ្យរដ្ឋាភិបាល និងអាជ្ញាធរពាក់ព័ន្ធ បិទផ្សាយជាសាធារណៈនូវតម្លៃដីប៉ះពាល់ពីគម្រោងស្ថាបនាប្រព័ន្ធ ធារាសាស្ត្រអាចាង។ ការជំរុញនេះ បន្ទាប់ពីក្រុមការងារអន្តរក្រសួង ប្រកាសអំពីសំណងផលប៉ះពាល់ និងមានអ្នកភូមិប្រមាណ ៨០នាក់ លើកគ្នាទៅសួររឿងនេះបន្ថែមទៀត។តំណាងសហគមន៍ និងក្រុមអ្នកភូមិ បានជួបសួរនាំក្រុមការងារអន្តរក្រសួងដែលចុះវាយតម្លៃផលប៉ះពាល់ នៃគម្រោងធ្វើប្រព័ន្ធធារាសាស្ត្រនេះ និងសម្ដែងការមិនពេញចិត្តចំពោះសំណងជាប្រាក់ ៥០សេនដុល្លារ ស្មើនឹងប្រហែល ២ពាន់រៀលសម្រាប់ដីស្រែ ១ម៉ែត្រការ៉េ។ ក្រុមពលរដ្ឋអះអាងថា ត្បិតដីដែលប៉ះពាល់ផ្ដល់សំណងខុសគ្នាទៅតាមសណ្ឋានដី តែតម្លៃដីក្នុង ១ម៉ែត្រការ៉េគួរលើស ៥០សេនដុល្លារ។ប្រជាពលរដ្ឋម្នាក់រស់នៅឃុំពេជ្រចង្វា ដែលថ្លែងក្នុងលក្ខខណ្ឌសុំមិនបញ្ចេញឈ្មោះ ឲ្យដឹងថា រូបលោក និងអ្នកភូមិជាច្រើននាក់ទៀតមិនអាចទទួលយកសំណងដែលផ្ដល់ដោយ រដ្ឋាភិបាល ឬអន្តរក្រសួងឡើយ ព្រោះតម្លៃដីដែលប្រកាសកាលពីថ្ងៃទី២៦ ខែមករា ឆ្នាំ២០១៥ នៅវត្តត្រពាំងប្រាសាទ ឋិតនៅឃុំពេជ្រចង្វា នោះ គឺថោកពេកសម្រាប់ដីរបស់អ្នកភូមិដែលខ្លះកំពុងបង្កបង្កើនផល។ លោកថា ពលរដ្ឋមកពីភូមិផ្សេងៗនៃឃុំពេជ្រចង្វា នាំគ្នាទៅសួរនាំក្រុមការងារអន្តរក្រសួងនៅវត្តត្រពាំងប្រាសាទ រឿងផ្ដល់សំណងកាលពីព្រឹកថ្ងៃទី២៨ ខែមករា ប៉ុន្តែគ្មានលទ្ធផលអ្វីឡើយ៖ «ទៅក្នុងគោលបំណងទាមទាររឿងតម្លៃ ដោយសារមិនពេញចិត្ដសម្រាប់រូបគេ និងរូបខ្ញុំអ៊ីចឹងណា! គេឆ្លើយថា គេមិនអាចដំឡើងតម្លៃបានទៀតទេ ព្រោះតម្លៃនេះខាងថ្នាក់លើមកកំណត់ឲ្យបណ្ដឹងខាងក្រុមការងារ និយាយ»។ប្រភពព័ត៌មានពីសហគមន៍បញ្ជាក់ថា ក្រុមការងារអន្តរក្រសួងបានកំណត់តម្លៃ និងប្រកាសថា តម្លៃដីលំនៅឋានជាប់ផ្លូវក្រួសក្រហមតម្លៃ ៣ដុល្លារក្នុង ១ម៉ែត្រការ៉េ ដីស្រែជាប់ផ្លូវក្រួសក្រហមតម្លៃ ១ដុល្លារ ដីភូមិ ឬដីលំនៅឋានតម្លៃ ១ដុល្លារ ៥០សេន ដីស្រែពុំមានផ្លូវធំចេញចូលតម្លៃ ៥០សេន និងដីព្រៃមិនទាន់កាប់ឆ្ការរួចតម្លៃក្នុង ១ម៉ែត្រការ៉េ ២០សេន ហើយតម្លៃនេះមិនអាចកែប្រែបានឡើយ។អភិបាលនៃគណៈអភិបាលស្រុកបរិបូរណ៍ លោក ឃួន សៅរុំ ថ្លែងបញ្ជាក់ថា អាជ្ញាធរគ្រាន់តែជាអ្នកសម្របសម្រួល ចំណែកការកំណត់តម្លៃដីដែលប៉ះពាល់នោះ គឺខាងរដ្ឋាភិបាល ឬអន្តរក្រសួងជាអ្នកកំណត់។ យ៉ាងណាលោកថា តម្លៃនេះសមរម្យហើយសម្រាប់ដីនៅតំបន់នោះ ហើយមានពលរដ្ឋភាគតិចប៉ុណ្ណោះដែលប្រតិកម្ម ឬមិនពេញចិត្តចំពោះសំណងដែលគ្រោងនឹងផ្ដល់នេះ៖ «ខ្ញុំបានចូល រួចដែរតើ (កាលពីប្រកាសតម្លៃដីរបស់អន្តរក្រសួង) និយាយរួមមានតែពីរ ឬបីនាក់ទេដែលគាត់តវ៉ាថា តម្លៃថោក ហើយក្រុមការងារក៏បានពន្យល់ហេតុផលហ្នឹងទៅវិញទៅណា»។វិទ្យុអាស៊ីសេរី មិនអាចទាក់ទងអភិបាលរងខេត្តកំពង់ឆ្នាំង និងជាអ្នកទទួលបន្ទុកសម្របសម្រួលលើការងារនេះ គឺលោក អ៊ុន សំអុល និងមន្ត្រីក្រសួងធនធានទឹក ផ្សេងទៀត ដើម្បីបំភ្លឺតបបញ្ហានេះទេ។រដ្ឋាភិបាលមានគម្រោងអភិវឌ្ឍប្រព័ន្ធធារាសាស្ត្រស្ទឹងអាចាង នៅស្រុកបរិបូរណ៍ មានប្រឡាយមេមួយខ្សែប្រវែងជិត ២០គីឡូម៉ែត្រ (១៩.៥០០ម៉ែត្រ) និងប្រឡាយរងចំនួន ១០ខ្សែ ដែលអាចស្រោចស្រពផ្ទៃដីកសិកម្មជាង ១ម៉ឺនហិកតារ (១០.៣០០ហិកតារ) នៅឃុំចំនួន១០ ក្នុងស្រុកបរិបូរណ៍ និងទឹកផុស ខេត្តកំពង់ឆ្នាំង។ អាជ្ញាធរមូលដ្ឋានបញ្ជាក់ថា ប្រឡាយមេនេះមានទំហំទទឹង ២៦ម៉ែត្រ និងជម្រៅប្រហែល ៥ម៉ែត្រ ស្ថាបនាដោយក្រុមហ៊ុនស៊ីណូហាយដ្រូ (Sinohydro) ក្នុងទំហំទឹកប្រាក់ជាង ៤៣លានដុល្លារ ជាជំនួយរបស់ប្រទេសចិន ហើយត្រូវប្រើរយៈពេលបីឆ្នាំ និងចាប់ផ្ដើមពីឆ្នាំ២០១៥ ដល់ឆ្នាំ២០១៨៕ដកស្រង់ចេញពី វិទ្យុអាស៊ីសេរី(RFA) ចេញផ្សាយថ្ងៃទី២៩ ខែមករា ឆ្នាំ២០១៥ ។