-
CCHRថា តុលាការផ្តន្ទាទោសមេធាវីនិងតំណាង រាស្ត្របក្សសង្គ្រោះជាតិជាការរំលោភសិទ្ធិពលរដ្ឋ
- Issue Date 17-Mar-2015
លោក ចាន់ ចេង តំណាងរាស្ត្រគណបក្សសង្គ្រោះជាតិ(ឆ្វេង) លោក ជូង ជូងី ជាមេធាវី(ស្តាំ) អង្គការឃ្លាំមើលការរំរលោភសិទ្ធិមនុស្ស ហៅការសម្រេចរបស់ចៅក្រមសាលាដំបូងខេត្តកណ្តាលដែលបានផ្តន្ទាទោសមេធាវី និងតំណាងរាស្ត្របក្សសង្គ្រោះជាតិ គឺជាការរំលោភកាតព្វកិច្ចរបស់ រាជរដ្ឋាភិបាលក្នុងការធានាសិទ្ធិ ទទួលបានការជុំនុំជម្រះក្តីដោយយុត្តិធម៌ ។ ការប្រតិកម្មនេះ ធ្វើឡើងបន្ទាប់ពីសាលាដំបូងខេត្តកណ្តាល កាលពីម្សិលមិញសម្រេចប្រកាសសាលក្រមផ្តន្ទាទោសមេធាវី និងតំណាងរាស្ត្ររបស់គណបក្សសង្គ្រោះជាតិពីររូបឲ្យជាប់ពន្ធនាគារ ម្នាក់២ឆ្នាំ និងពិន័យជាប្រាក់៣លានរៀលពីបទ ផ្តល់មធ្យោបាយឲ្យអ្នកទោសលួចរត់ ។ សេចក្តីប្រកាសព័ត៌មានបន្ទាន់របស់មជ្ឈមណ្ឌលសិទ្ធិមនុស្សកម្ពុជា ចុះថ្ងៃទី ១៣ មីនា បានរៀបរាប់ហេតុការណ៍ថា សាលក្រមដែលចេញដោយសាលាដំបូងខេត្តកណ្តាល គឺជាប់ពាក់ព័ន្ធទៅនឹង លោក ជូង ជូងី ដែលជួយលោក មាស ប៉េង ជាជំទប់ឃុំបន្ទាយដែក ស្រុកគៀនស្វាយ ខេត្តកណ្តាល ដែលពាក់ព័ន្ធនឹងជម្លោះដីធ្លីកាលពីខែកញ្ញាឆ្នាំ ២០១១ ។សេចក្តីប្រកាសបន្តថាលោក ជូង ជូងី អះអាងថាលោក មាស ប៉េង ត្រូវបានសម្រេចបញ្ជូនទៅពន្ធនាគារ ដោយចៅក្រុមស៊ើបសួរខកខានក្នុងការចេញដីការឃុំខ្លួន ។ ពេលនោះលោក ជូង ជូងី អះអាងថា ការឃុំខ្លួនលោក មាស ប៉េង គឺខុសច្បាប់ ហើយទាមទារឲ្យមានការដោះលែងវិញ និងចាកចេញពីពន្ធនាគារ ខណៈដែលនគរបាលនិងមន្ត្រីពន្ធនាគារពុំមានដីការឃុំខ្លួនមកបង្ហាញ ។ ជាលទ្ធផលលោក ជូង ជូងី ត្រូវបានចោទប្រកាន់ពីបទផ្តល់មធ្យោបាយលួចរត់ ដូចគ្នានឹងតំណាងរាស្ត្រគណបក្សសង្គ្រោះជាតិលោក ចាន់ ចេង ដែលបានយករថយន្តទៅដឹកលោក មាស ប៉េង ចេញពី ពន្ធនាគារ។ទាក់ទងនឹងសាលាក្រមនេះ លោកមេធាវី ជូង ជូងី ថ្លែងថា លោកមិនសុខចិត្តចំពោះសាលក្រមនោះទេ ហើយថានឹងប្តឹងទៅសាលាឧទ្ធរណ៍នៅសប្តាហ៍ក្រោយ ។ លោកថា « វា អត់ត្រូវ ពីព្រោះសម្រាប់ខ្ញុំជាមេធាវីដែលខ្ញុំការពារលោក មាស ប៉េង ក្នុងរឿងមុន ហើយត្រូវបានតុលាការចោទប្រកាន់នៅក្នុងរឿងនេះ គឺវាអត់មានបទល្មើសដូចការចោទប្រកាន់ទេ» ។សេចក្តីប្រកាសដដែល យល់ថា ការផ្តន្ទាទោសនេះ ជាការរំលោភកាតព្វកិច្ចរបស់រាជរដ្ឋាភិបាលក្នុងការធានាសិទ្ធិទទួលបាន ការជុំនុំជម្រះក្តីដោយយុត្តិធម៌ឲ្យស្របតាមរដ្ឋធម្មនុញ្ញ និងកតិកាសញ្ញាអន្តរជាតិស្តីពីសិទ្ធិពលរដ្ឋ និងសិទ្ធិនយោបាយដែលកម្ពុជាជារដ្ឋភាគី ៕ដកស្រង់ចេញពីវិទ្យុសម្លេងប្រជាធិតេយ្យ ចេញផ្សាយថ្ងៃទី១៤ ខែមីនា ឆ្នាំ២០១៥ ។