-
សហគមន៍បុរីកីឡាដែលបណ្តេញចេញគំរាមតវ៉ាទ្រង់ទ្រាយធំបើសំណងមិនយុត្តិធម៌
- Issue Date 23-Mar-2015
តំណាងសហគមន៍បុរីកីឡា ព្រមានពីការផ្ទុះការតវ៉ាតាមដឹងផ្លូវក្នុងររាជធានីភ្នំពេញម្តងទៀត ប្រឆាំងនឹងការបណ្តេញចេញ បើកិច្ចអន្តរាគមន៍ផ្តល់ដំណោះស្រាយរបស់អាជ្ញាធរគ្មានតម្លាភាពសម្រាប់អ្នកដែលបានបណ្តេញចេញ ។តំណាងអ្នកតវ៉ាអ្នកស្រី ឆាយ គឹមហ៊ន ឲ្យVODដឹង ពេលចូលរួមតវ៉ា ជាមួយសហគមន៍បឹងកក់មុខ ស្ថានទូតអាមេរិក នាព្រឹកថ្ងៃសៅរ៍ទី២១ខែមីនានេះថា សាលារាជធានីភ្នំពេញ បានបិទប្រកាសឈ្មោះអ្នកទទួលបានសំណងនៅសហគមន៍បុរីកីឡាដែលបានបណ្តេញចេញ កាលពីជាង៣ឆ្នាំមុន ។ប៉ុន្តែស្រី្តរូបនោះអះអាងថា ដំណោះស្រាយនោះ មន្ត្រីជំនាញ ហាក់ផ្តល់ប្រយោជន៍ច្រើនឲ្យទៅ ភាគីក្រុមហ៊ុនដែលបានបណ្តេញអ្នកភូមិចេញទៅវិញធ្វើឲ្យអ្នករងគ្រោះពិតប្រាកដ ភាគច្រើននៅតែមិនអាចទទួលយកបាន ។ អ្នកស្រី ឆាយ គឹមហ៊ន គំរាមថា បើអាជ្ញាធររួមទាំងភាគីពាក់ព័ន្ធ ដែលចូលរួមរកដំណោះស្រាយមិនពិចារណា ពីការជំទាស់របស់អ្នកភូមិទេ នោះអ្នករងគ្រោះនឹងបណ្តធ្វើយុទ្ធនាការ ជំរុញឲ្យស្ថាប័ន ពាក់ព័ន្ធដោះស្រាយករណីនេះ ។បើតាមពលរដ្ឋអះអាងថា អ្នកដែលបានបណ្តេញចេញនៅសហគមន៍បុរីកីឡា១៥៤គ្រួសារទទួលបានសំណង៣ប្រភេទផ្សេងគ្នា គឺប្រភេទី១ពលរដ្ឋ២៦គ្រួសារទទួលបានផ្ទះនៅបុរីកីឡា ៨៩គ្រួសារបានផ្ទះនៅសហគមន៍អណ្តូង ក្នុងសង្កាត់គោករកា ខណ្ឌព្រែកព្នៅ និង៣៩គ្រួសារទៀត ទទួលបាន ដំណោះស្រាយគោលនយោបាយជាចំនួនទឹកប្រាក់ ។ប៉ុន្តែអ្នកមានឈ្មោះទទួលយកផ្ទះនៅសហគមន៍អណ្តូង អះអាងថា ពួកគេនឹងមិនទទួលយកទេដោយផ្ទះនោះមានទំហំតែ៤គុណ៥ កម្ពស់តែ២,៥ម៉ែត្រ ប្រកស័ង្ស៊ី ដែលពួកគេយល់ថា មិនមែនជាផ្ទះ ជាប្រភេទបន្ទប់ជួល មានទំហំតូច ហើយក្តៅ ដែលអ្នកមានសមាជិកគ្រួសារច្រើនមិនអាចរស់នៅបាន ។យ៉ាងណាក៍ដោយ សាលារាជធានីភ្នំពេញ ទុកពេលឲ្យ៤០ថ្ងៃ ចាប់ពីថ្ងៃបិទប្រកាស សម្រាប់ឲ្យសហគមន៍ ដែលបានបណ្តេញចេញ កាលពីថ្ងៃទី៣ខែមករាឆ្នាំ២០១២នេះ បង្ហាញឯកសារផ្សេងៗដើម្បីតវ៉ាជំទាស់ ៕ដកស្រង់ចេញពីវិទ្យុសម្លេងប្រជាធិបតេយ្យ ចេញផ្យាយថ្ងៃទី ២១ ខែមីនា ឆ្នាំ ២០១៥ ។