-
លោកហ៊ុនសែនព្រមានប្រើ គ.ជ.ប ចាស់បើសង្គ្រោះជាតិមិនទទួលហង្សពុទ្ធា
- Issue Date 02-Apr-2015
នៅពេលដែលបេក្ខភាពប្រធានអង្គការសង្គមស៊ីវិល គឺជាបញ្ហាចម្រូងចម្រាសសម្រាប់តំណែងសមាជិកទី ៩ នៃគណៈកម្មាធិការជាតិរៀបចំការបោះឆ្នោត (គ.ជ.ប) ថ្មី លោកនាយករដ្ឋមន្ត្រី ហ៊ុន សែន បានធ្វើការព្រមានកាលពីម្សិលមិញថា គ.ជ.ប ចាស់ នឹងអាចត្រូវដាក់ឲ្យដំណើរការដដែល ប្រសិនបើគណបក្សសង្គ្រោះជាតិ ជំទាស់បេក្ខភាពលោក ហង្ស ពុទ្ធា នាយកអង្គការនិកហ្វិច។ថ្លែងទៅកាន់លោក សម រង្ស៊ី ប្រធានគណបក្សសង្គ្រោះជាតិ ពីខេត្តស្ទឹងត្រែង កាលពីម្សិលមិញ ក្នុងអំឡុងពិធីសម្ពោធផ្លូវ លោកនាយករដ្ឋមន្ត្រី បានបញ្ជាក់ថា លោក ហង្ស ពុទ្ធា ដែលគណបក្សទាំងពីរបានឯកភាពជ្រើសរើសជាបេក្ខភាពសមាជិកទី ៩ សម្រាប់ គ.ជ.ប ថ្មីនោះមិនអាចទាមទារឲ្យផ្លាស់ប្តូរដោយគណបក្សប្រឆាំងបានទេ ដោយព្រមានថា ប្រសិនបើគណបក្សប្រជាជន និងគណបក្សសង្គ្រោះជាតិមិនឯកភាពជ្រើសរើសយកលោក ពុទ្ធា ជាសមាជិកទី ៩ ទេនោះ គ.ជ.ប ចាស់នឹងត្រូវប្រើប្រាស់ដដែល។លោកនាយករដ្ឋមន្ត្រី បានបញ្ជាក់ពីជំហរបែបនេះ ជាការឆ្លើយតប ទៅលោក សម រង្ស៊ី ប្រធានគណបក្សសង្គ្រោះជាតិ ដែលទាមទារឲ្យផ្លាស់ប្តូរលោក ហង្ស ពុទ្ធា ចេញ ដោយប្រាប់លោក ហ៊ុន សែន ថា លោក ពុទ្ធា មានជំងឺទឹកនោមផ្អែម ហើយគាត់ត្រូវទៅព្យាបាលនៅវៀតណាម ហើយលោក សម រង្ស៊ីបានស្នើលោក ហ៊ុន សែន សម្លឹងរកបេក្ខភាពដទៃទៀតក្រៅពីលោក ហង្ស ពុទ្ធា ប៉ុន្តែ សំណើរបស់លោក សម រង្ស៊ី ត្រូវបានច្រានចោលដោយលោក ហ៊ុន សែន។លោក ហ៊ុន សែន បានមានប្រសាសន៍ថា៖ «គណបក្សប្រជាជនមិនឯកភាពយកបញ្ហាជំងឺមកផ្លាស់ប្តូរបេក្ខភាពរបស់លោក ហង្ស ពុទ្ធា តាមសំណើរបស់ឯកឧត្តមទេ»។លោកបញ្ជាក់ថា៖ «ពេលវេលាបានដល់ដំណាក់កាលចុងក្រោយហើយ ខ្ញុំសូមផ្តល់ជម្រើសពីរដល់ឯកឧត្តម ទី ១ បន្តគាំទ្របេក្ខភាពរបស់លោក ហង្ស ពុទ្ធា តាមការព្រមព្រៀងនៅថ្ងៃទី ២៩ ខែមីនា ទី ២ មិនចាំបាច់បោះឆ្នោតជ្រើសរើស គ.ជ.ប ថ្មីនៅថ្ងៃទី ១៣ ខែមេសាទេ ព្រោះគណបក្សទាំងពីរមិនឯកភាពគ្នាក្នុងការជ្រើសរើសបេក្ខភាពទី ៩ »។ លោកបានបន្ថែមទៀតថា ក្នុងករណីនេះ គ.ជ.ប បច្ចុប្បន្ន នឹងបន្តការងារ រហូតទាល់តែ គ.ជ.ប ថ្មី ត្រូវបានតែងតាំងហើយម្យ៉ាងទៀត លោក ហ៊ុន សែន ក៏បានស្នើឲ្យគណៈកម្មាធិការអចិន្រៃ្តយ៍រដ្ឋសភា មិនឲ្យកោះប្រជុំនៅថ្ងៃទី ១៣ ខែមេសា ដើម្បីបោះឆ្នោតជ្រើសរើសសមាជិក គ.ជ.ប ទេ ប្រសិនបើលោក ហង្ស ពុទ្ធា មិនត្រូវបានឯកភាពដោយគណបក្សសង្គ្រោះជាតិ។លោក ហ៊ុន សែន បានបន្ថែមថា៖ «ខ្ញុំមិនមានជម្រើសផ្សេងក្រៅពីនេះទេ ខ្ញុំសង្ឃឹមថា ឯកឧត្តមនឹងពិចារណាប្រកបដោយការទទួលខុសត្រូវ និងគោរពតាមការព្រមព្រៀងរវាងយើងទាំងពីរ»។លោក ហ៊ុន សែន បានលើកឡើងថា៖ «ដូច្នេះ ប្រសិនបើមិនឯកភាពទេ ទុកឲ្យឯកឧត្តម អ៊ឹម សួស្តី បន្តដឹកនាំ គ.ជ.ប រហូតកុំពិបាកអី។ អាថ្មីមិនចេញ អាចាស់បន្តទៀតទៅ។ [គណបក្សសង្គ្រោះជាតិ] មានតែភាគហ៊ុន ៤៥ ភាគរយហើយភាគហ៊ុន [របស់គណបក្សប្រជាជន] គឺ ៥៥ ភាគរយ រឿងអីឲ្យចែកស្មើ? គាត់ឯកភាពជាមួយខ្ញុំនៅទីក្រុងប៉ារីស ហេតុអ្វីមកដល់ភ្នំពេញមិនឯកភាព?តើ [គណបក្ស សង្គ្រោះជាតិ] មានបញ្ហាផ្ទៃក្នុងឬ?»។ដោយគាំទ្រលោក ហង្ស ពុទ្ធា លោក ហ៊ុន សែន ក៏បានចំអកដាក់លោកស្រី ពុង ឈីវកេក ប្រធានអង្គការលីកាដូ ដែលបានបដិសេធទទួលយកបេក្ខភាពសមាជិកគ.ជ.ប ទី៩ ដោយថ្លែងថា៖ «ប្រសិនបើយើងស្នេហាជាតិ យើងអាចលះបង់សញ្ជាតិបរទេស មកបម្រើជាតិឬអត់?ឬទុកឲ្យជាតិបម្រើតែអ្នកទេ? ធ្វើច្បាប់សម្រាប់តែមនុស្សម្នាក់ តើឯករាជ្យទេ? ច្បាប់ឲ្យ [យើង] មានសញ្ជាតិមួយ...»។ប៉ុន្តែ លោកស្រី ពុង ឈីវកេក បានប្រាប់ លោក ហ៊ុន សែន វិញថា គឺដោយសារសញ្ជាតិបារាំង របស់លោកស្រីនេះហើយ ដែលអាចជួយកម្ពុជាឲ្យមានសន្តិភាព តាមរយៈកិច្ចព្រមព្រៀងទីក្រុងប៉ារីស នៅថ្ងៃទី ២៣ ខែតុលា ឆ្នាំ ១៩៩១ ។លោកស្រីបានចោទសួរថា៖ «គេថា សញ្ជាតិបារាំងមិនអាចធ្វើការបាន ដោយសារតែស្ថិតក្រោមសម្ពាធ។ ក្នុងក្រុមប្រឹក្សាធម្មនុញ្ញ ក្នុងរដ្ឋសភា ក្នុងព្រះបរមរាជវាំង ក៏មានសញ្ជាតិពីរដែរ។ ហេតុអ្វី គ.ជ.ប មានសញ្ជាតិពីរមិនអាចធ្វើការបាន?»។លោក ហង្ស ពុទ្ធា បានប្រាប់ ភ្នំពេញ ប៉ុស្តិ៍ កាលពីម្សិលមិញថា លោកមិនមានជំងឺទឹកនោមផ្អែម ឬបញ្ហាសុខភាព ដូចការលើកឡើងរបស់មន្ត្រីគណបក្សសង្គ្រោះជាតិទេ ហើយថា លោកមិនបានទទួលលិខិតផ្លូវការពីគណបក្សប្រជាជន និងគណបក្សសង្គ្រោះជាតិសម្រាប់ការជ្រើសរើសនេះឡើយ។ លោក ពុទ្ធា ក៏បានសន្យាដំណើរការ គ.ជ.ប ថ្មី ឲ្យកាន់តែល្អប្រសើរ នៅពេលលោកកាន់តំណែងក្នុងគ.ជ.ប។លោក ពុទ្ធា បានបញ្ជាក់ថា៖ «ខ្ញុំមិនយល់អ្នកនយោបាយប្រើពាក្យនេះទេ។ ប្រសិនបើគេចង់ផ្លាស់ប្តូរខ្ញុំចេញ គេគួរប្រើពាក្យដែលខុសពីនេះ។ ខ្ញុំមានទំនាក់ទំនងច្រើនជាមួយនឹងមន្ត្រីគណបក្សសង្គ្រោះជាតិ ប៉ុន្តែ អ្នកដែលចោទប្រកាន់ គឺជាមន្ត្រីគណបក្សសង្គ្រោះជាតិ។ វាគួរជាគណបក្សប្រជាជន ដែលជាអ្នកចោទ»។ លោក ពុទ្ធា គាំទ្រគណបក្សប្រជាជន ដែលជ្រើសរើសលោកជាសមាជិកទី ៩ របស់ គ.ជ.ប ដោយអះអាងថា លោកមានបទពិសោធ និងជំនាញគ្រប់គ្រាន់រយៈពេល ១៧ ឆ្នាំ នៅក្នុងការងារបោះឆ្នោត ដែលស័ក្តិសមសម្រាប់ការងារបោះឆ្នោតនេះ។ទោះជាយ៉ាងណា រហូតមកដល់ពេលនេះគណបក្សសង្គ្រោះជាតិ មិនទាន់សម្រេចជ្រើសរើសលោក ហង្ស ពុទ្ធា ជាបេក្ខជនទី ៩ សម្រាប់ គ.ជ.ប ថ្មីនៅឡើយទេ ដោយថ្លែងថា មេដឹកនាំគណបក្សសង្គ្រោះជាតិកំពុងរង់ចាំមើលបេក្ខជនទាំងអស់ ដែលដាក់ពាក្យស្នើសុំធ្វើជាសមាជិក គ.ជ.ប ជាមុនសិន ដើម្បីឲ្យគណបក្សសង្គ្រោះជាតិអាចវាយតម្លៃ និងសម្រេចលើលក្ខណសម្បតិ្តរបស់ពួកគេ។លោក យ៉ែម បុញ្ញឫទិ្ធ អ្នកនាំពាក្យគណបក្សសង្គ្រោះជាតិបានថ្លែងថា៖ «យើងយល់ថា កិច្ចព្រមព្រៀងថ្ងៃទី ២២ ខែ កក្កដា ឆ្នាំ ២០១៤ គឺដើម្បីធ្វើកំណែទម្រង់ការបោះឆ្នោត និងដោះស្រាយភាពជាប់គាំងខាងនយោបាយ។ ខ្ញុំសង្ឃឹមថា នឹងមានដំណោះស្រាយ»៕ដកស្រង់់ពីសារពត៌មានភ្នំពេញប៉ុស្តិ៍ ចេញផ្សាយថ្ងៃទី០២ ខែមេសា ឆ្នាំ២០១៥ ។