-
សហគមន៍បឹងកក់ប្រតិកម្មនឹងសាលារាជធានីដែលចោទថា ពួកគេនៅលើដីរដ្ឋខុសច្បាប់
- Issue Date 02-Apr-2015
សកម្មជនដីធ្លីតំបន់បឹងកក់ចេញតវ៉ាជាថ្មីទៀត នៅថ្ងៃព្រហស្បតិ៍នេះ ដោយប្រតិកម្មនឹងការចោទរបស់មន្ត្រីសាលារាជធានីភ្នំពេញដែលថា អ្នកភូមិទាំងនោះរស់នៅលើដីរដ្ឋខុសច្បាប់ ។ស្ត្រីសកម្មជនដីធ្លីប្រមាណជិត៣០នាក់ បានធ្វើសន្និសីទសារព័ត៌មាន នៅទីនៅមុខសាលារាជធានីភ្នំពេញ ដើម្បីជំរុញឲ្យអ្នកនាំពាក្យសាលារាជធានីភ្នំពេញ លោក ឡុង ឌីម៉ង់ កែប្រែសំដីរបស់ខ្លួន ដែលបានប្រាប់ សារព័ត៌មានកន្លងមក ។តំណាងពលរដ្ឋបឹងកក់ អ្នកស្រី សាប ដា ឲ្យដឹងថា កាលពីថ្ងៃទី៣១ ខែមីនា លោក ឡុង ឌីម៉ង់ បានថ្លែងនៅវិទ្យុបារាំង(RFI)ថា ពលរដ្ឋតំបន់បឹងកក់គឺរស់នៅលើដីរដ្ឋខុសច្បាប់ ។ប៉ុន្តែអ្នកស្រីអះអាងនៅថ្ងៃនេះថា ប្រជាសហគមន៍បឹងកក់មិនបានរស់នៅខុសច្បាប់ដូចការចោទរបស់អ្នកនាំពាក្យរូបនេះទេ ពោលគឺពួកគេរស់នៅមាន ឯកសារគ្រប់គ្រាន់ដែលអាចបញ្ជាក់ថា គឺរស់នៅស្របច្បាប់លើដីនោះ ។ អ្នកស្រីថា «មានស្របច្បាប់ទាំងអស់ មានតាំងពីសៀវភៅគ្រួសារ តាំងពីប្លង់ផ្ទះទាំងអស់ មិនមែនអត់ទេ បើសិនប្រជាពលរដ្ឋមកនៅអត់មានសៀវភៅគ្រួសារ អត់មានប្លង់ផ្ទះ នោះអ្នកឯងចង់ថាម៉េចក៏បានដែរ ប្រជាពលរដ្ឋនៅងងឹតល្ងង់រកគេធ្វើសៀវភៅគ្រួសារស្នាក់នៅ ប័ណ្ណគ្រួសារ ប្លង់ផ្ទះមានគ្រប់គ្រាន់ទាំងអស់ មិនមែនចេះតែនៅតាមអំពើចិត្តដូចអ្នកឯងចេះតែថាបានទេ»។អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ នៅតែអះអាងថា អ្នកបឹងកក់មួយចំនួនរស់នៅដោយមិនមានឯកសារគ្រប់គ្រាន់ ប៉ុន្តែលោកថា បើពួកគេមានឯកសារបញ្ជាក់បន្ថែម សាលារាជធានីនៅតែបើកទ្វារស្វាគមន៍ ។ លោកថា «គាត់ថាកាន់ប្លង់ច្បាប់ហ្នឹង តើលក្ខណៈច្បាប់ឯកសារកាន់កាប់ដីរបស់គាត់ហ្នឹង កន្លែងណាដែលស្របច្បាប់ ខ្ញុំសូមបើគាត់មានការតវ៉ា ឲ្យគាត់យកមក» ។អ្នកគ្រប់គ្រងបច្ចេកទេសស៊ើបអង្កេតនៃអង្គការលីកាដូ លោក អំ សំអាត ឲ្យដឹងថា តាមការអង្កេតរបស់ អង្គការសង្គមស៊ីវិល គឺពលរដ្ឋក្នុងតំបន់បឹងកក់រស់នៅដោយមានឯកសារគ្រប់គ្រាន់ដែលអាជ្ញាធរបានទទួលស្គាល់ ។ លោកថា «រឿងនេះ វាជារឿងពិតបានជាគាត់ហ៊ានតវ៉ាមកទល់ឥឡូវ ជាពិសេសផ្ទះរបស់គាត់នៅហ្នឹងតែម្តង អ្នកដែលមិនទាន់ទទួលប័ណ្ណកម្មសិទ្ធិ»។ជម្លោះដីធ្លីនៅតំបន់បឹងកក់បានអូសបន្លាយជិតដប់ឆ្នាំហើយ នៅតែមិនទាន់បញ្ចប់ទាំងស្រុង ។ ជម្លោះនេះកើតឡើងបន្ទាប់ពីរដ្ឋាភិបាលប្រគល់បឹងធម្មជាតិនៅកណ្តាលរាជធានីភ្នំពេញទៅក្រុមហ៊ុនស៊ូកាគូអ៊ិន អភិវឌ្ឍន៍៩៩ឆ្នាំ ក្នុងទឹកប្រាក់៧៩លានដុល្លារ ។ ប៉ុន្តែមានអ្នកភូមិរាប់ពាន់គ្រួសារត្រូវបានបណ្តេញចេញ ដែលពួកគេអះអាងថា ទទួលបានសំណងមិនសមរម្យ ៕ដកស្រង់ពីវិទ្យុសម្លេងប្រជាធិបតេយ្យ ចេញផ្សាយថ្ងៃទី ០២ ខែមេសា ឆ្នាំ២០១៥ ។