-
សង្គមស៊ីវិលថា ច្បាប់ NGOs នឹងកំហិតសេរីភាពពួកគេក្នុងការជួយពលរដ្ឋឲ្យចេះប្រើសិទ្ធិ
- Issue Date 10-Apr-2015
អង្គការសង្គមស៊ីវិលរិះគន់ថា ការបង្កើតច្បាប់គ្រប់គ្រងពួកគេ ដោយសាររដ្ឋាភិបាលមិនចង់ឲ្យពលរដ្ឋចេះប្រើសិទ្ធិរបស់ខ្លួន និងមានសិទ្ធិទទួលបានព័ត៌មានផ្សេងៗ ។ ការរិះគន់នេះគឺបន្ទាប់ពីលោកនាយករដ្ឋមន្ត្រី ហ៊ុន សែន ប្រកាសថា យ៉ាងយូរត្រឹមត្រឹម ខែឧសភា ឆ្នាំ២០១៥នេះ ច្បាប់គ្រប់គ្រងអង្គការសង្គមស៊ីវិល នឹងត្រូវបញ្ជូនទៅរដ្ឋសភា អនុម័តដោយមតិ៥០% បូក ១ ។ប្រធានផ្នែកស៊ើបអង្កេតនៃសមាគមអាដហុក លោក នី ចរិយា មានប្រសាសន៍ថា ប្រមុខរាជរដ្ឋាភិបាល លោក ហ៊ុន សែន មិនបានដឹងគុណអង្គការសង្គមស៊ីវិល ដែលបានខិតខំផ្តល់ការអប់រំច្បាប់ និងបង្រៀនពលរដ្ឋឲ្យចេះប្រាស់សិទ្ធិរបស់ពួកគេនោះទេ ទើបបង្កើតច្បាប់រិតបន្តឹងអង្គការសង្គមស៊ីវិល ។ លោកបន្តទៀតថា ច្បាប់ថ្មីនេះ នឹងរឹតត្បិតសេរីភាពសង្គមស៊ីវិលក្នុងការជួយឲ្យពលរដ្ឋឲ្យចេះដឹងពីច្បាប់ និងដឹងពីសិទ្ធិទទួលបានព័ត៌មានផ្សេងៗ ។អ្នកគ្រប់គ្រងបច្ចេកទេសស៊ើបអង្កេតនៃអង្គការលីកាដូ លោក អំ សំអាត កត់សំគាល់ថា ច្បាប់ថ្មីដែលរដ្ឋាភិបាលគ្រោងនឹងបង្កើតនោះ គឺធ្វើឡើងដើម្បីការពារប្រយោជន៍គណបក្សកាន់អំណាច ដោយខ្លាចអង្គការសង្គមស៊ីវិលទាំងនោះ រិះគន់ទង្វើរពុករលួយ និងទង្វើររំលោភសិទ្ធិមនុស្សនានាដែលមន្ត្រីរបស់ខ្លួនបានប្រព្រឹត្ត ។ លោកអះអាងទៀតថា បច្ចុប្បន្នអង្គការសង្គមស៊ីវិលមានច្បាប់ព្រហ្មទណ្ឌ ច្បាប់រដ្ឋប្បវេណីគ្រប់គ្រង គឺគ្រប់គ្រាន់ហើយ មិនចាំបាច់បង្កើតច្បាប់ថ្មីទៀតនោះទេ ។យោងតាមរបាយការណ៍របស់ក្រសួងមហាផ្ទៃ កាលពីឆ្នាំ២០១៤ ឲ្យដឹងថា សមាគម និងអង្គការមិនមែនរដ្ឋាភិបាល ដែលបានចុះបញ្ជីនៅក្រសួងមានចំនួនសរុប ៤៣៧៨ ក្នុងនោះសមាគមចំនួន ១៧០៦ និង អង្គការមិនមែនរដ្ឋាភិបាលចំនួន ២៦៧២ ។ បច្ចុប្បន្នអង្គការមិនមែនរដ្ឋាភិបាល និងសមាគមទាំងនោះ គឺស្ថិតក្រោមការគ្រប់គ្រងរបស់ក្រសួងមហាផ្ទៃ ៕ដកស្រង់ពីវិទ្យុសម្លេងប្រជាធិបតេយ្យ ចេញផ្សាយថ្ងៃទី ០៦ ខែមេសា ឆ្នាំ ២០១៥ ។