-
CCHR ខកចិត្តនឹងរដ្ឋាភិបាលពន្លឿនធ្វើច្បាប់គ្រប់គ្រងសង្គមស៊ីវិល
- Issue Date 11-May-2015
មជ្ឈមណ្ឌលសិទ្ធិមនុស្សកម្ពុជា (CCHR) បង្ហាញការខកចិត្ត នឹងរដ្ឋាភិបាលក្នុងការពន្លឿនធ្វើច្បាប់ គ្រប់គ្រងសង្គមស៊ីវិល មិនទទួលយកការព្រួយបារម្ភរបស់អង្គការមិនមែនរដ្ឋាភិបាលមួយចំនួនខណៈកម្ពុជាប្រកាសគោរព លទ្ធិប្រជាធិប តេយ្យ ។វិចារណកថា របស់មជ្ឈមណ្ឌលសិទ្ធិមនុស្សកម្ពុជា ចុះថ្ងៃទី៨ខែឧសភាឆ្នាំ២០១៥បង្ហាញថា មជ្ឈមណ្ឌលនេះ សោកស្តាយយ៉ាងខ្លាំងចំពោះការសម្រេចរបស់រដ្ឋាភិបាលដែលបញ្ជូនសេចក្តីព្រាងច្បាប់ ស្តីពីសមាគម និងអង្គការមិនមែន រដ្ឋាភិបាល ទៅគណៈរដ្ឋមន្ត្រី បើទោះបីជាមានអង្គការសង្គមស៊ីវិលជាង៣០០ស្ថាប័ន បានបង្ហាញពីការព្រួយបារម្ភពីការខ្វះតម្លាភាពក្នុងដំណើរការអនុមតិច្បាប់ និងអំពាវនាវជាថ្មីម្តងទៀតឲ្យមានកិច្ចពិគ្រោះយោបល់ជាសាធារណក៏ដោយ ។វិចារណកថា បានដកស្រង់សម្តីនាយិកាប្រតិបត្តិ របស់មជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព មកចុះផ្សាយថា កម្ពុជាជាប្រទេសមួយដែលច្បាប់សំខាន់ នៅតែបន្តអនុមតិដោយគ្មានកិច្ចពិគ្រោះយោបល់ជាមួយ សាធារណជនឲ្យបានគ្រប់គ្រាន់ដើម្បីឲ្យប្រាកដថាច្បាប់នោះបានធានាផលប្រយោជនសាធារណជនទូទៅទេ ដូចជា ការអនុមតិច្បាប់កំណែទម្រង់ប្រព័ន្ធបោះឆ្នោត ច្បាប់ស្តីពីកំណែទម្រង់ប្រព័ន្ធតុលាការជាដើម ។លោកស្រី ចាត់ទុកថា ការធ្វើច្បាប់មិនបង្ហាញពីតម្លាភាព គ្មានការបើកទូលាយ និងមិនទទួលយកអនុសាសន៍ពីអង្គការក្រៅរដ្ឋាភិបាលពាក់ព័ន្ធនោះ នឹងមានផលលំបាកធ្ងន់ធ្ងរទៅលើការអភិវឌ្ឍប្រជាធិបតេយ្យដ៏ល្អប្រសើរមួយនៅកម្ពុជា ។លោកស្រី ចក់ សុភាព ស្នើឲ្យរដ្ឋាភិបាលគួរតែចាត់វិធានការជាបន្ទាន់ដើម្បីអាចឆ្ពោះទៅរកទិសដៅ ដូចដែលបានលើកអនុសាសន៍ ក្នុងអំឡុងការត្រួតពិនិត្យជាសាកលតាមពេលវេលាកំណត់លើកទីពីរ របស់កម្ពុជានិងក្នុងសេចក្តីសន្និដ្ឋានចុងក្រោយ របស់គណៈកម្មាធិការសិទ្ធិមនុស្សអង្គការសហប្រជាជាតិ ដែលទើបនឹងចេញថ្មីៗនេះ ។យ៉ាងណាក៏ដោយ លោកនាយករដ្ឋមន្ត្រី ធ្លាប់អះអាងថា សេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាលនេះ នឹងជំរុញឲ្យដល់ដៃរដ្ឋសភានៅខែឧសភានេះ ដើម្បីពិភាក្សានឹងអនុមតិ បើទោះបីជាសង្គមស៊ីវិលភាគច្រើនរិះគន់ និងស្នើពន្យារពេលក៏ដោយ ៕ដកស្រង់ពីសារព័ត៌មានសម្លេងប្រជាធិបតេយ្យ ចេញផ្សាយថ្ងៃទី ០៩ ខែឧសភា ឆ្នាំ ២០១៥ ។