-
អង្គការអន្តរជាតិជំរុញឲ្យប្រទេសម្ចាស់ជំនួយដាក់សម្ពាធលើរដ្ឋាភិបាលកម្ពុជាករណីច្បាប់អង្គការ
- Issue Date 03-Jun-2015
អង្គការសិទ្ធិមនុស្សអន្តរជាតិចំនួន១១ជំរុញឲ្យប្រទេសម្ចាស់ជំនួយរបស់កម្ពុជា និងរដ្ឋាភិបាលដទៃទៀត ដាក់សម្ពាធលើរដ្ឋាភិបាលកម្ពុជាឲ្យទម្លាក់ចោលសេចក្ដីព្រាងច្បាប់ស្ដីពីសមាគម និងអង្គការមិនមែនរដ្ឋាភិបាល ដោយលើកឡើងថា ច្បាប់នេះនឹងគំរាមកំហែងដល់សេរីភាពរបស់អង្គការសមាគម ។សេចក្ដីប្រកាសព័ត៌មានរបស់អង្គការឃ្លាំមើលសិទ្ធិមនុស្ស (Human Rights Watch) ចេញផ្សាយនៅថ្ងៃទី០១ ខែមិថុនា ឲ្យដឹងថា កាលពីថ្ងៃទី២៩ ខែឧសភា អង្គការនេះ និងអង្គការសិទ្ធិមនុស្សចំនួន១០ផ្សេងទៀតបានផ្ញើលិខិតទៅកាន់សហភាពអ៊ឺរ៉ុប និងរដ្ឋាភិបាល៤៤ប្រទេសផ្សេងទៀត ដោយជំរុញឲ្យអ្នកផ្ដល់ជំនួយ និងរដ្ឋាភិបាលទាំងនោះដាក់សម្ពាធទៅរដ្ឋាភិបាលកម្ពុជាឲ្យបញ្ឈប់ការធ្វើសេចក្ដីព្រាងច្បាប់ស្ដីពីសមាគម និងអង្គការមិនមែនរដ្ឋាភិបាលនេះ ។អង្គការទាំងនោះក៏បានលើកឡើងដែរថា ច្បាប់ថ្មីនេះមិនមានភាពចាំបាច់នោះទេ ព្រោះថាច្បាប់ដែលមានសព្វថ្ងៃបានដោះស្រាយពីកង្វល់របស់រដ្ឋាភិបាលពាក់ព័ន្ធនឹងប្រតិបត្តិការរបស់អង្គការ សមាគមទាំងនោះរួចស្រេចទៅហើយ ។សេចក្ដីប្រកាសព័ត៌មានដដែលបន្តដោយដកស្រង់សម្ដីរបស់នាយកអង្គការឃ្លាំមើលសិទ្ធិមនុស្សប្រចាំតំបន់អាស៊ី លោក ប្រេដ អាដាម (Brad Adams) ថា ប្រទេសអ្នកផ្ដល់ជំនួយ និងរដ្ឋាភិបាលទាំងនោះត្រូវហ៊ាននិយាយជាសាធារណៈ ការពារសេរីភាពអង្គការសង្គមស៊ីវិលនៅកម្ពុជា ដើម្បីទុកឱកាសឲ្យពួកគេបានបំពេញកិច្ចការដ៏មានតម្លៃដូចជាការចូលរួមកាត់បន្ថយភាពក្រីក្រ ការពារកុមារ ការពារសិទ្ធិមនុស្ស និងវិស័យផ្សេងៗទៀត ។ លោក ប្រេដ អាដាម បន្តថា «ពួកគេត្រូវប្រើឥទ្ធពលរបស់ពួកគេដើម្បីបញ្ចុះបញ្ចូលរដ្ឋាភិបាលកម្ពុជាឲ្យដកខ្លួនចេញពីការព្យាយាមដ៏គ្រោះថ្នាក់នេះ ដែលមានបំណងរាំងស្ទះសេរីភាពនៃការជួបជុំ និងការបញ្ចេញមតិនៅក្នុងប្រទេស» ។អង្គការទាំង១១ដែលបានផ្ញើលិខិតទៅសហភាពអ៊ឺរ៉ុប ប្រទេសរដ្ឋាភិបាលទាំង៤៤ប្រទេសនោះមាន អង្គការ Article 19 អង្គការ Asian Forum for Human Rights and Development (Forum Asia) អង្គការ Civil Rights Defenders អង្គការ Front Line Defenders អង្គការ Global Witness អង្គការ Human Rights Watch អង្គការ International Commission of Jurists អង្គការ International Federation for Human Rights (FIDH) អង្គការ Lawyers Rights Watch Canada អង្គការ Protection International និងអង្គការ Southeast Asian Press Alliance ។គួរបញ្ជាក់ថា កាលពីព្រឹកម្សិលមិញ ឧបការីរងក្រសួងការបរទេសសហរដ្ឋអាមេរិក ទទួលបន្ទុកផ្នែកលទ្ធិប្រជាធិបតេយ្យ សិទ្ធិមនុស្ស និងការងារ លោកScott Busby ដែលបានមកទស្សនកិច្ចនៅកម្ពុជារយៈពេល២ថ្ងៃ បានលើកឡើងថា ច្បាប់សមាគម និងអង្គការមិនមែនរដ្ឋាភិបាល មិនទាន់ចាំបាច់មានសម្រាប់កម្ពុជានៅពេលនេះនោះទេ ។ លោកក៏បានសម្ដែងការព្រួយបារម្ភពីសេចក្តីព្រាងច្បាប់សមាគម និងអង្គការក្រៅរដ្ឋាភិបាល ដោយលោកគិតថាច្បាប់នេះនឹងរឹតត្បិតសិទ្ធិសេរីភាពរបស់សង្គមស៊ីវិល ។យ៉ាងណាក៏ដោយ ក្នុងពិធីសម្ពោធផ្លូវនៅខេត្តកំពង់ស្ពឺ កាលពីថ្ងៃអង្គារ លោកនាយករដ្ឋមន្ត្រី ហ៊ុន សែនបានអំពាវនាវកុំឲ្យសមាគម និងអង្គការក្រៅរដ្ឋាភិបាលមានក្តីបារម្ភចំពោះច្បាប់ស្តីពីសមាគម និងអង្គការមិនមែនរដ្ឋាភិបាល ។ លោកថាច្បាប់នេះនឹងការពារ និងបើកទូលាយឲ្យអង្គការ សមាគម ទាំងនេះធ្វើសកម្មភាពដោយទូលាយទៅតាមផ្លូវច្បាប់ និងមានច្បាប់គ្រប់គ្រង។ចំណែកក្រសួងមហាផ្ទៃ នាពេលថ្មីៗនេះ ក៏បានអះអាងសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាលត្រូវបានធ្វើឡើងផ្អែកលើមូលដ្ឋានរដ្ឋធម្មនុញ្ញកម្ពុជា និងកតិកាសញ្ញាអន្តរជាតិ ដោយអំពាវនាវកុំឲ្យមានការព្រួយបារម្ភពាក់ព័ន្ធនឹងការរឹតត្បិតសេរីភាព ។អ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន បានអះអាងថា សេចក្តីព្រាងច្បាប់នេះនឹងត្រូវដាក់ឆ្លងគណៈរដ្ឋមន្ត្រី នៅថ្ងៃសុក្រសប្តាហ៍នេះ ហើយនឹងត្រូវបញ្ជូនទៅរដ្ឋសភាពីរបីថ្ងៃបន្ទាប់ ប្រសិនបើមិនមានការកែប្រែលើសេចក្តីព្រាងច្បាប់នេះ ។បើតាមរដ្ឋមន្ត្រីក្រសួងការបរទេស លោក ហោ ណាំហុង ឲ្យដឹងថា អង្គការសមាគមដែលចុះបញ្ជីជាមួយក្រសួងមហាផ្ទៃមានចំនួនជាង៣ពាន់អង្គការ-សមាគម និងអង្គការអន្តរជាតិដែលបានចុះបញ្ជីជាមួយក្រសួងការបរទេសកម្ពុជាមានជាង៤០០ ៕ដកស្រង់ពីសារព័ត៌មានសម្លេងប្រជាធិបតេយ្យ ចេញផ្សាយថ្ងៃទី០៣ ខែមិថុនា ឆ្នាំ២០១៥។