-
អាជ្ញាធរខេត្តព្រះវិហារសង្ស័យអង្គការពីរថានៅពីក្រោយការតវ៉ារបស់អ្នកមានជម្លោះដីធ្លី
- Issue Date 04-Jun-2015
យ៉ាងហោចណាស់ក៏មានប្រជាពលរដ្ឋម្នាក់នៅស្រុករវៀង បានស្លាប់ និង ៦នាក់ផ្សេងទៀតរងរបួស ដោយសារតែគ្រោះថ្នាក់ក្រឡាប់គោយន្ត នៅពេលដែលពួកគេនាំគ្នាឡើងទៅតវ៉ាបញ្ហាទំនាស់ដីធ្លីនៅទីរួមខេត្តព្រះវិហារ ហើយព្យាយាមគេចចេញពីកម្លាំងប៉ូលិសដែលរាយបណ្ដាក់រារាំងនៅតាមដងផ្លូវ កាលពីថ្ងៃទី២ ខែមិថុនា។អាជ្ញាធរខេត្តព្រះវិហារ បានដាក់ការសង្ស័យទៅលើការលើកគ្នាតវ៉ាបញ្ហាទំនាស់ដីធ្លីរបស់ប្រជាពលរដ្ឋទាំងនោះ ថាអាចមានការដឹកនាំពីអង្គការក្រៅរដ្ឋាភិបាលចំនួន២ ដែលកំពុងធ្វើការងារនៅក្នុងទឹកដីខេត្តនេះ។សហគមន៍ទំនាស់ដីធ្លីមកពីស្រុកចំនួន៧ បានសម្រេចចិត្តបញ្ចប់យុទ្ធនាការតវ៉ាទំនាស់ដីធ្លី នៅក្នុងទីខេត្តព្រះវិហារ ហើយនៅរសៀលថ្ងៃពុធ ទី៣ ខែមិថុនា។ការបញ្ចប់យុទ្ធនាការតវ៉ានេះ បន្ទាប់ពីកាលពីថ្ងៃទី២ ខែមិថុនា ប៉ូលិសបានរាយបណ្ដាក់កម្លាំងនៅតាមដងផ្លូវជាច្រើនកំណាត់ ដើម្បីរារាំងប្រជាពលរដ្ឋមិនឲ្យចូលទៅទីរួមខេត្តបានគ្រប់ចំនួន ២ពាន់នាក់ ដើម្បីធ្វើសកម្មភាពតវ៉ាជាទ្រង់ទ្រាយធំទៅតាមការគ្រោងទុក។ស្ត្រីអ្នកតវ៉ាទំនាស់ដីធ្លីម្នាក់មកពីឃុំគូលែន ស្រុកគូលែន ក្នុងចំណោមអ្នកតវ៉ាជាង ៣០០នាក់ផ្សេងទៀត មានប្រសាសន៍កាលពីរសៀលថ្ងៃពុធ ទី៣ ខែមិថុនា ថា ពួកគាត់ជម្នះលើកគ្នាមកពីតាមបណ្ដាស្រុក ដើម្បីតវ៉ាឲ្យអាជ្ញាធរដោះស្រាយដីធ្លីដែលក្រុមហ៊ុនរំលោភយក។ កាលពីព្រឹកថ្ងៃទី៣ ខែមិថុនា អាជ្ញាធរខេត្តព្រះវិហារ បានអនុញ្ញាតឲ្យតំណាងអ្នកតវ៉ាចំនួន ២០នាក់ ចូលជួបពិភាក្សា និងដាក់ញត្តិទាមទារផង។ ស្ត្រីដដែលបញ្ជាក់ថា រូបគាត់ក៏ដូចជាអ្នកមានទំនាស់ដីធ្លីជាច្រើនទៀត គឺបានទាមទារឲ្យអាជ្ញាធរខេត្តព្រះវិហារ ដោះស្រាយបញ្ហាមួយចំនួន៖ «ទាមទារឲ្យអាជ្ញាធរខេត្តនេះចុះត្រួតពិនិត្យយកដីពីក្រុមហ៊ុនឲ្យប្រជាជនវិញ ហើយឲ្យទម្លាក់ព្រះរាជអាជ្ញារងអមតុលាការម្នាក់ឈ្មោះ ឡុង ស៊ីថា ចេញពីតួនាទី»។កាលពីល្ងាចថ្ងៃទី២ ខែមិថុនា កន្លងទៅ ក្រុមប្រជាពលរដ្ឋបានលើកគ្នាទៅតវ៉ានៅមុខគេហដ្ឋានរបស់ លោក ឡុង ស៊ីថា ព្រះរាជអាជ្ញារងអមសាលាដំបូងខេត្តព្រះវិហារ ហើយថាព្រះរាជអាជ្ញារងរូបនេះ មិនដែលផ្ដល់យុត្តិធម៌សម្រាប់ពួកគេទេ។អភិបាលរងខេត្តព្រះវិហារ លោក ស៊ូ សេរី បានទទួលស្គាល់សិទ្ធិរបស់ប្រជាពលរដ្ឋដែលលើកគ្នាមកតវ៉ានោះ ក៏ប៉ុន្តែលោកចាត់ទុកថាមិនត្រឹមត្រូវទេ ពីព្រោះវាមិនមានច្បាប់ទម្លាប់។អភិបាលរងខេត្តព្រះវិហារ ដដែលបញ្ជាក់ថា ទោះយ៉ាងណា អាជ្ញាធរមិនព្រងើយកន្តើយក្នុងការដោះស្រាយបញ្ហានេះទេ គឺនឹងបង្កើតគណៈកម្មការគ្រប់ជំនាញ ដើម្បីចុះដោះស្រាយរឿងនេះឲ្យបានឆាប់ៗ៖ «ឯកឧត្តមអភិបាលខេត្ត គាត់កំណត់ពេលវេលាមួយនៅពេលក្រោយ ប៉ុន្តែឆាប់ៗនេះនឹងបង្កើតគណៈកម្មការមួយ ដើម្បីចុះពិនិត្យគ្រប់កន្លែងដែលមានបញ្ហាទាំងអស់»។អាជ្ញាធរខេត្តព្រះវិហារ បានដាក់ការសង្ស័យទៅលើប្រជាពលរដ្ឋដែលលើកគ្នាតវ៉ាបញ្ហាទំនាស់ដីធ្លីនោះ ថាគឺអាចសមាគមការពារសិទ្ធិមនុស្សអាដហុក (adhoc) និងអង្គការពន្លកខ្មែរ នៅក្នុងខេត្តនោះ ជាអ្នកដឹកនាំ។ អាជ្ញាធរដែលដាក់ការសង្ស័យទៅលើអង្គការក្រៅរដ្ឋាភិបាលទាំងពីរនេះ គឺបន្ទាប់ពីប្រជាពលរដ្ឋនៅស្រុករវៀង ដែលលើកគ្នាតវ៉ាម្នាក់បានស្លាប់ និង ៦នាក់ផ្សេងទៀតរងរបួស ដោយសារតែក្រឡាប់គោយន្ត នៅពេលធ្វើដំណើរឆ្ពោះទៅទីរួមខេត្ត។ប៉ុន្តែមន្ត្រីសមាគមការពារសិទ្ធិមនុស្សអាដហុក ខេត្តព្រះវិហារ លោក ឡោ ចាន់ និងមន្ត្រីអង្គការពន្លកខ្មែរ លោក ប៉ិក សោភ័ណ បានច្រានចោលការសង្ស័យរបស់អាជ្ញាធរនេះ ថាវាមិនត្រឹមតែជាការដែលគេចវេសមិនដោះស្រាយបញ្ហារបស់ប្រជាពលរដ្ឋប៉ុណ្ណោះទេ គឺវាថែមទាំងកំពុងគំរាមកំហែងដល់ក្រុមសង្គមស៊ីវិល ដែលធ្វើឲ្យមានឧបសគ្គលើការងារឃ្លាំមើលសិទ្ធិមនុស្ស និងកិច្ចសហការល្អរវាងអង្គការក្រៅរដ្ឋាភិបាល ជាមួយនឹងមន្ត្រីរដ្ឋាភិបាលទៀតផង៕ដកស្រង់ពីវិទ្យុអាស៊ីសេរី ចេញផ្សាយថ្ងៃទី០៣ ខែមិថុនា ឆ្នាំ២០១៥។