-
តុលាការបញ្ចប់ការសាកសួរសកម្មជនទាំង១១នាក់របស់គណបក្សសង្គ្រោះជាតិ
- Issue Date 12-Jun-2015
សាលាដំបូងរាជធានីភ្នំពេញបានបញ្ចប់ការសាកសួរសកម្មជនគណបក្សសង្គ្រោះជាតិទាំង១១នាក់ នៅក្នុងសវនាការជំនុំជម្រះនាល្ងាចថ្ងៃពុធនេះ ហើយនឹងបន្ដសាកសួរភាគីដើមបណ្ដឹងរដ្ឋបវេណី នៅថ្ងៃទី២៩ ខែមិថុនា បន្ដទៀត ។មេធាវីការពារក្ដីរបស់សកម្មជនគណបក្សសង្គ្រោះជាតិ លោក ជូង ជូងី ប្រាប់ក្រុមអ្នកសារព័ត៌មាន ក្រោយពេលសវនាការថា នៅក្នុងសវនាការថ្ងៃនេះ តុលាការមិនអាចរកអ្វី ដើម្បីដាក់បន្ទុកលើកូនក្ដីរបស់លោកបានឡើយ ហើយលោកថា លោកសង្ឃឹមថា តុលាការនឹងផ្ដល់យុត្ដិធម៌ជូនកូនក្ដីរបស់លោក ។ លោកបន្ដថា តុលាការនឹងបើកសវនាការបន្ដដើម្បីសាកសួរលើដើមបណ្ដឹងរដ្ឋបវេណីដែលជាសន្ដិសុខ៣៩ នាក់នៅថ្ងៃ២៩ ខែមិថុនា ទៀត ដោយតម្រូវឲ្យកូនក្ដី១១នាក់របស់លោកត្រូវមានវត្តមានផងដែរ ។លោក ជួង ជូងី មានប្រសាសន៍ថា «ថ្ងៃនេះខ្ញុំសង្កេតឃើញថា តុលាការរកដាក់បន្ទុកកូនក្ដីរបស់ខ្ញុំអត់ឃើញទេ គឺចម្លើយដែលកូនក្ដីខ្ញុំឆ្លើយនៅពេលដែលចៅក្រម ឬក៏តំណាងអាយការ ឬមេធាវីសួរ គឺដូចរកបន្ទុកដាក់គាត់អត់ឃើញ» ។អនុប្រធានស៊ើបអង្កេតក្រុមមេធាវីរបស់សមាគមអាដហុក លោក ណៃ វ៉ង់ដា ដែលបានចូលរួមស្ដាប់ការសួរដេញដោលនៅក្នុងសវនាការនៅថ្ងៃនេះ លើកឡើងថា លោកសង្កេតឃើញថា តុលាការសួរនាំតែសំណួរដដែលៗ ដើម្បីរកវិធីដាក់បន្ទុកលើជនជាប់ចោទ ។ លោកថា តុលាការគួរកែប្រែទម្លាប់សួរបែបនេះដោយជ្រើសរើសយកតែសំនួរណាដែលសំខាន់ៗប៉ុណ្ណោះ ។លោក មានប្រសាសន៍ថា «យើងឃើញថា ការសួរគឺដដែលៗ គឺឈ្លេចដេញដោល ដើម្បីរកកំហុស ហើយមិនមែនតែនៅតែសាលាដំបូងរាជធានីភ្នំពេញនេះទេ ដោយនៅសាលាក្ដីដ៏ទៃទៀតដែលមានការកាត់ក្ដីទៅលើសកម្មជនដីធ្លី ក៏ដូចជាសកម្មជននយោបាយ គឺប្រព្រឹត្តឡើងបែបនេះដ៏ដែល គឺជាទម្លាប់មិនល្អរបស់តុលាការ ដែលគួរតែផ្លាស់ប្ដូរ» ។គួរបញ្ជាក់ថា លោក មាជ សុវណ្ណារ៉ា និងសកម្មជនគណបក្សសង្គ្រោះជាតិមួយចំនួនទៀត ត្រូវបានអាជ្ញាធរចាប់ខ្លួន ក្នុងករណីហិង្សាលើសន្តិសុខខណ្ឌដូនពេញ នៅជិតទីលានប្រជាធិបតេយ្យកាលពីថ្ងៃទី១៥ ខែកក្កដា ឆ្នាំ២០១៤ កន្លងទៅ ។ នៅថ្ងៃទី១៣ ខែមេសា ឆ្នាំ២០១៥ ពួកគេ ព្រមទាំងព្រះសង្ឃ៣អង្គ ត្រូវបានដោះលែងឲ្យនៅក្រៅឃុំបណ្តោះអាសន្ន ។ សកម្មជនគណបក្សសង្គ្រោះជាតិទាំង១១នាក់ ត្រូវតុលាការកោះហៅឲ្យចូលខ្លួនបំភ្លឺយ៉ាងតិច៣ដងហើយ ៕ដកស្រង់ពីសារព័ត៌មានសម្លេងប្រជាធិបតេយ្យ ចេញផ្សាយថ្ងៃទី១០ ខែ មិថុនា ឆ្នាំ២០១៥។