-
ក្រសួងការបរទេសអាមេរិកបន្តគាំទ្រដំណើរការប្រជាធិបតេយ្យនិងសិទ្ធិមនុស្សនៅកម្ពុជា
- Issue Date 15-Jun-2015
ក្រសួងការបរទេសអាមេរិក និងទីភ្នាក់ងារអាមេរិកសំរាប់អភិវឌ្ឍន៍អន្តរជាតិ (USAID) ទើបតែបានផ្ញើរបាយការណ៍មួយ ទៅកាន់សភាអាមេរិកកាលពីថ្ងៃទី១១មិថុនាកន្លងទៅ ដែលក្នុងនោះក៍មាននិយាយពីប្រទេសកម្ពុជាផងដែរ។របាយការណ៍ ស្តីពី ដំណើរការប្រជាធិបតេយ្យនិងសិទ្ធិមនុស្សនៅតំបន់អាស៊ីនេះ បានចាត់ទុកដំណើរការប្រជាធិបតេយ្យ និងការលើកកម្ពស់សិទ្ធិមនុស្សនៅកម្ពុជាថា ជាបញ្ហាអាទិភាពរបស់អាមេរិក។ផ្នែកមួយនៃរបាយការណ៍របស់ក្រសួងការបរទេសអាមេរិក និងទីភ្នាក់ងារអាមេរិកសំរាប់អភិវឌ្ឍន៍អន្តរជាតិ (USAID) ដែលបានផ្ញើទៅសភាអាមេរិកកាលពីថ្ងៃទី១១មិថុនាកន្លងទៅ បានរៀបរាប់ពីដំណើរវិវត្តន៍នៃលទ្ធិប្រជាធិបតេយ្យនិងការគោរពសិទ្ធិមនុស្សនៅកម្ពុជា ពិសេសនៅក្រោយពីការបោះឆ្នោតជាតិកាលពីខែកក្កដាឆ្នាំ២០១៣កន្លងទៅ។ របាយការណ៍នេះ បានកត់សំគាល់ថា គណបក្សប្រឆាំងបានបង្កើនចំនួនកៅអីច្រើននៅក្នុងរដ្ឋសភា ប៉ុន្តែបានធ្វើពហិការមិនចូលរួមប្រជុំសភានោះទេ ដើម្បីទាមទារឲ្យមានកំណែរទម្រង់មួយចំនួន ដូចជា ការបង្កើតច្បាប់បោះឆ្នោតថ្មី និងការបង្កើតគណៈកម្មាធិការជាតិរៀបចំការបោះឆ្នោតថ្មីជាដើម។ប៉ុន្តែជាមួយនឹងចំណុចវិជ្ជមាននេះ របាយការណ៍ក៍បានលើកឡើងពីក្តីព្រួយបារម្ភនានាផងដែរ ជុំវិញសេចក្តីព្រាងច្បាប់ស្តីពីសមាគមនិងអង្គការមិនមែនរដ្ឋាភិបាល, សេចក្តីព្រាងច្បាប់ ស្តីពីការប្រឆាំងឧក្រិដ្ឋកម្មតាមបច្ចេកវិទ្យា (Cybercrime) និងច្បាប់ស្តីពីសហជីពជាដើម។ សហរដ្ឋអាមេរិកតាមរយៈរបាយការណ៍នេះ បានអំពាវនាវឲ្យមានការចូលរួមពិភាក្សាដោយបើកចំហរមួយទៅលើសេចក្តីព្រាងច្បាប់ទាំងនេះ មុនពេលបញ្ជូនទៅរដ្ឋសភាដើម្បីអនុម័ត។ របាយការណ៍បានលើកឡើងថា ចាប់តាំងពីឆ្នាំ១៩៩០មក USAID និងក្រសួងការបរទេសអាមេរិក បានជួយច្រើនដល់ដំណើរការគាំទ្ររបស់អង្គការសង្គមស៊ីវិលនៅកម្ពុជា។សហរដ្ឋអាមេរិកនឹងបន្តជួយប្រទេសកម្ពុជានៅក្នុងកំណែរទម្រង់ការបោះឆ្នោតបន្តទៀត រួមទាំងដំណើរការចុះឈ្មោះបោះឆ្នោតផងដែរ។ ហើយចុងក្រោយនៃរបាយការណ៍នេះ សង្ឃឹមថា កិច្ចសន្ទនានយោបាយរបស់គណបក្សនយោបាយនៅក្នុងប្រទេសកម្ពុជា និងការលើកកម្ពស់សិទ្ធិសេរីភាពរបស់អង្គការសង្គមស៊ីវិល នឹងនៅតែបន្តមាន ពិសេសនៅក្នុងដំណើរឆ្ពោះទៅកាន់ការបោះឆ្នោតជាតិនៅឆ្នាំ២០១៨ខាងមុខ។សូមបញ្ជាក់ថា របាយការណ៍របស់ក្រសួងការបរទេសអាមេរិក និងទីភ្នាក់ងារអាមេរិកសំរាប់អភិវឌ្ឍន៍អន្តរជាតិ (USAID) ដែលផ្ញើទៅកាន់សភាអាមេរិកកាលពីថ្ងៃទី១១មិថុនានោះ ក៍បានលើកឡើងពីដំណើរការប្រជាធិបតេយ្យ និងសិទ្ធិមនុស្សនៅប្រទេសមួយចំនួនទៀត នៅអាស៊ីប៉ាស៊ីហ្វិច រួមមានប្រទេសភូមា រឺម៉ីយ៉ាន់ម៉ា ប្រទេសថៃ និងទីក្រុងហុងកុងផងដែរ។របាយការណ៍នេះ បានធ្វើឡើង នៅក្រោយដំណើរទស្សនកិច្ចរបស់ លោក Scott Busby ឧបការីរងរដ្ឋមន្ត្រីក្រសួងការបរទេសសហរដ្ឋអាមេរិក ទទួលបន្ទុកផ្នែកលទ្ធិប្រជាធិបតេយ្យ សិទ្ធិមនុស្សនិងការងារ នៅកម្ពុជាកាលពីថ្ងៃទី១និងទី២ខែមិថុនាឆ្នាំ ២០១៥កន្លងទៅនេះ៕ដកស្រង់ពីវិទ្យុបារាំងចេញផ្សាយថ្ងៃទី១៤ ខែ មិថុនា ឆ្នាំ២០១៥។