-
សហរដ្ឋអាមេរិកបន្តជំរុញឲ្យកម្ពុជាមានតម្លាភាពក្នុងដំណើរការបង្កើតច្បាប់
- Issue Date 15-Jun-2015
រដ្ឋាភិបាលសហរដ្ឋអាមេរិក លើកឡើងថា ខ្លួននៅតែបន្តជំរុញឲ្យមានការសន្ទនា និងអំពាវនាវឲ្យកម្ពុជាមានតម្លាភាពក្នុងដំណើការនៃការបង្កើតច្បាប់ ខណៈរដ្ឋាភិបាលបាន និងកំពុងរៀបចំសេចក្តីព្រាងច្បាប់មួយចំនួន ដែលសង្គមស៊ីវិលអះអាងថានឹងរឹតត្បិតដល់សេរីភាពក្នុងការធ្វើប្រតិបត្តិការ និងការបញ្ចញមតិរបស់ខ្លួន និងប្រជាពលរដ្ឋ ។របាយការណ៍របស់ក្រសួងការបរទេសសហរដ្ឋអាមេរិកស្តីអំពីលទ្ធិប្រជាធិបតេយ្យនៅតំបន់អាស៊ី ដែលបានចេញផ្សាយកាលពីថ្ងៃម្សិលមិញ ឲ្យដឹងថា នៅដើមឆ្នាំ២០១៥នេះ រដ្ឋសភាកម្ពុជាបានអនុម័តច្បាប់ពីពាក់ព័ន្ធនឹងការបោះឆ្នោត ។ របាយការបញ្ជាក់ថា គណបក្សកាន់អំណាច និងគណបក្សប្រឆាំងបានរួមគ្នាអនុម័តច្បាប់ទាំងពីរនេះ ដោយមិនបានបើកឲ្យមានការពិភាក្សាគ្រប់គ្រាន់ជាមួយសង្គមស៊ីវិលនោះទេ ហើយផ្នែកខ្លះនៃច្បាប់នេះត្រូវបានរងការរិះគន់ពីសង្គមស៊ីវិលថា បានរឹតត្បិតដល់សកម្មភាព និងសិទ្ធិក្នុងការបញ្ចេញមតិ និងការជួបជុំរបស់របស់អង្គការសង្គមស៊ីវិល ក្នុងកំឡុងពេលឃោសនាបោះឆ្នោត ។របាយការណ៍ដដែលក៏បានលើកឡើងទៀតថា ច្បាប់ស្តីពីសមាគម និងអង្គការមិនមែនរដ្ឋាភិបាល ដែលរដ្ឋាភិបាលបានអនុម័ត ហើយគ្រោងនឹងបញ្ជូនឲ្យសភាអនុម័ននៅពេលខាងមុខនេះ ក៏អាចគំរាមកំហែងដល់អង្គការសង្គមស៊ីវិលផងដែរ ។ របាយការណ៍បន្តថា ទោះបីជាសេចក្តីព្រាងច្បាប់នេះត្រូវបានគេផ្សព្វផ្សាយម្តងកាលពីឆ្នាំ២០១១ និងបានបើកឲ្យមានការពិភាក្សាជាសាធារណៈ៤ដងក្តី ក៏ខ្លឹមសារខ្លះនៃសេចក្តីព្រាងច្បាប់នេះរឹតត្បិតអង្គការសង្គមស៊ីលមិនឲ្យធ្វើសកម្មភាពដោយសេរីបាន ។របាយការណ៍បន្ថែមថា រដ្ឋាភិបាលសហរដ្ឋអាមេរិកគាំទ្រដល់សង្គមស៊ីវិលក្នុងការតស៊ូមតិ ដើម្បីឲ្យមានការពិនិត្យឡើងវិញទៅលើច្បាប់ឧក្រិដ្ឋកម្មតាមប្រព័ន្ធបច្ចេកវិទ្យា និងព័ត៌មាន និងច្បាប់ស្តីពីសហជីព ដើម្បីឲ្យស្របទៅតាមសិទ្ធជាមូលដ្ឋានរបស់ប្រជាពលរដ្ឋ ។សហរដ្ឋអាមេរិកក៏បានធ្វើការក្រើនរំឭកថា «លទ្ធិប្រជាធិបតេយ្យគឺលើសពីលទ្ធភាពក្នុងការបោះឆ្នោតដោយសេរីនៅឯធុងឆ្នោតនោះទេ ។ លទ្ធិប្រជាធិបតេយ្យក៏ស្ដីលទ្ធភាពរបស់ប្រជាពលរដ្ឋក្នុងការធ្វើឲ្យរដ្ឋាភិបាលរបស់ខ្លួនមានគណនេយ្យភាពជារៀងរាល់ថ្ងៃផងដែរ» ។អ្នកនាំពាក្យអង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រី លោក ទិត សុធា មានប្រសាសន៍ថា ការលើកឡើងរបស់ក្រសួងការបរទេសសហរដ្ឋអាមេរិកនេះជាការវិនិច្ឆ័យដោយមិនមានអព្យាក្រិត្យភាព និងបានទទួលព័ត៌មានតែពីខាងសង្គមស៊ីវិល ។ លោកថា សហរដ្ឋអាមេរិកតាំងតែពីដើមមកមិនដែលមើលឃើញពីកិច្ចខិតខំប្រឹងប្រែងរបស់រដ្ឋាភិបាលនោះទេ ។ លោក ទិត សុធា បន្ថែមថា សង្គមស៊ីវិលមិនគួរមានការបារម្ភពីច្បាប់ទាំងនេះពេកទេ ហើយស្នើឲ្យសង្គមស៊ីវិលរង់ចាំតាមដានសេចក្តីព្រាងច្បាប់នេះបន្តទៀតនៅពេលដែលរដ្ឋសភាជជែកដេញដោលអំពីសេចក្តីព្រាងច្បាប់នេះ ។លោកមានប្រសាសន៍ថា «ពីព្រោះមុននឹងសម្រេចអនុម័តដោយរដ្ឋសភាយកមកប្រើប្រាស់ តែងតែមានការជជែកដេញដោលគ្នានៅក្នុងសភាទៀត ហើយមានតំណាងគណបក្សនយោបាយដែលលប្រជាពលរដ្ឋផ្តល់សេចក្តីទុកចិត្ត អញ្ចឹងយើងកុំបង្កើតការភ័យព្រួយហួសពីតំណាងរាស្ត្រដែលគេមានតួនាទីជាអ្នកពិនិត្យ ពិភាក្សា និងអនុម័តច្បាប់» ។លោក ទិត្យ សុធា ថាលោកមិនអាចបញ្ជាក់បានទេថា សេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាបាល នឹងត្រូវបញ្ជូនទៅកាន់រដ្ឋសភានៅពេលណានោះទេ ៕ដកស្រង់ពីសារព័ត៌មានសម្លេងប្រជាធិបតេយ្យ ចេញផ្សាយថ្ងៃទី១២ខែ មិថុនា ឆ្នាំ២០១៥។