-
ពលរដ្ឋនៅព្រះវិហារខ្វះដីធ្វើស្រែរដូវវស្សាដោយសារជម្លោះដីជាមួយក្រុមហ៊ុន
- Issue Date 16-Jun-2015
ទំនាស់ដីធ្លីរវាងប្រជាពលរដ្ឋ និងក្រុមហ៊ុនដីសម្បទានសេដ្ឋកិច្ច កំពុងកើតមានច្រើនឡើងៗក្នុងស្រុកទាំង៧ នៅខេត្តព្រះវិហារ។ក្រុមសង្គមស៊ីវិលមើលឃើញថា ទោះបីជាមានបញ្ហាទំនាស់ដីធ្លីច្រើនក៏ដោយ ក៏ប៉ុន្តែអាជ្ញាធរហាក់មានវិធានការយឺតយ៉ាវក្នុងការដោះស្រាយដែលបណ្ដាលឲ្យប្រជាពលរដ្ឋរងគ្រោះជួបបញ្ហាជាច្រើន រួមមានការចាប់ខ្លួនដាក់ពន្ធនាគារ ឬក៏បាត់បង់ដីស្រែចម្ការជាដើម។អ្នកភូមិប្រមាណ ៦នាក់ នៅឃុំសង្កែ២ ស្រុកឆែប ខេត្តព្រះវិហារ កំពុងនាំគ្នាគេចចេញពីផ្ទះជាបណ្ដោះអាសន្ន ដោយសារតែភ័យខ្លាចកម្លាំងប៉ូលិសតាមចាប់ខ្លួនពួកគេបញ្ជូនទៅតុលាការ។ការភ័យខ្លាចនេះ កើតមានឡើងបន្ទាប់ពីកាលពីល្ងាចថ្ងៃទី១៣ ខែមិថុនា កន្លងទៅ ប៉ូលិសបានបញ្ជូនកម្លាំង ១ក្រុម ប៉ុនប៉ងចាប់ខ្លួននៅពេលដែលអ្នកភូមិ១ក្រុមបាននាំគ្នាទៅសាបព្រោះគ្រាប់ស្រូវលើដីស្រែរបស់ពួកគេដែលធ្លាប់តែដាំដុះ ប៉ុន្តែត្រូវក្រុមហ៊ុនចិន ឈ្មោះ រួយ ហ្វេង (Ruy Feng) យកដាំអំពៅអស់ទៅហើយនោះ។តំណាងសហគមន៍ទំនាស់ដីធ្លីឃុំសង្កែ២ គឺលោក ដា រី។លោកអះអាងកាលពីរសៀលអាទិត្យ ទី១៤ ខែមិថុនា ថា អ្នកភូមិរបស់លោក ៥-៦នាក់ កំពុងភ័យខ្លាចកម្លាំងប៉ូលិសមកចាប់ខ្លួន។ បុរសដដែលបញ្ជាក់ថា នៅរដូវវស្សាឆ្នាំនេះ អ្នកភូមិរបស់គាត់ជាច្រើនគ្រួសារបានខ្វះដីធ្វើស្រែចិញ្ចឹមជីវិត ដោយសារតែដីស្រែមួយភាគត្រូវក្រុមហ៊ុនចិន ឈ្មោះ រួយ ហ្វេង រំលោភយកទៅដាំអំពៅតាមរូបភាពដីសម្បទានសេដ្ឋកិច្ច។ បញ្ហាខ្វះដីស្រែនេះ កាលពីថ្ងៃទី១៣ ខែមិថុនា កន្លងទៅ ប្រជាពលរដ្ឋខ្លះបាននាំគ្នាទៅសាបព្រោះគ្រាប់ស្រូវលើអតីតដីស្រែរបស់ពួកគេ ដែលក្រុមហ៊ុនចិន ភ្ជួរដាំអំពៅអស់ទៅហើយ ជាហេតុធ្វើឱ្យអាជ្ញាធរបញ្ជូនកម្លាំងប៉ូលិសទៅរកចាប់ខ្លួន។លោក ដា រី៖ «ប្រជាជននៅតែមានការភ័យព្រួយ ព្រោះថា វាអត់មានការដោះស្រាយ ហើយយើងធ្វើនេះតាមសន្តិវិធី តែគេមិនធ្វើតាមសន្តិវិធី គេយកអាវុធយកប៉ូលិសមកគំរាម»។តំណាងសហគមន៍ទំនាស់ដីធ្លីដដែលបញ្ជាក់ថា បើទោះបីជារដ្ឋាភិបាលបានផ្ដល់ដីសម្បទានសេដ្ឋកិច្ចទៅឱ្យក្រុមហ៊ុនចិន ដាំអំពៅ ហើយប៉ះពាល់លើដីស្រែរបស់អ្នកភូមិជាច្រើនហិកតារក៏ដោយ ក៏រហូតមកដល់ពេលនេះមិនមានអាជ្ញាធរខេត្តព្រះវិហារ ឬក៏អាជ្ញាធរស្រុកឆែប ណាចេញមុខដោះស្រាយជូនពួកគាត់ឱ្យបានឆាប់រហ័សនៅឡើយ។ទោះយ៉ាងណា វិទ្យុអាស៊ីសេរី មិនអាចទាក់ទងអភិបាលរង និងជាអ្នកនាំពាក្យសាលាខេត្តព្រះវិហារ លោក ស៊ូ សេរី ដើម្បីសុំការពន្យល់ជុំវិញបញ្ហាដែលអ្នកភូមិសង្កែ២ អះអាងថា ពួកគេកំពុងភ័យខ្លាចរឿងប៉ូលិសតាមចាប់ខ្លួននោះបានថាយ៉ាងណានៅឡើយទេ នៅថ្ងៃទី១៤ ខែមិថុនា។ចំណែកអភិបាលស្រុកឆែប លោក សុខ សានតារា បានឆ្លើយតបថា រឿងដែលប៉ូលិសបញ្ជូនកម្លាំងទៅរកចាប់ខ្លួនប្រជាពលរដ្ឋខ្លះនៅឃុំសង្កែ២នោះ គឺបណ្ដាលមកពីប្រជាពលរដ្ឋ ៣-៤គ្រួសារដែលនៅតែចង់បានដីរបស់ក្រុមហ៊ុន ហើយយកថ្នាំគីមីទៅបាញ់សម្លាប់កូនអំពៅ ព្រមទាំងយកគ្រាប់ស្រូវទៅ ព្រោះលើដីដែលក្រុមហ៊ុនចិន ភ្ជួររាស់រួចហើយផង។អភិបាលស្រុកដដែលបញ្ជាក់ថា កាលពីមុនកន្លែងដែលអ្នកភូមិចូលទៅសាបព្រោះនោះ គឺជាដីស្រែរបស់គាត់មែន ក៏ប៉ុន្តែជាច្រើនខែមកហើយ គណៈកម្មការរបស់ស្រុកឆែប បានចុះទៅដោះស្រាយការប៉ះពាល់ដោយផ្ដិតមេដៃ និងទូទាត់សំណងចប់សព្វគ្រប់ ក៏ប៉ុន្តែអ្នកភូមិខ្លះនៅតែបំពានមកលើក្រុមហ៊ុនដដែល៖ «និយាយអំពីសច្ចភាពទៅ គឺថាយើងបានសម្របសម្រួលឱ្យបងប្អូនប្រជាពលរដ្ឋជាង ១.០០០ហិកតារនៅសង្កែ២ ហើយសល់តែ ២ហិកតារទេ ចំពោះក្រុមហ៊ុននោះ ក៏ប៉ុន្តែប៉ុន្មានថ្ងៃនេះមានបងប្អូន តែគេភ្ជួរហើយ គឺមានទម្លាប់មួយយកស្រូវទៅព្រោះ ហើយបើគេដាំអំពៅគឺគាត់កាប់ចោល»។អភិបាលស្រុកឆែប លោក សុខ សាន តារា បញ្ជាក់ថា អាជ្ញាធរមិនចង់ប្រើកម្លាំងប៉ូលិសទៅចាប់ខ្លួនប្រជាពលរដ្ឋទេ ដោយកាលពីព្រឹកថ្ងៃអាទិត្យ ទី១៤ ខែមិថុនា លោកបានប្រាប់ទៅមេឃុំសង្កែ២ ឱ្យជួយអប់រំប្រជាពលរដ្ឋទាំងនោះជាថ្មីទៀត ដើម្បីកុំឱ្យទៅឆាឆៅ និងរំខានដល់ការធ្វើអាជីវកម្មរបស់ក្រុមហ៊ុនតទៅទៀត ពីព្រោះក្រុមហ៊ុនទាំងនោះមិនមែនមកយកដីខុសច្បាប់ទេ។នៅខេត្តព្រះវិហារ ទាំងមូល ទំនាស់ដីធ្លីរវាងប្រជាពលរដ្ឋ និងក្រុមហ៊ុនដីសម្បទានសេដ្ឋកិច្ច មិនមែនប៉ះពាល់តែលើប្រជាពលរដ្ឋនៅស្រុកឆែបប៉ុណ្ណោះទេ គឺប្រជាពលរដ្ឋរស់នៅស្រុកចំនួន ៦ទៀត ដូចជាស្រុករវៀង ស្រុកជាំក្សាន្ត ស្រុកត្បែងមានជ័យ ស្រុកជ័យសែន ស្រុកសង្គមថ្មី និងសស្រុកគូលែន ក៏កំពុងប៉ះពាល់ដូចគ្នាដែរ។កាលពីថ្ងៃទី២ ទី៣ ខែមិថុនា កន្លងទៅសហគមន៍ទំនាស់ដីធ្លីមកពីស្រុកចំនួន ៧ បានលើកគ្នាទៅប្រមូលផ្ដុំបំណងតវ៉ាជាទ្រង់ទ្រាយធំនៅក្នុងទីរួមខេត្តព្រះវិហារ ម្ដងមកហើយ ក៏ប៉ុន្តែគម្រោងតវ៉ាជាទ្រង់ទ្រាយធំនោះត្រូវបរាជ័យ ដោយសារតែប៉ូលិសបានរាយបណ្ដាក់កម្លាំងរារាំងលើដងផ្លូវជាច្រើនកំណាត់មិនឱ្យអ្នកដំណើរចូលទៅកាន់ទីរួមខេត្តបាន។ កាលណោះសហគមន៍ទំនាស់ធ្លីប្រមាណ ៣០០នាក់ ដែលចូលទៅដល់ទីរួមខេត្តព្រះវិហារ បានលើកគ្នាទាមទារឱ្យអាជ្ញាធរខេត្តត្រូវតែដោះស្រាយបញ្ហាជម្លោះដីធ្លីឱ្យបានឆាប់រហ័ស ដើម្បីឱ្យពួកគេមានដីធ្វើស្រែចម្ការក្នុងរដូវវស្សាឆ្នាំនេះ។អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តព្រះវិហារ លោក ឡោ ចាន់ មានប្រសាសន៍ថា លោកបានដឹងអំពីព័ត៌មានស្ដីពីប៉ូលិសដែលបញ្ជូនកម្លាំងដើម្បីចាប់ខ្លួនប្រជាពលរដ្ឋនៅឃុំសង្កែ២នោះ។ លោក ឡោ ចាន់ រកឃើញថា មូលហេតុដែលប្រជាពលរដ្ឋជាច្រើននាំគ្នាចូលទៅសាបព្រោះស្រូវនៅលើដីដែលក្រុមហ៊ុនចិន ភ្ជួរដាំអំពៅនោះ គឺដោយសារតែក្រុមហ៊ុនបានឈូសឆាយរំលោភដីស្រែរបស់ពួកគាត់។មន្ត្រីអង្គការសិទ្ធិមនុស្សដដែលបញ្ជាក់ថា ការដែលក្រុមហ៊ុនចិន ឈូសរំលោភយកដីស្រែរបស់ប្រជាពលរដ្ឋនោះ មិនមានអាជ្ញាធរណាដោះស្រាយទេ ក៏ប៉ុន្តែនៅពេលដែលប្រជាពលរដ្ឋនាំគ្នាមកតវ៉ាយកដីវិញ បែរជាមានសមត្ថកិច្ចបញ្ជូនកម្លាំងទៅបង្ក្រាប៖ «យើងឃើញថា ក្រុមហ៊ុនពិតជាបានរំលោភបទបញ្ជា ០០១ ជាពិសេសដីស្រែរបស់ប្រជាពលរដ្ឋដែលគាត់កំពុងបង្កបង្កើនផលជាក់ស្ដែង»។វិបត្តិទំនាស់ដីធ្លីរវាងប្រជាពលរដ្ឋ និងក្រុមហ៊ុនដីសម្បទានសេដ្ឋកិច្ចនៅខេត្តព្រះវិហារ ដែលកាន់តែកើតមានច្រើនឡើងៗ តាំងតែពី ៣-៤ឆ្នាំមុន រហូតមកដល់ពេលនេះ គឺអាជ្ញាធររដ្ឋាភិបាលហាក់ដូចជាដោះស្រាយបានលទ្ធផលតិចតួច។ ចំណែកការតវ៉ារបស់ប្រជាពលរដ្ឋនៅកន្លែងខ្លះគឺអាជ្ញាធរមិនត្រឹមតែដោះស្រាយមិនបានលទ្ធផលទេ បែរជាចង់រករឿងអង្គការក្រៅរដ្ឋាភិបាលដែលកំពុងតាមឃ្លាំមើលការគោរពសិទ្ធិនៅទីនោះទៀតផង។កាលពីថ្ងៃទី៣ ខែមិថុនា កន្លងទៅ នៅពេលដែលសហគមន៍ទំនាស់ដីធ្លីមកពី ៧ស្រុក បានលើកគ្នាទៅតវ៉ាក្នុងទីរួមខេត្ត គឺអភិបាលរងខេត្តព្រះវិហារ លោក ស៊ូ សេរី បានដាក់ការសង្ស័យទៅលើសមាគមការពារសិទ្ធិមនុស្សអាដហុក និងអង្គការពន្លកខ្មែរ ថាអាចជាអ្នកដឹកនាំប្រជាពលរដ្ឋទាំងនោះឱ្យឡើងទៅតវ៉ា។ការដាក់ការសង្ស័យនេះ ត្រូវបានអង្គការក្រៅរដ្ឋាភិបាលបញ្ចេញប្រតិកម្មតបតវិញថា គឺជាការលាបពណ៌ខុសពីការពិតមួយ និងក៏ជាការគំរាមកំហែងទៅលើសកម្មជនអ្នកការពារសិទ្ធិមនុស្សក្រៅរដ្ឋាភិបាលទៀតផង៕ដកស្រង់ពីវិទ្យុអាស៊ីសេរី ចេញផ្សាយថ្ងៃទី១៥ ខែ មិថុនា ឆ្នាំ២០១៥។