-
សាលាដំបូងកោះហៅមន្ត្រីសិទ្ធិមនុស្សល្បីឈ្មោះមួយរូបតាមបណ្តឹងរបស់មន្ត្រីតុលាការ
- Issue Date 29-Jun-2015
សាលាដំបូងរាជធានីភ្នំពេញ ចេញដីកាបង្គាប់ឲ្យអ្នកឃ្លាំមើលសិទ្ធិមនុស្សល្បីឈ្មោះមួយរូប ចូលបំភ្លឺនៅពាក់កណ្តាលខែក្រោយនេះ ជុំវិញបណ្តឹងរបស់មន្ត្រីតុលាការខេត្តសៀមរាប ខណៈបណ្តឹងរបស់មន្ត្រីសិទ្ធិមនុស្សមិនទាន់យកមកដោះស្រាយនៅឡើយ ។ ការកោះហៅនេះ ធ្វើឡើងបន្ទាប់ពីលោក នី ចរិយា រិះគន់មន្ត្រីតុលាការខេត្តសៀមរាប ថាបានឃុបឃិតគ្នាប្រព្រឹត្ដអំពើពុករលួយ យកដីពលរដ្ឋខ្មែរប្រគល់ឲ្យសហគមន៍ជនជាតិវៀតណាម និងបានចាប់ខ្លួនពលរដ្ឋខ្មែរពីរនាក់ដាក់ពន្ធនាគារ ដែលលោកថាធ្វើឡើងខុសនីតិវិធីច្បាប់ ។ប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុក លោក នី ចរិយា ប្រាប់ VOD នៅថ្ងៃចន្ទនេះថា សាលាដំបូងរាជធានីភ្នំពេញបានចេញដីកាបង្គាប់ឲ្យរូបលោក ចូលទៅបំភ្លឺនៅថ្ងៃទី១៣ ខែកក្កដា ឆ្នាំ២០១៥ ក្រោមបណ្តឹងរបស់ចៅក្រមស៊ើបសួរ និងព្រះរាជអាជ្ញារងខេត្តសៀមរាប ដែលប្តឹងលោកពីបទបរិហារបង្កាច់កេរិ៍្ត បរិហាកេរ្តិ៍ជាសាធារណៈ និងបទផ្សព្វផ្សាយនូវការអត្ថាធិប្បាយដើម្បីដាក់សម្ពាធលើយុត្តាធិការ ។ លោកបន្តថា លោកនឹងចូលទៅបំភ្លឺតាមដីកាកោះរបស់តុលាការនោះ ។ទោះជាយ៉ាងណា លោក នី ចរិយា យល់ថាការអនុវត្តនីតិវិធីរបស់តុលាការនេះ លម្អៀងទៅរកអ្នកនយោបាយ ឬអ្នកមានអំណាច ខណៈពាក្យបណ្តឹងរបស់លោកដែលប្តឹងមន្ត្រីតុលាការខេត្តសៀមរាបដាក់ទៅសាលាឧទ្ធរណ៍ ឧត្តមក្រុមប្រឹក្សានៃអង្គចៅក្រម និងក្រសួងយុត្តិធម៌មុនបណ្តឹងរបស់មន្ត្រីតុលាការនោះ តែមិនត្រូវបានយកទៅដោះស្រាយ ។លោកថា «ទាក់ទងទៅនឹងករណីឪពុកលោក ថោង សារ៉ាត់ និងករណីលោក ថោង សារ៉ាត់ ហ្នឹងគឺថាគ្រាន់តែនាយករដ្ឋមន្ត្រីពីពេលព្រឹក សុំឲ្យឧត្តមក្រុមប្រឹក្សានៃអង្គចៅក្រមធ្វើការពិនិត្យឡើងវិញ ឧត្តមក្រុមប្រឹក្សានៃអង្គចៅក្រមហ្នឹងបានកោះប្រជុំភ្លាមៗ រហូតដល់ល្ងាចឡើងរហូតដល់ល្ងាចឡើង ធ្វើការដកតំណែងប្រធានតុលាការមួយភ្លាម ដែលខុសពីករណីរបស់យើង ដែលយើងដាក់ប្តឹងទៅមកដល់ពេលនេះ គឺថាវាមួយខែជាង ហើយយើងអត់ឃើញការឆ្លើយតបអីទាល់តែសោះ ពីស្ថាប័នទាំងបីហ្នឹង» ។អ្នកគ្រប់គ្រងបច្ចេកទេសឃ្លាំមើលការរំលោភសិទ្ធិមនុស្សអង្គការលីកាដូ លោក អំ សំអាត មានប្រសាសន៍ថា ការកោះហៅមន្ត្រីឃ្លាំមើលសិទ្ធិមនុស្សអាដហុកឲ្យចូលបំភ្លឺនោះ ជាការរឹតត្បិតសេរីភាពបញ្ចេញមតិ និងគំរាមកំហែង បំភិតបំភ័យលើមន្ត្រីសង្គមស៊ីវិលដែលនិយាយពីចំណុចខ្វះខាតរបស់មន្ត្រីតុលាការខេត្តសៀមរាបនោះ ។ លោកថា «នេះជាសិទ្ធិសេរីភាពក្នុងការបញ្ចេញមតិរបស់ពលរដ្ឋនីមួយៗ របស់បុគ្គលិករបស់អង្គការនីមួយៗ ហើយប្រសិនជាមានការចោទប្រកាន់ណាមួយនោះ ដែលយើងគិតថា វាជាការបំបិទសិទ្ធិសេរីភាពក្នុងការបញ្ចេញមតិ ក៏ដូចជាការគំរាមកំហែងទៅលើបុគ្គលិកនៃអង្គការ សមាគមការពារសិទ្ធិមនុស្ស» ។លោក អំ សំអាត បន្ថែមទៀតថា ករណីនេះតុលាការត្រូវទម្លាប់បទចោទ ឬតម្កល់រឿងនោះទុកមិនចាត់ការ ចៀសវៀងបង្ហាញពីរូបភាពគំរាមកំហែងលើមន្ត្រីឃ្លាំមើលសិទ្ធិមនុស្ស ។VOD មិនអាចទាក់ទងប្រធានសាលាដំបូងរាជធានីភ្នំពេញបាននៅឡើយ ។លោក នី ចរិយា បានធ្វើសន្និសីទសារព័ត៌មានមួយ ចោទព្រះរាជអាជ្ញារង លោក សុខ កែវបណ្ឌិត និងចៅក្រមស៊ើបសួរ លោក គី ឬទ្ធី បានឃុបឃិតគ្នាប្រព្រឹត្ដអំពើពុករលួយ យកដីពលរដ្ឋខ្មែរប្រគល់ឲ្យសហគមន៍ជនជាតិវៀតណាម និងបានចាប់ខ្លួនពលរដ្ឋពីរនាក់ ដាក់ពន្ធនាគារធ្វើឡើងខុសនីតិវិធីច្បាប់ ហើយសមាគមអាដហុកបានដាក់ពាក្យប្ដឹងទៅឧត្តមក្រុមប្រឹក្សានៃអង្គចៅក្រម ក្រសួងយុត្ដិធម៌ និងសាលាឧទ្ធរណ៍ ដើម្បីកោះហៅមន្ដ្រីទាំងនោះទៅបំភ្លឺលើករណីនេះ ។ប៉ុន្ដែបន្ទាប់ពីមានការចោទប្រកាន់មន្ដ្រីតុលាការខេត្ដសៀមរាប បានតម្រូវឲ្យសមាគមការពារសិទ្ធិមនុស្ស ធ្វើការកែតម្រូវនូវបទចោទថា តុលាការនេះ បានចាប់ខ្លួនពលរដ្ឋពីរនាក់ដាក់ពន្ធនាគារខុសច្បាប់ ដោយតុលាការយល់ថា ការចោទប្រកាន់នេះ ជារូបភាពញុះញង់នាំឲ្យមានការរើសអើងពូជសាសន៍ ៕ដកស្រង់ពីសារព័ត៌មានសម្លេងប្រជាធិបតេយ្យ ចេញផ្សាយថ្ងៃទី ២៩ ខែ មិថុនា ឆ្នាំ២០១៥។