-
សហភាពអឺរ៉ុបស្នើឲ្យសភាបើកកិច្ចពិភាក្សាពីច្បាប់អង្គការឲ្យបានទូលំទូលាយ និងមានតម្លាភាព
- Issue Date 02-Jul-2015
គណៈកម្មាធិការកិច្ចការបរទេសសហភាពអឺរ៉ុបបានផ្ញើលិខិតមួយច្បាប់ទៅកាន់ប្រធានរដ្ឋសភា លោក ហេង សំរិន ដោយជំរុញឲ្យរដ្ឋសភាបើកឲ្យមានការពិភាក្សាឲ្យបានទូលំទូលាយ និងមានតម្លាភាព លើសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល ។លិខិតរបស់ប្រធានគណៈកម្មាធិការសហភាពអឺរ៉ុប លោក Elmar Brok ផ្ញើជូនប្រធានរដ្ឋសភា លោក ហេង សំរិន លើកឡើងថា សភាអឺរ៉ុបជឿថាអង្គការសង្គមស៊ីវិលមានតួនាទីដែលមិនអាចជំនួសបានក្នុងការពិនិត្យ និងតាមដានទៅលើការអនុវត្តការងាររបស់រដ្ឋាភិបាល និងរដ្ឋបាលសាធារណៈ ។ លោកថា សភាអឺរ៉ុបមានការចាប់អារម្មណ៍ចំពោះច្បាប់នេះ ។លោក Elmar Brok លើកឡើងទៀតថា លោកបានដឹងថា សភានឹងបើកឲ្យមានការជជែកពិភាក្សាលើសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល ហើយច្បាប់នេះក៏ត្រូវគេមើលឃើញថារដ្ឋសភានឹងអនុម័តនៅពេលឆាប់ៗខាងមុខដែរ ។លោកបន្ថែមក្នុងលិខិតនោះថា«ខ្ញុំអំពាវនាវឲ្យសភាជាតិឲ្យមានការបើកទូលាយ និងមានតម្លាភាពក្នុងការពិភាក្សាលើសេចក្តីព្រាងច្បាប់នេះ និងផ្តល់នូវពេលវេលាគ្រប់គ្រាន់សម្រាប់គ្រប់បក្សនយោបាយ បានបញ្ចេញនូវយោបល់ ដើម្បីឲ្យប្រាកដថា លទ្ធផលដែលបានទទួល នឹងមានការគាំទ្រពីភាគីជំទាស់» ។ក្នុងលិខិតដដែល លោក Elmar Brok ផ្តល់ជាយោបល់ថា ការចុះបញ្ជីសម្រាប់អង្គការសង្គមស៊ីវិលគួរធ្វើឡើងតែសម្រាប់អង្គការ សមាគមធំៗបានហើយ និងមិនគួធ្វើឡើងចំពោះសមាគមនៅតាមមូលដ្ឋាននោះទេ ។ទាក់ទងនឹងសេចក្ដីព្រាងច្បាប់ស្ដីពីសមាគម និងអង្គការមិនមែនរដ្ឋាភិបាលនេះ អ្នកនាំពាក្យរដ្ឋសភា និងជាប្រធានគណៈកម្មការទី៥នៃរដ្ឋសភា លោក ឈាង វុន ឲ្យដឹងនៅព្រឹកថ្ងៃពុធនេះថា គណៈកម្មការទាំងបីនៃរដ្ឋសភាដែលទទួលបន្ទុកពិនិត្យមើលសេចក្តីព្រាងច្បាប់នេះ បានសម្រេចរក្សាខ្លឹមសារនៃសេចក្តីព្រាងច្បាប់នេះឲ្យនៅដដែល ដោយមិនមានការកែប្រែអ្វីនោះទេ ។លោក ឈាង វុន ឲ្យដឹងទៀតថា នៅថ្ងៃទី០៦ ខែមិថុនា គណៈកម្មការលោកនឹងជួបជាមួយមន្ត្រីរដ្ឋាភិបាល ដើម្បីស្នើឲ្យកែលម្អអក្ខរាវិរុទ្ធមួយចំនួន ហើយនៅថ្ងៃទី០៨ ខែមិថុនា នឹងបើកឲ្យមានការពិភាក្សាជាមួយសង្គមស៊ីវិលជាតិ អន្តរជាតិ និងអង្គទូតនានា ។ លោកឲ្យដឹងទៀតថា សិក្ខាសាលាពិព្រោះយោបល់នេះ នឹងត្រូវធ្វើឡើងក្នុងរយៈពេលមួយព្រឹក ឬអាចរហូតដល់ពីរថ្ងៃទៅតាមស្ថានភាពជាក់ស្តែង ។គួរបញ្ជាក់ថា ក្រុមអង្គការសង្គមស៊ិវិលកំពុងធ្វើយុទ្ធនាប្រឆាំងនឹងសេចក្ដីព្រាងច្បាប់ស្ដីពីពីសមាគម និងអង្គការមិនមែនរដ្ឋាភិបាល និងសេចក្ដីព្រាងច្បាប់ស្ដីពីសហជីពផងដែរ ដោយពួកគេយល់ថា សេចក្តីព្រាងច្បាប់ទាំងពីរនោះមានលក្ខណៈគាបសង្កត់ ។សេចក្តីព្រាងច្បាប់ចុងក្រោយ ដែលរដ្ឋាភិបាលបានដាក់ទៅរដ្ឋសភា មាន៩ជំពូក និងមាន៣៩មាត្រា ។ សេចក្ដីព្រាងច្បាប់នោះតម្រូវឲ្យអង្គការសង្គមស៊ីវិលប្រកាន់ជំហរអព្យាក្រិត និងត្រូវផ្ញើរបាយការណ៍បូកសរុបសកម្មភាពការងារ និងរបាយការណ៍ហិរញ្ញវត្ថុប្រចាំឆ្នាំទៅក្រសួងមហាផ្ទៃ និងក្រសួងសេដ្ឋកិច្ច និងហិរញ្ញវត្ថុ ។ ច្បាប់នេះក៏អនុញ្ញាតឲ្យក្រសួងមហាផ្ទៃអាចលុបឈ្មោះអង្គការសង្គមស៊ីវិល ដែលមិនអុវត្តតាមមាត្រាមួយចំនួននៃច្បាប់នេះផងដែរ ៕ដកស្រង់ពីសារព័ត៌មានសម្លេងប្រជាធិបតេយ្យ ចេញផ្សាយថ្ងៃទី ០១ ខែ កក្កដា ឆ្នាំ២០១៥។