-
តំណាងរាស្ត្របក្សប្រឆាំងទាមទារលោក ឈាង វុន សុំទោសជាសាធារណៈ ករណីបណ្តេញចេញពីសភា
- Issue Date 03-Jul-2015
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន ឲ្យដឹងថាលោកនឹងដាក់លិខិតទៅគណៈកម្មាធិការអចិន្ត្រៃយ៍នៃរដ្ឋសភា ដោយទាមទារឲ្យលោក ឈាង វុន អ្នកនាំពាក្យរដ្ឋសភា សុំទោសជាសាធារណៈចំពោះរូបលោក ពាក់ព័ន្ធនឹងករណីមិនអនុញ្ញាតឲ្យលោកផ្តល់បទសម្ភាសន៍ទៅកាន់អ្នកសារព័ត៌មាននៅវិមានរដ្ឋសភា។យោងតាមវីដេអូដែលVODថតបាន កាលពីថ្ងៃពុធ លោក ឈាង វុន បានបណ្តេញតំណាងរាស្ត្រគណបក្សសង្គ្រោះជាតិ លោក អ៊ុំ សំអាន ចេញពីសភាមិនឲ្យផ្តល់សម្ភាសន៍ដល់អ្នកកាសែតពាក់ព័ន្ធនឹងសេចក្តីព្រាងច្បាប់អង្គការ។ ក្នុងពេលនោះ លោក ឈាង វុន ក៏បានឲ្យអ្នកសារព័ត៌មានវិទ្យុអាស៊ីសេរីដែលចង់សម្ភាសន៍លោក អ៊ុំ សំអាន ចេញពីរដ្ឋសភា និងព្រមានថាលើកក្រោយនឹងលែងឲ្យចូលសភា។ លោក ឈាង វុន ថា«កុំឲ្យខ្ញុំឲ្យសន្តិសុខមកអញ្ជើញចេញទៅ យល់នៅ? ព្រោះច្បាប់ នៅក្នុងរដ្ឋសភាគេមានច្បាប់របស់គេ ។ ហៅសន្តិសុខឲ្យខ្ញុំបន្តិចមើល អញ្ជើញពួកគាត់ចេញទៅ» ។លោក អ៊ុំ សំអាន ប្រាប់VODនៅថ្ងៃសុក្រនេះថា«ខ្ញុំនឹងដាក់លិខិតមួយទៅគណៈកម្មាធិការអចិន្ត្រៃយ៍ ទាមទារឲ្យលោក ឈាង វុន សុំទោសជាសាធារណៈ ដូចករណីគាត់និយាយពាក្យព្នងកាលពីមុន។ លោកបានរំលោភសិទ្ធិតំណាងរាស្ត្រ និងអភ័យឯកសិទ្ធិ»។ក្រោយពីការបណ្តេញតំណាងរាស្ត្រគណបក្សសង្គ្រោះជាតិ គណៈកម្មការប្រព្រឹត្តិកម្មអង្គការ សមាគមការពារសិទ្ធិមនុស្សកម្ពុជា(CHRAC) បានចេញថ្លែងការណ៍មួយដោយរំឭកសមាជិករដ្ឋសភាកុំឲ្យ«ជ្រៀតជ្រែកតាមទំនើងចិត្តទៅលើសិទ្ធិ និងឯកសិទ្ធិរបស់សមាជិកសភាដទៃទៀតក្នុងការថ្លែងទៅកាន់អ្នកសារព័ត៌មានដោយសេរី និងបម្រើផលប្រយោជន៍ប្រជាពលរដ្ឋដែលពួកគេធ្វើជាតំណាង»។CHRACក៏បានផ្ដល់អនុសាសន៍ចំពោះរដ្ឋសភាថា រដ្ឋសភាគួរតែរៀបចំទីកន្លែងសមស្របណាមួយនៅក្នុងបរិមាណរដ្ឋសភាសម្រាប់ភ្នាក់ងារសារព័ត៌មាននិងសម្រាប់សមាជិករដ្ឋសភាអាចសម្ដែងមតិជាសាធារណៈបាន។កាលពីថ្ងៃព្រហស្បតិ៍ ក្លិបអ្នកកាសែតកម្ពុជាចាត់ទុកការបណ្តេញអ្នកកាសែតចេញពីវិមានរដ្ឋសភាជាការរំលោភបំពានសិទ្ធិធ្ងន់ធ្ងរ ដោយអំពាវនាវឲ្យស្ថាប័នរដ្ឋ និងតំណាងរាស្ត្រក្នុងរដ្ឋសភា គោរពសិទ្ធិសេរីភាពរបស់អ្នកសារព័ត៌មាន។ សេចក្តីថ្លែងការណ៍របស់ក្លិបអ្នកកាសែតកម្ពុជាឲ្យដឹងថាក្លិបអ្នកកាសែតសម្តែងការ«សោកស្តាយយ៉ាងខ្លាំង បន្ទាប់ពីទទួលបានព័ត៌មានថាឯកឧត្តម ឈាង វុន តំណាងរាស្ត្រ និងជាអ្នកនាំពាក្យរដ្ឋសភា បានបណ្តេញអ្នកសារព័ត៌មានចេញពីបរិវេណរដ្ឋសភា កាលពីថ្ងៃទី០១ ខែកក្កដា ឆ្នាំ២០១៥ ដោយរួមទាំងប្រើពាក្យសម្តី និងឥរិយាបថខុសពីប្រក្រតីក្នុងនាមជាមន្ត្រីស្ថាប័នកំពូលរបស់ជាតិទៅកាន់អ្នកសារព័ត៌មានដែលកំពុងបំពេញបេសកកម្មតាមវិជ្ជាជីវៈ»។ឆ្លើយតបនឹងបញ្ហាទាំងនេះ លោក ឈាង វុន ប្រាប់VODថាលោកលែងទទួលស្គាល់លោក អ៊ុំ សំអាន ទៀតហើយ ហើយលោកថាការដាក់លិខិតទៅគណៈកម្មាធិការអចិន្ដ្រៃយ៍រដ្ឋសភានឹងមិនទទួលបានជោគជ័យនោះទេ។ លោកមានប្រសាសន៍ថា«ប្រាប់អាហ្នឹង(លោក អ៊ុំ សំអាន) ខ្ញុំអត់ទទួលស្គាល់វាទៀតហើយ អាមនុស្សអញ្ចឹង អាមនុស្ស ដែលអត់ដឹងខុសត្រូវអញ្ចឹង យើងឆ្កួតជាមួយវា អត់បានទេ ទុកឲ្យវាឆ្កួតម្នាក់ឯងទៅ»។ ទាក់នឹងសេចក្តីថ្លែងការណ៍របស់ក្លិបកាសែត លោក ឈាង វុន លើកឡើងថាមុនចេញសេចក្តីថ្លែងការណ៍ ក្លិបអ្នកកាសែតត្រូវយល់ឲ្យច្បាស់ពីអ្វី ដែលបានកើតឡើងជាមុនសិន។លិខិតរបស់លោក ឈាង វុន ចុះថ្ងៃទី០១ខែកក្កដា និងដាក់ទៅប្រធានរដ្ឋសភា លោក ហេង សំរិន ឲ្យដឹងថានៅពេលលោកកំពុងនិយាយជាមួយអ្នកសារព័ត៌មាននៅវិមានរដ្ឋសភា តំណាងរាស្ត្រគណបក្សសង្គ្រោះជាតិ លោក អ៊ុំ សំអាន បានចូលជ្រៀតជ្រែក ហើយទាមទារធ្វើកិច្ចសម្ភាសន៍ជាមួយអ្នកសារព័ត៌មានដែរ។ លោកបានស្នើសុំឲ្យលោក ហេង សំរិន យកករណីនេះមកពិចារណា ដោយចាត់ទុកថាលោក អ៊ុំ សំអាន មិនគោរពតាមការណែនាំរបស់ប្រធានរដ្ឋសភា៕ដកស្រង់ពីសារព័ត៌មានសម្លេងប្រជាធិបតេយ្យ ចេញផ្សាយថ្ងៃទី ០៣ ខែកក្កដា ឆ្នាំ២០១៥។