-
អង្គការក្នុងស្រុកស្វែងរកអន្តរាគមន៍ពីអន្តរជាតិ ទប់ស្កាត់ការអនុម័ច្បាប់NGOs
- Issue Date 03-Jul-2015
អង្គការសង្គមស៊ីវិលក្នុងស្រុកប្រមាណជា ៣៥០ អំពាវនាវដល់អង្គការអន្តរជាតិ និងដៃគូរអភិវឌ្ឍនានា ជួយអន្តរាគមន៍ទៅរដ្ឋសភា ទប់ស្កាត់ការអនុម័តសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល ដែលសភាកម្ពុជាគ្រោងអនុម័តនាពេលខាងមុខនេះ ។បើតាមលិខិតព្រាងរបស់សង្គមស៊ីវិល អង្គការអន្តរជាតិដែលគ្រោងស្នើឲ្យជួយអន្តរាគមន៍នោះរួមមាន អង្គការ TI, CIVICUS, Amnesty International, Forum Asia, OMCT, Freedom House, ICNL, Oxfam, CIDSE, និងអង្គការមួយចំនួនទៀត ។នាយកប្រតិបត្តិនៃគណៈកម្មាធិការសហប្រតិបត្តិការដើម្បីកម្ពុជា លោក សឿង សារឿន មានប្រសាសន៍ថា បន្ទាប់ពីសេចក្តីព្រាងច្បាប់នោះត្រូវបានបញ្ជូនទៅសភានានាពេលថ្មីៗ សង្គមស៊ីវិលជាច្រើនព្រួយបារម្ភថាច្បាប់នោះនឹងរឹតបន្តឹងសិទ្ធិសេរីភាពអង្គការដែលជួយពលរដ្ឋក្រីក្រតាមមូលដ្ឋាន ។ យ៉ាងណាក៏ដោយលោកថា បច្ចុប្បន្នសង្គមស៊ីវិល កំពុងធ្វើយុទ្ធនាការផ្សេងៗគ្នា ដើម្បីតវ៉ាទៅរដ្ឋសភាកុំឲ្យអនុម័តច្បាប់នោះ និងបានអំពាវនាវដល់អង្គការអន្តរជាតិឲ្យជួយអន្តរាគមន៍ផងដែរ ។លោក សឿង សារឿន ឲ្យដឹងថា មន្ត្រីសង្គមស៊ីវិល និងពលរដ្ឋនៅតាមបណ្តាខេត្តនានា នឹងជួបជុំគ្នានៅមុខសាលាខេត្ត ឬការិយាល័យតំណាងរាស្ត្រ ដើម្បីសម្តែងពីក្តីកង្វល់ និងដាក់លិខិតទៅអង្គការអន្តរជាតិឲ្យជួយអន្តរាគមន៍ ។លោកបន្តទៀតថា សង្គមស៊ីវិលនឹងជួបតំណាងរាស្ត្របក្សប្រឆាំងថ្ងៃទី៦ ខែកក្កដា ហើយគ្រោងដាក់លិខិតទៅសភាសុំជួបជាមួយតំណាងរាស្ត្របក្សកាន់អំណាច និងស្នើជួបនាយករដ្ឋមន្ត្រីផងដែរ ដើម្បីពិភាក្សាសេចក្តីព្រាងច្បាប់នោះ ។ជុំវិញសេក្តីព្រាងច្បាប់នេះ អ្នកនាំពាក្យរដ្ឋសភា លោក ឈាង វុន ឲ្យដឹងថា សេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាលនឹងត្រូវដាក់ឲ្យពិភាក្សានៅថ្ងៃទី០៨ ខែកក្កដា ខាងមុខនេះ មុននឹងដាក់ទៅឲ្យរដ្ឋសភា ដើម្បីអនុម័ត ។មន្ត្រីសង្គមស៊ីវិលបញ្ជាក់ថា មាត្រា៥ មាត្រា១០ មាត្រា១៥ មាត្រា២២ មាត្រា៣០ និងមាត្រា៣២ សុទ្ធតែជាការបារម្ភខ្លាំង ដែលមាត្រា៣២នេះ បានចែងពីការផាកពិន័យធ្ងន់ធ្ងរដល់អង្គការ ឬសមាគមណាដែលមិនបានបំពេញលក្ខខណ្ឌតាមច្បាប់នោះ ហើយឈានទៅលុបឈ្មោះអង្គភាពនោះចោល ៕ដកស្រង់ពីសារព័ត៌មានសម្លេងប្រជាធិបតេយ្យ ចេញផ្សាយថ្ងៃទី ០២ ខែ កក្កដា ឆ្នាំ២០១៥។