-
លោក នី ចរិយា នឹងចូលបំភ្លឺតាមការកោះហៅរបស់តុលាការនៅថ្ងៃ១៣ កក្កដា
- Issue Date 06-Jul-2015
សកម្មជនសិទ្ធិមនុស្ស លោក នី ចរិយា នឹងចូលខ្លួនតាមការកោះហៅរបស់សាលាដំបូងរាជធានីភ្នំពេញ នៅថ្ងៃទី១៣ ខែកក្កដា ខាងមុខនេះ ដើម្បីបំភ្លឺជុំវិញបទចោទប្រកាន់ពីបទបរិហារបង្កាច់កេរ្តិ៍ តបតាមបណ្ដឹងរបស់លោក សុក កែវបណ្ឌិត ព្រះរាជអាជ្ញារង និងលោក គី រិទ្ធី ចៅក្រមនៃតុលាការខេត្តសៀមរាប។ សកម្មជនសិទ្ធិមនុស្សរូបនេះបង្ហាញជំហរ បានត្រៀមខ្លួនដោយមិនភ័យខ្លាចនោះទេ។សកម្មជនសិទ្ធិមនុស្ស លោក នី ចរិយា បញ្ជាក់ថា លោកត្រៀមភស្តុតាងរួចជាស្រេចហើយក្នុងការចូលខ្លួនតាមការកោះហៅរបស់សាលាដំបូងរាជធានីភ្នំពេញ នៅថ្ងៃទី១៣ ខែកក្កដា វេលាម៉ោង ៨:០០ព្រឹក។ លោកថា លោកមិនតក់ស្លុត ព្រោះអ្វីដែលលោកបានធ្វើកន្លងមក គឺជាកាតព្វកិច្ចការពារសិទ្ធិមនុស្ស មិនមែនដើម្បីការពារប្រយោជន៍ផ្ទាល់ខ្លួននោះទេ។ប្រធានផ្នែកសិទ្ធិមនុស្ស និងជំនួយផ្នែកច្បាប់នៃសមាគមការពារសិទ្ធិមនុស្សអាដហុក លោក នី ចរិយា បានប្រាប់វិទ្យុអាស៊ីសេរី នៅថ្ងៃទី៤ ខែកក្កដា ថា តុលាការកោះហៅបន្ទាប់ពីលោកបានថ្លែងនៅក្នុងសន្និសីទកាសែតមួយ ដែលបានរិះគន់មន្ត្រីតុលាការពាក់ព័ន្ធនឹងសំណុំរឿងជម្លោះដីធ្លីមួយរវាងប្រជាពលរដ្ឋ ១៩គ្រួសារនៅភូមិជប់រំដេង ឃុំកន្ទួត ស្រុកស្វាយលើ ខេត្តសៀមរាប និងសហគមន៍តាខ្មៅអភិវឌ្ឍន៍កសិកម្ម។សកម្មជនការពារសិទ្ធិមនុស្សរូបនេះ បានចាត់ទុកថា រាល់ការកោះហៅរូបលោក គឺជាការប៉ុនប៉ងបំបិទសិទ្ធិសេរីភាពរបស់លោកដើម្បីចូលរួមសកម្មភាពការពារសិទ្ធិមនុស្សនៅកម្ពុជា។ លោក នី ចរិយា ប្រកាសថា លោកនឹងយកភស្តុតាងជុំវិញការចោទប្រកាន់លោកទៅបំភ្លឺនៅសាលាដំបូងរាជធានីភ្នំពេញ នៅពេលខាងមុខនេះ៖ «នេះមិនមែនជាលើកទី១សម្រាប់សមាគមអាដហុក និងរូបខ្ញុំ ហើយខ្ញុំនឹងមិនភ័យខ្លាចនោះឡើយ ក្នុងការចូលខ្លួនទៅបំភ្លឺនេះ ហើយខ្ញុំក៏បានត្រៀមភស្តុតាងរួចហើយដែរ»។វិទ្យុអាស៊ីសេរី មិនអាចទាក់ទងលោក សុក កែវបណ្ឌិត ព្រះរាជអាជ្ញារង និងលោក គី រិទ្ធី ចៅក្រមនៃតុលាការខេត្តសៀមរាប ដែលបានដាក់ពាក្យប្ដឹងសកម្មជនការពារសិទ្ធិមនុស្សរូបនេះបាននៅឡើយនៅថ្ងៃទី៤ ខែកក្កដា។ទន្ទឹមនឹងការបង្ហាញជំហររបស់សកម្មជនការពារសិទ្ធិមនុស្ស លោក នី ចរិយា នេះដែរ កាលពីថ្ងៃទី២ ខែកក្កដា ក្រុមអ្នកការពារសិទ្ធិមនុស្សអន្តរជាតិ Frontline Defenders ដែលមានទីតាំងក្នុងទីក្រុងឌុបលីន (Dublin) ប្រទេសអៀរឡង់ (Ireland) បានទទូចសុំឲ្យអាជ្ញាធរក្នុងប្រទេសកម្ពុជា ទម្លាក់ចោលជាបន្ទាន់ និងគ្មានលក្ខខណ្ឌនូវបទចោទព្រហ្មទណ្ឌចំពោះសកម្មជនការពារសិទ្ធិមនុស្សក្នុងស្រុករូបនេះ។ ក្រុមអ្នកការពារសិទ្ធិមនុស្សអន្តរជាតិ បានសម្ដែងនូវការព្រួយបារម្ភរបស់ខ្លួនយ៉ាងខ្លាំងចំពោះប្រព័ន្ធយុត្តិធម៌នៅកម្ពុជា ដែលរារាំងការងារស្របច្បាប់របស់សកម្មជនការពារសិទ្ធិមនុស្ស។ទាក់ទងនឹងសំណុំរឿងជម្លោះដីធ្លីដ៏ចម្រូងចម្រាស និងការចាប់ខ្លួនប្រជាពលរដ្ឋពីរនាក់ពីសំណាក់តុលាការខេត្តសៀមរាបនេះ កាលពីថ្ងៃទី២០ ខែឧសភា កន្លងទៅ សមាគមការពារសិទ្ធិមនុស្សអាដហុក បានដាក់បណ្ដឹងទៅឧត្ដមក្រុមប្រឹក្សាអង្គចៅក្រម តុលាការកំពូល និងអគ្គព្រះរាជអាជ្ញាប្រឆាំងនឹងមន្ត្រីតុលាការខេត្តសៀមរាប ទាំងពីររូបនោះ។តែទោះជាយ៉ាងណា សមាគមការពារសិទ្ធិមនុស្សអាដហុក មិនត្រូវបានស្ថាប័នទាំងនោះចាត់ការនោះឡើយរហូតមកដល់ពេលនេះ។ ផ្ទុយទៅវិញ បណ្ដឹងប្រឆាំងនឹងរូបលោកត្រូវបានសាលាដំបូងរាជធានីភ្នំពេញ ចាត់ការមុនទៅវិញ៕ដកស្រង់ពីវិទ្យុអាស៊ីសេរី ចេញផ្សាយថ្ងៃទី ០៤ ខែ កក្កដា ឆ្នាំ២០១៥។