-
អង្គការនិងសមាគមចំនួន៣៨ ទាមទារឲ្យព្រឹទ្ធសភាបដិសេធច្បាប់NGOs
- Issue Date 16-Jul-2015
អង្គការនិងសមាគមជាង៣០អំពាវនាវឲ្យព្រឹទ្ធសភាបដិសេធទាំងស្រុងទៅនឹងច្បាប់ស្តីពីសមាគមនិងអង្គការមិនមែនរដ្ឋាភិបាលដែលតំណាងរាស្ត្រគណបក្សប្រជាជនកម្ពុជាបានបោះឆ្នោតអនុម័តជាឯកច្ឆ័នកាលពីម្សិលមិញ ដោយចាត់ទុកថាច្បាប់នេះនឹងរឹតបន្តឹងសិទ្ធិសេរីភាពរបស់ពួកគេ។អង្គការនិងសមាគមទាំងនោះរួមមានដូចជាសហភាពការងារកម្ពុជា(CLC) មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) សមាគមធាងត្នោត (STT) លីកាដូ(LICADHO)និងសមាគមអាដហុកជាដើម។ អង្គការនិងសមាគមចំនួន៣៨ នៅថ្ងៃនេះបានចេញសេចក្តីថ្លែងការណ៍រួមមួយ ដោយស្នើឲ្យព្រឹទ្ធសភាបដិសេធចោលទាំងស្រុងនូវច្បាប់ស្តីពីសមាគមនិងអង្គការមិនមែនរដ្ឋាភិបាល។សេចក្តីថ្លែងការណ៍រួមឲ្យដឹងថាអង្គការសមាគមទាំងនោះលើកឡើងថាការអនុម័តច្បាប់នេះជាជំហានដ៏សំខាន់មួយនៅក្នុងយុទ្ធនាការជាទូទៅមួយរបស់រាជរដ្ឋាភិបាល ដើម្បីរឹតត្បិតសិទិ្ធសេរីភាពប្រជាពលរដ្ឋ និងធ្វើឲ្យប៉ះពាល់យ៉ាងធ្ងន់ធ្ងរដល់លទិ្ធប្រជាធិបតេយ្យ។នាយិកាសម្ព័ន្ធខ្មែរជំរឿននិងការពារសិទិ្ធមនុស្ស លីកាដូ លោកស្រី ណាលី ពីឡូក មានប្រសាសន៍ថា សម្រាប់គណបក្សកាន់អំណាច ការបោះឆ្នោតអនុម័តលើសេចក្តីព្រាងច្បាប់ស្តីពីសមាគមនិងអង្គការមិនមែនរដ្ឋាភិបាល គឺជាការបំបិទសំឡេងរបស់ប្រជាពលរដ្ឋកម្ពុជា។ លោកស្រីបន្ថែមថា«ការសម្រេចចិត្តរបស់រាជរដ្ឋាភិបាល ក្នុងការបង្ខំអនុម័តសេចក្តីព្រាងច្បាប់នេះ នឹងធ្វើឲ្យប៉ះពាល់យ៉ាងធ្ងន់ធ្ងរដល់សង្គមស៊ីវិលទាំងអស់ ហើយបង្ហាញនូវបំណងយ៉ាងច្បាស់ថាច្បាប់នេះ នឹងក្លាយជាឧបករណ៍មួយដើម្បីគាបសង្កត់សម្លេងរិះគន់ និងគ្រប់គ្រងទាំងស្រុងមកលើប្រជាពលរដ្ឋ ឲ្យបានមុនបោះឆ្នោតនៅក្នុងអណត្តិក្រោយ”។សេចក្តីថ្លែងការណ៍រួមនេះបន្តថារាជរដ្ឋាភិបាលបានរំលោភទាំងស្រុងមកលើរដ្ឋធម្មនុញ្ញនៃព្រះរាជាណាចក្រកម្ពុជា ច្បាប់អន្តរជាតិ និងមិនចាប់អារម្មណ៍លើការអំពាវនាវយ៉ាងទូលំទូលាយរបស់សង្គមស៊ីវិល គណបក្សជំទាស់ ប្រជាពលរដ្ឋ និងសហគមន៍អន្តរជាតិនោះទេ ដែលរួមមានការព្រមានយ៉ាងធ្ងន់ៗពីសហគមន៍អឺរ៉ុប និងអង្គការសហប្រជាជាតិ។VODមិនទាន់អាចទាក់ទងមន្ត្រីព្រឹទ្ធសភា ដើម្បីសុំការអត្ថាធិប្បាយលើបញ្ហានេះបាននៅឡើយទេ។គួររំឭកថាសេចក្តីព្រាងច្បាប់គ្រប់គ្រងអង្គការត្រូវបានរដ្ឋសភាអនុម័តដែលមានតែតំណាងរាស្ត្រគណបក្សប្រជាជនកម្ពុជា៦៨រូប កាលពីថ្ងៃម្សិលមិញ។ សង្គមស៊ីវិលរកឃើញថាក្នុងចំណោម៣៩មាត្រា គឺយ៉ាងតិចមាន២៥ភាត្រា មានខ្លឹមសារកម្រិតសិទ្ធិធ្វើសកម្មភាពរបស់សង្គមស៊ីវិល និងរំលោភសិទ្ធិមនុស្ស ផ្ទុយពីរដ្ឋធម្មនុញ្ញ និងច្បាប់អន្តរជាតិ។ សង្គមស៊ីវិលបារម្ភថា តាមអំណាចនៃច្បាប់នោះ នឹងធ្វើឲ្យដំណើរការលទ្ធិប្រជាធិបតេយ្យនៅកម្ពុជាដើរថយក្រោយ៕ ដកស្រង់ពីសារព័ត៌មានថ្មីៗ ចេញផ្សាយថ្ងៃទី ១៥ ខែ កក្កដា ឆ្នាំ២០១៥។