-
ជំទប់ទី១បក្សប្រឆាំងនិងបក្សពួកត្រូវជនអនាមិកបាចត្រាក់គំរាមកំហែងអាយុជីវិត
- Issue Date 10-Sep-2015
ជំទប់ទី១មកពីគណបក្សប្រឆាំងឃុំគោកកឋិន ស្រុកថ្មពួក ខេត្តបន្ទាយមានជ័យ ត្រូវជនអនាមិកបាចខិត្តប័ណ្ណ គំរាមកំហែងដល់ការបញ្ចេញមតិ និងការរស់នៅ ធ្វើឲ្យភ័យខ្លាចពីសុវត្ថិភាពផ្ទាល់ខ្លួន។ជំទប់ទី១ សន្និដ្ឋានថា ការគំរាមកំហែងនេះ អាចជាការបំបាក់ស្មារតីក្នុងការបញ្ចេញមតិ ដោយសារកន្លងទៅរូបលោកចូលរួមតវ៉ារឿងទំនាស់ដីធ្លីនៅក្នុងមូលដ្ឋានជាមួយប្រជាពលរដ្ឋញឹកញាប់។ជំទប់ទី១ ឃុំគោកកឋិន មកពីគណបក្ស សម រង្ស៊ី អំពាវនាវឲ្យស្នងការនគរបាលខេត្តបន្ទាយមានជ័យ និងមន្ត្រីពាក់ព័ន្ធ ធ្វើការស៊ើបអង្កេត និងចាប់ជនដែលបោះខិត្តប័ណ្ណគំរាមកំហែងនោះ ផ្ដន្ទាទោសតាមផ្លូវច្បាប់ ដើម្បីរក្សាសុវត្ថិភាពរបស់លោក។ជំទប់ទី១ឃុំគោកកឋិន លោក បូរិន្ទ ឈាន ថ្លែងកាលពីទី៨ ខែកញ្ញា ថា លោកទទួលបានលិខិតដែលបោះតាមផ្លូវសាធារណៈនៅមុខផ្ទះរបស់លោកកាលពីរសៀលថ្ងៃទី៦ ខែកញ្ញា កន្លងទៅ ដែលបានគំរាមកំហែងយ៉ាងខ្លាំងដល់ការបញ្ចេញមតិ និងសុវត្ថិភាពផ្ទាល់ខ្លួនរស់នៅប្រចាំថ្ងៃ។ លោកអះអាងថា នៅក្នុងខ្លឹមសារលិខិតនោះ សរសេរសំដៅឈ្មោះលោក និងបុគ្គលចំនួន ៣នាក់ទៀត គឺលោក សៀង សំណាង ជំទប់ទី២ ឃុំគោកកឋិន មកពីគណបក្សហ្វ៊ុនស៊ិនប៉ិច លោក មួន វន្នី ក្រុមប្រឹក្សាឃុំ និងលោក ប្រាក់ ឈឿន សកម្មជនគណបក្សសង្គ្រោះជាតិ។នៅក្នុងសារលិខិតនោះសរសេរទៀតថា យើងជាប្រជាពលរដ្ឋជម្រាបដល់លោកទាំង៤ថា ល្មមឈប់មហិច្ឆតាការឆ្កឹះឆ្កៀល កេងប្រវ័ញ្ច និងការអួតអាងបន្តទៀត ព្រមទាំងការដេកដើរ ឈរអង្គុយ ឬនិយាយស្ដីឲ្យមានការប្រុងប្រយ័តខ្ពស់បំផុតជាដើម៖ «មនុស្សដែលខ្ញុំសង្ស័យមានចំនួន ៣នាក់ គឺទី១ អតីតមេឃុំគោកកឋិន ទី២ លោក ចាប សាន និងលោក ឡាន សឿន។ ទាំងនោះប្រជាពលរដ្ឋបានឃើញផ្ទាល់គឺលោក ចាប សាន នៅពេលដែលគាត់យកខិត្តប័ណ្ណទៅបោះនៅមុខរបស់ផ្ទះអ្នកភូមិ»។ការបោះខិត្តប័ណ្ណនេះធ្វើឡើងបន្ទាប់ពីជំទប់ទី១ បានដាក់ពាក្យប្ដឹងអ្នកដែលពាក់ព័ន្ធរឿងទំនាស់ដីធ្លីជាមួយប្រជាពលរដ្ឋជាង ១៦០គ្រួសារ នៅឃុំគោកកឋិន ទៅសាលាខេត្តបន្ទាយមានជ័យ ដើម្បីឲ្យអភិបាលខេត្ត និងមន្ត្រីពាក់ព័ន្ធដោះស្រាយតាមផ្លូវច្បាប់។ទាក់ទងនឹងបញ្ហានេះ នាយប៉ុស្តិ៍នគរបាលរដ្ឋបាលឃុំគោកកឋិន លោក អ៊ុយ ចន្ថា មានប្រសាសន៍ថា ពិតជាមានជនមិនស្គាល់មុខបោះខិត្តប័ណ្ណក្នុងន័យគំរាមកំហែងជំទប់ទី១ និងសមាជិកក្រុមប្រឹក្សាឃុំគោកកឋិន ប្រាកដមែន។លោកបញ្ជាក់ថា សមត្ថកិច្ចកំពុងធ្វើការស្រាវជ្រាវរកមុខសញ្ញាអ្នកដែលបាចខិត្តប័ណ្ណនោះ ដើម្បីដោះស្រាយតាមផ្លូវច្បាប់ហើយ៖ «ខ្ញុំអត់ដឹងថា នរណាជាអ្នកបោះខិត្តប័ណ្ណនោះទេ ប៉ុន្តែខ្ញុំបានទទួលខិត្តប័ណ្ណចំនួន ៤សន្លឹក ហើយខ្ញុំបានបញ្ជូនខិត្តប័ណ្ណនោះទៅឲ្យលោកអធិការនគរបាលស្រុកថ្មពួក ហើយ»។ទោះយ៉ាងនេះក្ដីមន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តបន្ទាយមានជ័យ លោក ស៊ុំ ច័ន្ទគា មានប្រសាសន៍ថា លោកបានទទួលពាក្យបណ្ដឹងពីជំទប់ទី១ ឃុំគោកកឋិន ពាក់ព័ន្ធនឹងរឿងបោះខិត្តប័ណ្ណគំរាមកំហែងនេះហើយ។លោកបញ្ជាក់ថា ការបោះខិត្តប័ណ្ណនេះគឺជាការគំរាមកំហែង និងបិទសិទ្ធិសេរីភាពក្នុងការបញ្ចេញមតិ និងការបំភិតបំភ័យកំបាក់ស្មារតីប្រជាពលរដ្ឋ ដើម្បីកុំឲ្យចូលរួមធ្វើការតវ៉ារឿងទំនាស់ដីធ្លីបន្តទៀត៖ «ប្រសិនការបោះខិត្តប័ណ្ណនោះបញ្ជាក់ឈ្មោះចំបុគ្គលច្បាស់លាស់ គឺករណីនេះស្មើនឹងការគំរាមសម្លាប់ហើយ។ ដូច្នេះជនដែលប្រព្រឹត្តនោះត្រូវទទួលទោសតាមផ្លូវច្បាប់។ ប៉ុន្តែប្រសិនបើការបោះខិត្តប័ណ្ណនោះជាការតស៊ូមតិ ដូចជាឲ្យរដ្ឋាភិបាលគិតសាជាថ្មីនៅរឿងអ្វីមួយ ដើម្បីជាផលប្រយោជន៍សង្គម គឺគ្មានទោសទេ»។ទោះយ៉ាងនេះ ជំទប់ទី១ កំពុងព្រួយបារម្ភពីសុវត្ថិភាពផ្ទាល់ខ្លួន និងបានរៀបចំពាក្យបណ្ដឹងពាក់ព័ន្ធបញ្ហានេះដាក់ទៅសាលាដំបូងខេត្តបន្ទាយមានជ័យ ដើម្បីចាប់ជនដែលបោះខិត្តប័ណ្ណនោះដោះស្រាយស្រាយតាមផ្លូវច្បាប់៕ដកស្រង់ពីវិទ្យុអាស៊ីសេរី ចេញផ្សាយថ្ងៃទី ០៩ ខែកញ្ញា ឆ្នាំ២០១៥៕