-
សមាគមអង្គការមិនមែនរដ្ឋាភិបាលចាប់ផ្តើមសុំចុះបញ្ជីការនិងដាក់សំណើទៅក្រសួងមហាផ្ទៃ
- Issue Date 16-Sep-2015
ក្រសួងមហាផ្ទៃឲ្យដឹងថារហូតមកដល់ពេលនេះសមាគមនិងអង្គការមិនមែនរដ្ឋាភិបាលជាង៣០ហើយ ដែលបានស្នើសុំចុះបញ្ជីការនិងដាក់សំណើទៅក្រសួងមហាផ្ទៃ ក្រោយពីច្បាប់អង្គការចូលជាធរមាន។កាលពីថ្ងៃទី១២ខែសីហា ឆ្នាំ២០១៥ ព្រះមហាក្សត្រ ព្រះបាទនរោត្តមសីហមុនីបានឡាយព្រះហស្តលេខាប្រកាសប្រើប្រាស់ច្បាប់ស្តីពីសមាគមនិងអង្គការមិនមែនរដ្ឋាភិបាល។គេហទំព័ររបស់ក្រសួងមហាផ្ទៃឲ្យដឹងថារបាយការណ៍ប្រចាំខែរបស់ក្រសួងមហាផ្ទៃបង្ហាញថាក្នុងខែសីហា ២០១៥ សមាគមនិងអង្គការមិនមែនរដ្ឋាភិបាលចំនួន៣១បានសុំចុះបញ្ជីការនិងធ្វើសំណើផ្សេងៗមកក្រសួងមហាផ្ទៃ។ គេហទំព័របញ្ជាក់ថា៖ “នេះគឺជាការឆ្លុះបញ្ចាំងឲ្យឃើញពីនិន្នាការគាំទ្រនិងការគោរពគោលការណ៍នីតិរដ្ឋ ប្រកបដោយស្មារតីភ្ញាក់រលឹករបស់ប្រជាពលរដ្ឋកម្ពុជាទៅលើច្បាប់នានាដែលរដ្ឋសភាបានអនុម័ត”។ គេហទំព័របានបនន្ថែមថា៖ “ម្យ៉ាងវិញទៀត នេះក៏ជាការឆ្លុះបញ្ចាំងឲ្យឃើញផងដែរ អំពីសកម្មភាពរបស់ សមាគម និងអង្គការមិនមែនរដ្ឋាភិបាលនានាក្នុងការរួមចំណែកជាមួយរាជរដ្ឋាភិបាលក្នុងការអភិវឌ្ឍសង្គមជាតិ”។បើតាមគេហទំព័រ អង្គការក្រៅរដ្ឋាភិបាលចំនួន៩បានសុំចុះបញ្ជី ក្នុងនោះមានអង្គការពង្រឹងសមត្ថភាពយុវជនដើម្បីអភិវឌ្ឍន៍សេដ្ឋកិច្ច អង្គការចងមិត្ត អង្គការថែទាំសហគមន៍ជាចម្បង អង្គការកំណប់កូនខ្មែរ អង្គការទិន្នន័យអំពីការអភិវឌ្ឍ អង្គការស្បៀងអាហារ និងជំនួយផ្នែកវិទ្យាសាស្ត្រ អង្គការមូលនិធិសម្បុរសធម៌ព្រីនស៍រៀលអ៊ីស្ទេត អង្គការដំណក់ទឹកសន្សើម និងអង្គការគណនេយ្យភាពកម្ពុជា។ចំណែកសមាគមចំនួន១១បានស្នើសុំចុះឈ្មោះ រួមមានសមាគមលើកកម្ពស់សុខភាពប្រជាពលរដ្ឋ សមាគមអភិវឌ្ឍន៍ និងការអប់រំមុស្លិមកម្ពុជា សមាគមទេសចរណ៍ខេត្តបាត់ដំបង សមាគមដើម្បីអភិវឌ្ឍន៍សហគមន៍កម្ពុជា សមាគមស្នាមញញឹមកម្ពុជា សមាគមបរិក្ខារសំណង់កម្ពុជា សមាគមមគ្គុទេសក៍ទេសចរណ៍ភាសាកូរ៉េនៅកម្ពុជា សមាគមកូនខ្មែរអភិវឌ្ឍន៍ សមាគមសប្បុរសធម៌ និងអភិវឌ្ឍន៍កម្ពុជា សមាគមធម្មចក្រនិងសមាគមកម្លាំងសប្បុរសធម៌កម្ពុជា។បើតាមគេហទំព័រ សមាគមនិងអង្គការផ្សេងទៀត បានស្នើសុំបើកសាខា ស្នើសុំទទួលស្គាល់ប្រធាន សមាសភាពថ្មី វិសោធនកម្មលក្ខន្តិកៈនិងប្តូរឈ្មោះ ស្នើសុំទទួលស្គាល់អាស័យដ្ឋានទីស្នាក់ការកណ្តាល ស្នើសុំប្តូររូបសញ្ញានិងស្នើសុំលុបឈ្មោះចេញបញ្ជីជាដើម។គួរបញ្ជាក់ថា កន្លងទៅ មជ្ឈមណ្ឌលសិទ្ធិមនុស្សកម្ពុជា(CCHR)ស្នើលោក ស ខេង រដ្ឋមន្ដ្រីក្រសួងមហាផ្ទៃ បកស្រាយជាលាយល័ក្ខអក្សរចំពោះការអនុវត្តច្បាប់ស្តីពីសមាគមនិងអង្គការមិនមែនរដ្ឋាភិបាល ដោយបារម្ភពីផលប៉ះពាល់លើអង្គការមូលដ្ឋាននិងក្រុមបណ្ដាញក្រៅផ្លូវការ។គណបក្សប្រជាជនកម្ពុជានិងគណបក្សសង្គ្រោះជាតិ ធ្លាប់អះអាងថានឹងធ្វើវិសោធនកម្មច្បាប់នេះ ប្រសិនបើច្បាប់នោះអនុវត្តទៅ មានការប៉ះពាល់ដល់សិទ្ធិសេរីភាពនិងប្រយោជន៍របស់ប្រជាពលរដ្ឋ។មាត្រា២៤នៃសេចក្តីព្រាងច្បាប់នេះបានចែងថា៖ “អង្គការមិនមែនរដ្ឋាភិបាលក្នុងស្រុក អង្គការមិនមែនរដ្ឋាភិបាលបរទេស ឬសមាគមបរទេស ត្រូវប្រកាន់ជំហរអព្យាក្រឹតចំពោះគ្រប់គណបក្សនយោបាយនៅព្រះរាជាណាចក្រកម្ពុជា”។ មាត្រា១០នៃសេចក្តីព្រាងច្បាប់នេះចែងថាសមាគមនិងអង្គការមិនមែនរដ្ឋាភិបាល ត្រូវជូនដំណឹងជាលាយលក្ខណ៍អក្សរអំពីព័ត៌មានរាល់គណនីដែលត្រូវ បើកសម្រាប់កិច្ចប្រតិបត្តិការរបស់ខ្លួននៅធនាគារក្នុង ព្រះរាជាណាចក្រកម្ពុជា។ចំណែកមាត្រា២៥ចែងថាសមាគមនិងអង្គការមិនមែនរដ្ឋាភិបាល ត្រូវផ្ញើបាយការណ៍បូកសរុបសកម្មភាពការងារ និងរបាយការណ៍ហិរញ្ញវត្ថុប្រចាំឆ្នាំទៅក្រសួងមហាផ្ទៃ និងក្រសួងសេដ្ឋកិច្ច និងហិរញ្ញវត្ថុ។ មាត្រា២៥ បន្តថាក្នុងករណីចំបាច់ ក្រសួងមហាផ្ទៃ អាចស្នើសុំរបាយការណ៍ស្តីពីសកម្មភាព និងនយោបាយហិរញ្ញវត្ថុប្រចាំឆ្នាំរបស់សមាគម។ករណីដែលសមាគមនិងអង្គការមិនមែនរដ្ឋាភិបាលមិនអនុវត្តតាមមាត្រា១០ មាត្រា២៤ និងមាត្រា២៥ ក្រសួងមហាផ្ទៃត្រូវជូនដំណឹងជាលាយលក្ខណ៍អក្សរដោយទុករយៈពេលយ៉ាងយូរ៣០ថ្ងៃ ថ្ងៃនៃថ្ងៃធ្វើការ។ ករណីមិនអនុវត្តតាមក្រសួងនឹងជូនដំណឹងជាលាយលក្ខណ៍អក្សរផ្អាកសកម្មភាពបណ្តោះអាសន្ន រយៈពេលយ៉ាងយូរ៩០ថ្ងៃ។ ក្នុងករណីនៅតែមិនព្រមអនុវត្ត ក្រសួងមហាផ្ទៃត្រូវសម្រេចជាលាយលក្ខណ៍អក្សរលុបឈ្មោះចេញពីបញ្ជី៕ដកស្រង់ពីសារព័ត៌មានសម្លេងប្រជាធិបតេយ្យ ចេញផ្សាយថ្ងៃទី ១៦ ខែកញ្ញា ឆ្នាំ២០១៥៕