-
សាលាឧទ្ធរណ៍បដិសេធសំណើសុំនៅក្រៅឃុំរបស់យុវជនមាតាធម្មជាតិ
- Issue Date 21-Sep-2015
សាលាឧទ្ធរណ៍ នៅព្រឹកថ្ងៃចន្ទនេះ បានបដិសេធសំណើសុំនៅក្រៅឃុំបណ្តោះអាសន្នរបស់យុវជន៣នាក់នៃអង្គការមាតាធម្មជាតិ ដែលត្រូវបានចាប់ខ្លួនកាលពីថ្ងៃទី១៧ ខែសីហា ឆ្នាំ២០១៥ ស្របពេលដែលពួកគេបើកយុទ្ធនាការតវ៉ាជាបន្តបន្ទាប់ប្រឆាំងនឹងការបូមខ្សាច់នៅខេត្តកោះកុង។យុវជនទាំងនោះមានឈ្មោះ លោក ទ្រី សុវិគា អាយុ២៣ឆ្នាំ លោក សាន់ ម៉ាឡា អាយុ២៣ឆ្នាំ និងលោក ស៊ិម សំណាង អាយុ២៨ឆ្នាំ។ អ្នកទាំងនោះ ត្រូវបានចោទប្រកាន់តាមមាត្រា៤២៤នៃក្រមព្រហ្មទណ្ឌ ពីបទល្មើសគំរាមកំហែងថានឹងធ្វើឲ្យខូចខាតដោយភ្ជាប់នឹងបញ្ជាអ្វីមួយ។ប្រធានបច្ចេកទេសឃ្លាំមើលការរំលោភសិទ្ធិមនុស្សរបស់អង្គការលីកាដូ លោក អំ សំអាត មានប្រសាសន៍ថាសាលាឧទ្ធរណ៍បានសម្រេចថាមិនអនុញ្ញាតឲ្យយុវជនទាំងនោះនៅក្រៅឃុំ ដោយថានេះជានីតិវិធីរបស់តុលាការ ខ្លាចយុវជនទាំងបីបង្កើតបញ្ហាម្តងទៀតនិងខ្លាចបង្កភាពចលាចល ពេលនៅក្រៅឃុំ។ លោកបន្តថាមេធាវីនឹងដាក់ពាក្យស្នើសុំក្រៅឃុំម្តងទៅចៅក្រមស៊ើបសួររបស់សាលាដំបូងខេត្តកោះកុង។សកម្មជនទាំងនោះត្រូវបានតុលាការខេត្តកោះកុងបដិសេធសំណើនៅក្រៅឃុំម្តងហើយ កាលពីថ្ងៃទី៣១ ខែសីហា។បើតាមមាត្រា៤២៤នៃក្រមព្រហ្មទណ្ឌ អំពើគំរាមកំហែងតាមមធ្យោបាយណាក៏ដោយថានឹងប្រព្រឹត្តការបំផ្លិចបំផ្លាញ ការធ្វើឲ្យទ្រុឌទ្រោមឬការធ្វើឲ្យខូចខាត ត្រូវផ្តន្ទាទោសដាក់ពន្ធនាគារពី១ឆ្នាំទៅ២ឆ្នាំ និងពិន័យជាប្រាក់ពី២ទៅ៤លានរៀល ប្រសិនបើការគំរាមកំហែងនេះមានភ្ជាប់បញ្ជាឲ្យបំពេញឬមិនបំពេញកិច្ចអ្វីមួយ។ក្រោយពីការចាប់ខ្លួន ប្រជាពលរដ្ឋនិងក្រុមយុវជនប្រមាណរាប់សិបនាក់បានប្រមូលផ្តុំតវ៉ាខាងមុខសាលាដំបូងខេត្តកោះកុង និងដើរដង្ហែជាក្បួននៅទីរួមខេត្ត ដោយស្នើដោះលែងយុវជនទាំងនោះ។កន្លងទៅយុវជនដែលត្រូវបានចាប់ខ្លួន លោក សាន់ ម៉ាឡា ធ្លាប់ប្រាប់វីអូឌី(VOD)ថាលោកយល់ថាចំណាត់ការតាមប្រព័ន្ធតុលាការនេះ គ្រាន់តែជាការគំរាមកំហែង ដើម្បីឲ្យយុវជនបញ្ឈប់យុទ្ធនាការបណ្តេញសាឡង់បូមខ្សាច់តែប៉ុណ្ណោះ។គួរបញ្ជាក់ថា ប្រជាសហគមន៍និងសមាជិកអង្គការមាតាធម្មជាតិបានបើកយុទ្ធនាការរារាំងសាឡងបូមខ្សាច់របស់ក្រុមហ៊ុនវៀតណាមចំនួន២ គឺឈ្មោះInternational Rainbow និងក្រុមហ៊ុនDirect Access ដោយអះអាងថាការបូមខ្សាច់នេះធ្វើឲ្យប៉ះពាល់លំនៅឋានប្រជាជន ដែលរស់នៅក្បែរព្រែក ព្រមទាំងធ្វើឲ្យប៉ះពាល់ជម្រកមច្ឆជាតិ និងការនេសាទត្រីរបស់ប្រជាជន។អ្នកនាំពាក្យក្រសួង រ៉ែ និងថាមពល លោក ម៉េង សក្តិធារ៉ា ធ្លាប់ប្រាប់វីអូឌី(VOD)ថាក្រសួងបានចុះត្រួតពិនិត្យ វាយតម្លៃផលប៉ះពាល់និងបានធ្វើវេទិកាជាមួយប្រជាជនស្តីអំពីអាជីវកម្មបូមខ្សាច់នេះដែរ។ លោកមានប្រសាសន៍ថា៖ "ក្រុមអធិការកិច្ចរបស់ក្រសួងបានទៅត្រួតពិនិត្យ ហើយបានរាយការណ៍ថាក្រុមហ៊ុនហ្នឹងបានអនុវត្តត្រឹមត្រូវ តាមបទដ្ឋានបច្ចេកទេសហើយ អត់មានអីខុសទេ"៕ដកស្រង់ពីសារព័ត៌មានសម្លេងប្រជាធិបតេយ្យ ចេញផ្សាយថ្ងៃទី២១ ខែកញ្ញា ឆ្នាំ២០១៥៕