-
លោក កឹម សុខា ស្នើឲ្យអ្នករាយការណ៍ពិសេសអង្គការសហប្រជាជាតិកែទម្រង់ប្រព័ន្ធតុលាការ
- Issue Date 23-Sep-2015
អនុប្រធានទី១នៃរដ្ឋសភា លោក កឹម សុខា នៅព្រឹកថ្ងៃពុធនេះ បានស្នើមន្ត្រីអង្គការសហប្រជាជាតិទទួលបន្ទុកសិទ្ធិមនុស្ស ឲ្យជួយកែទម្រង់ប្រព័ន្ធតុលាការ ដែលលោកចាត់ទុកថាមិនឯករាជ្យបណ្តាលឲ្យមានការរំលោភសិទ្ធិមនុស្សនៅកម្ពុជា។លោក កឹម សុខា បានថ្លែងបែបនេះក្រោយបញ្ចប់ជំនួបលើកដំបូងជាមួយអ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា លោកស្រី រ៉ូណា ស្ម៊ីត(Rhona Smith)។ លោកមានប្រសាសន៍ថាលោកបានជំរុញឲ្យអ្នករាយការណ៍ពិសេសជួយធ្វើកំណែទម្រង់ប្រព័ន្ធតុលាការឲ្យឯករាជ្យ ដើម្បីឲ្យប្រជាពលរដ្ឋទទួលបានយុត្តិធម៌សង្គមទាំងសមភាពខាងនយោបាយ សេដ្ឋកិច្ចនិងសង្គម។ លោកចាត់ទុកការបញ្ជូនអ្នករាយការណ៍ពិសេសមកកម្ពុជាគឺត្រឹមត្រូវ។លោក កឹម សុខា បានថ្លែងថា៖ "ខ្ញុំអត់លើកពីបញ្ហាទេ ព្រោះបញ្ហាគេដឹងអស់ហើយ ពិភពលោកគេដឹងហើយ បានគេបញ្ជូនមក។ បើគេមិនដឹងថា មានបញ្ហា គេមិនបញ្ជូនមកទេ។ ខ្ញុំលើកពីដំណោះស្រាយ។ ខ្ញុំថាដើម្បីដោះស្រាយបញ្ហាសិទ្ធិមនុស្សនៅប្រទេសកម្ពុជា ត្រូវកែទម្រង់ប្រព័ន្ធតុលាការជាមុនសិន។ បើមិនបានកែប្រព័ន្ធតុលាការឲ្យឯករាជ្យពិតប្រាកដទេ បញ្ហាសិទ្ធិមនុស្សនៅប្រទេសកម្ពុជាមិនអាចដោះស្រាយទេ”។លោក កឹម សុខា ក៏បានសរសេរនៅលើហ្វេសប៊ុករបស់លោកថា៖ “ខ្ញុំបានស្នើទៅលោកស្រីឲ្យផ្ដោតលើបញ្ហា៖ ទី១.ការកែទម្រង់ប្រព័ន្ធតុលាការជាអាទិភាព និងទី២.សេរីភាពបញ្ចេញមតិ។ ចំណែកលោកស្រីវិញ បានលើកឡើងអំពី៖ ទី១.ការធ្វើច្បាប់នៅក្នុងរដ្ឋសភា និងទី២.វប្បធម៌សន្ទនារវាងគណបក្សទាំងពីរ”។លោកស្រី រ៉ូណា ស្ម៊ីត មិនទាន់ឆ្លើយតបយ៉ាងណាចំពោះមតិយោបល់របស់លោក កឹម សុខា នោះទេ។អ្នកនាំពាក្យក្រសួងយុត្តិធម៌ លោក ជិន ម៉ាលីន មានប្រសាសន៍ថាការស្នើរបស់លោក កឹម សុខា ធ្វើឡើងទៅតាមនិន្នាការរបស់លោកតែប៉ុណ្ណោះ ហើយអ្វីៗអាស្រ័យលើការពិចារណារបស់លោកស្រី រ៉ូណា ស្ម៊ីត។ លោកមានប្រសាសន៍ថា៖ “ការដែលគាត់លើកឡើងតុលាការមិនឯករាជ្យនេះជាទម្លាប់ដែលគាត់សូត្ររត់មាត់តាំងពីដើមរួចមកទៅហើយ។ ក៏ប៉ុន្តែខាងរដ្ឋាភិបាលវិញ គឺយើងបានធ្វើការជាច្រើនណាស់ ដើម្បីលើកតម្កើងឯករាជ្យភាពនៃអំណាចតុលាការនេះ តាមរយៈការរៀបចំ គោលនយោបាយនិងដាក់អនុវត្តច្បាប់ជាមូលដ្ឋានទាំងបីនាពេលកន្លងមកនេះ។ ហើយនិងតាមរយៈការត្រួតពិនិត្យដំណើរប្រព្រឹត្តទៅរបស់តុលាការ ដូចជាមានការដាក់ទោសទណ្ឌទៅមន្ត្រីតុលាការដែលប្រព្រឹត្តកំហុសមួយចំនួន និងចាត់ការចំពោះភាពមិនប្រក្រតីនៅក្នុងប្រព័ន្ធយុត្តិធម៌នាពេលកន្លងមក”។លោកស្រី រ៉ូណា ស្ម៊ីត ត្រូវបានតែងតាំងដោយក្រុមប្រឹក្សាសិទ្ធិមនុស្សអង្គការសហប្រជាជាតិក្នុងខែមីនា ឆ្នាំ២០១៥ ដើម្បីជំនួសតំណែងរបស់លោក សុរិយា ប្រាសាទ ស៊ូប៊ែឌី ក្នុងការធ្វើសេចក្តីរាយការណ៍និងផ្តល់ប្រឹក្សាយោបល់ស្តីពីស្ថានភាពសិទ្ធិមនុស្សនៅកម្ពុជា។ក្នុងជំនួបជាមួយលោកនាយករដ្ឋមន្ត្រី ហ៊ុន សែន កាលពីថ្ងៃទី ២១ ខែកញ្ញា ឆ្នាំ ២០១៥ លោកស្រី រ៉ូណា ស្ម៊ីត បានសន្យាថានឹងខិតខំប្រឹងប្រែងបំពេញតួនាទីរបស់ខ្លួនក្នុងការជួយលើកកម្ពស់សិទ្ធិមនុស្សនៅកម្ពុជា ដោយមិនឲ្យមានការប៉ះពាល់ដល់អធិបតេយ្យភាពនិងបូរណភាពទឹកដីរបស់កម្ពុជាឡើយ។របាយការណ៍របស់វិទ្យាស្ថានសិទ្ធិមនុស្សនៃគណៈមេធាវីអន្តរជាតិ(IBAHRI) ដែលមានមូលដ្ឋាននៅទីក្រុងឡុងដ៍ប្រទេសអង់គ្លេស និងបានចេញផ្សាយនៅខែកញ្ញា ឆ្នាំ២០១៥នេះ ឲ្យដឹងថារដ្ឋាភិបាលកម្ពុជាបានដាក់សម្ពាធលើប្រព័ន្ធតុលាការ។ វិទ្យាស្ថានបានផ្តល់អនុសាសន៍ទៅរដ្ឋាភិបាលកម្ពុជានិងក្រសួងយុត្តិធម៌ ឲ្យបញ្ឈប់ជាបន្ទាន់ការដាក់សម្ពាធនយោបាយលើប្រព័ន្ធតុលាការនិងស្នើឲ្យរដ្ឋាភិបាលប្តេជ្ញាធានានិងការពារការបែងចែកអំណាចនៅកម្ពុជា៕ដកស្រង់ពីសារព័ត៌មានសម្លេងប្រជាធិបតេយ្យ ចេញផ្សាយថ្ងៃទី ២៣ ខែកញ្ញា ឆ្នាំ២០១៥៕