-
ពលរដ្ឋជំរុញជាថ្មីទៀតឲ្យអាជ្ញាធរប្រគល់ដីជូនពួកគេតាមបញ្ជានាយករដ្ឋមន្ត្រី
- Issue Date 17-Dec-2015
អ្នកមានជម្លោះដីធ្លីនៅតំបន់បឹងកក់មួយចំនួនបានចេញតវ៉ាជាថ្មី (ដោយ ញឹម សុខន)អ្នកមានជម្លោះដីធ្លីនៅតំបន់បឹងកក់មួយចំនួនបានចេញតវ៉ាជាថ្មីទៀតនៅថ្ងៃព្រហស្បតិ៍នេះ ជំរុញឲ្យសាលារាជធានីភ្នំពេញ ពន្លឿនយន្តការកាត់ដីឲ្យពួកគេតាមបញ្ជារបស់នាយករដ្ឋមន្ត្រីខណៈជម្លោះដីធ្លីនៅតំបន់នោះបានអូសបន្លាយជិត១០ឆ្នាំ។ កាលពីឆ្នាំ២០១១ លោកនាយករដ្ឋមន្ត្រីបានចេញអនុក្រឹត្យកាត់ដីនៅតំបន់បឹងកក់ទំហំជាង១២ហិកតាប្រគល់ឲ្យអ្នកភូមិជិត១០០០គ្រួសារវិញ ក្រោយពីពួកគេតវ៉ាប្រឆាំងនឹងការបណ្តេញចេញឲ្យទៅនៅក្រៅក្រុងជាថ្នូរនឹងកាផ្តល់សំណងត្រឹម៨ពាន់ដុល្លារនិងលុយខ្មែរ២លានរៀលក្នុងមួយគ្រួសារ។តំណាងអ្នកតវ៉ាម្នាក់ក្នុងចំណោមអ្នកតវ៉ាជាង៣០នាក់គឺលោក ចាន់ ពុទ្ធិសក្តិ អះអាងនៅកន្លែងតវ៉ាមុខសាលារាជធានីភ្នំពេញថាជម្លោះអូសបន្លាយជិត១០ឆ្នាំនិងការមិនអនុវត្តតាមអនុក្រឹត្យជិត៦ឆ្នាំមកនេះលោកថាធ្វើឲ្យអ្នករងគ្រោះដូចពួកគាត់បាត់បង់មុខរបរនិងធ្លាក់ក្នុងស្ថានភាពក្រីក្រ។បុរសដែលរដ្ឋាភិបាលធ្លាប់ចាប់ដាក់ពន្ធនាគាររូបនោះជំរុញឲ្យមន្ត្រីជំនាញរបស់សាលារាជធានីពង្រឹងប្រសិទ្ធភាពអនុវត្តតាមអនុក្រឹត្យរបស់រដ្ឋាភិបាលនេះកាត់ដីឲ្យពួកគេវិញដើម្បីឲ្យអ្នកភូមិមានឱកាសពង្រីកមុខរបរនិងបានសាងសង់ផ្ទះអភិវឌ្ឍនៅនឹងកន្លែង។លោកថា៖ "ខ្ញុំគិតថាប្រហែលជារឿងពាក់ព័ន្ធនឹងផលប្រយោជន៍របស់បុគ្គលមន្ត្រីមួយចំនួននៅក្នុងសាលារាជធានីភ្នំពេញអាចនិយាយបានថាប្រហែលជាពាក់ព័ន្ធនឹងអំពើពុករលួយចង់បានដីហ្នឹង"។សកម្មជនដីធ្លីម្នាក់ទៀតដែលរដ្ឋាភិបាលធ្លាប់ចាប់ដាក់ពន្ធនាគាររហូតពីរដងគឺអ្នកស្រី ផាន់ ឈុនរ៉េត អាយុ៥៥ឆ្នាំ អះអាងថា ក្រោយពីអនុក្រឹត្យចេញជាង៦ឆ្នាំមកនេះគាត់ថាអាជ្ញាធរនៅមិនទាន់ប្រគល់ប័ណ្ណកម្មសិទ្ធិឲ្យរូបគាត់បានកាន់កាប់ដីដែលបានរស់នៅតាំងពីឆ្នាំ១៩៩៣នោះនៅឡើយទេ។ស្ត្រីរូបនោះបន្តថា៖ "ខ្ញុំប្តេជ្ញាថានឹងទាមទារដីរបស់ខ្ញុំឲ្យគ្រប់បានខ្ញុំទទួលមិនគ្រប់ខ្ញុំអត់ទទួលទេសូម្បីបាត់តែមួយការ៉េក៏ខ្ញុំអត់យកដែរបើមានការបណ្តេញចេញខ្ញុំស៊ូស្លាប់នៅក្នុងផ្ទះរបស់ខ្ញុំ"។អ្នកតវ៉ាម្នាក់ទៀតគឺលោក ឃិន ចិន្តា អាយុ៥៤ឆ្នាំរស់នៅភូមិ២២ សង្កាត់ស្រះចក ខណ្ឌដូនពេញ បានអំពាវនាយដល់ថ្នាក់ដឹកនាំកំពូលជួយជំរុញករណីនេះដែលលោកគិតថាទើបអាចជួយពន្លឿនយន្តការដោះស្រាយនេះបាន។លោកថា៖ "ខ្ញុំសំណូមពរដែលខ្ញុំឮថាលោកជំទាវគតិប្រិតបណ្ឌិត ប៊ុន រ៉ានី នៅពីក្រោយការអភិវឌ្ឍខ្ញុំសុំឲ្យលោក ជំទាវចេញមុខដោះស្រាយបញ្ចប់(ជម្លោះ)តំបន់បឹងកក់នឹងឲ្យបានយុត្តិធម៌ដែលអាចទទួលយកបាន"។ប៉ុន្តែអ្នកនាំពាក្យសាលារាជធានីភ្នំពេញលោក ឡុង ឌីម៉ង់ ធ្លាប់ស្តីបន្ទោសថាក្រុមអ្នកតវ៉ាដែលនៅសេសសល់នោះមិនបានសហការជាមួយមន្ត្រីចុះដោះស្រាយវិវាទទេ។ លោកចោទថាអ្នកតវ៉ាទាំងនោះចូលចិត្តយកការតវ៉ាតាមដងផ្លូវជាជាងចូលពិភាក្សាជាមួយមន្ត្រីជំនាញដោយការយោគយល់គ្នា។តែអ្នកតវ៉ាអះអាងថាការដែលមិនអាចរកដំណោះស្រាយបានដោយសារតែមន្ត្រីបានកាត់យកដីពួកគេដែលធ្លាប់រស់នៅជាក់ស្តែងពី៥០%ទៅ៧០%ដែលពួកគេចង់បាន៧០%និង៣០%សុខចិត្តបរិច្ចាគឲ្យទៅសាលាក្រុង។ជម្លោះអូសបន្លាយនៅតំបន់បឹងកក់នេះសង្គមស៊ីវិលអះអាងថាអាចដោះស្រាយទៅបានលុះណារដ្ឋាភិបាលហ៊ានចាត់វិធានការទៅលើមន្ត្រីខិលខូចដែលសង្គមស៊ីវិលថាមានអំពើពុករលួយនៅពីក្រោយដំណោះស្រាយនោះ។បើតាមរបាយការណ៍របស់អង្គការលីកាដូបង្ហាញថាការប្រគល់បឹងធម្មជាតិនៅតំបន់បឹងកក់ឲ្យក្រុមហ៊ុនស៊ូកាគូចាក់ដីលុបដើម្បីអភិវឌ្ឍនេះ ប៉ះពាល់ដល់ពលរដ្ឋជាង៤ពាន់គ្រួសារ។ក្នុងនោះលីកាដូបញ្ជាក់ថាជនរងគ្រោះជាង៣ពាន់គ្រួសារត្រូវបានបណ្តេញចេញទាំងបង្ខំឲ្យរស់នៅជាយក្រុងដោយផ្តល់សំណងតិចតួចនិងជិត១០០០គ្រួសារផ្សេងទៀតបន្តតវ៉ាមិនព្រមចាកចេញ។តំណាងអ្នកភូមិអះអាងថាពួកគេជិត១០០០គ្រួសារដែលតវ៉ាមិនព្រមចាកចេញនោះមានជាង៦០០គ្រួសារហើយដែលសាលារាជធានីភ្នំពេញប្រគល់ប័ណ្ណកម្មសិទ្ធិឲ្យកាន់កាប់ដីធ្លីវិញ។ប៉ុន្តែពួកគេថានៅសល់ជិត១០០គ្រួសារទៀតដែលសាលារាជធានីនៅមិនទាន់បានដោះស្រាយនៅឡើយ៕ ដកស្រង់ពីវិទ្យុVOD ចេញថ្ងៃទី១៧ ខែធ្នូឆ្នាំ២០១៥