-
សហគមន៍ព្នងនៅមណ្ឌលគិរីបដិសេធការសម្របសម្រួលរបស់អាជ្ញាធររឿងជម្លោះដី
- Issue Date 17-Dec-2015
អាជ្ញាធរស្រុកកែវសីមា ខេត្តមណ្ឌលគិរី បានសម្របសម្រួលឲ្យសហគមន៍ព្នង ៤៤គ្រួសាររស់នៅភូមិពូចារ ចែកដីជាមួយមេបញ្ជាការកងរាជអាវុធហត្ថស្រុកដើម្បីបញ្ចប់ជម្លោះ ក៏ប៉ុន្តែការសម្របសម្រួលនេះមិនបានជោគជ័យទេ ដោយសារសហគមន៍មិនទទួលបានដីសមស្របទៅនឹងចំនួនប្រជាពលរដ្ឋដែលមាន។សហគមន៍ភូមិពូចារ ហៅការសម្របសម្រួលចែកដីរបស់អាជ្ញាធរស្រុកកែវសីមា ថាជាការសម្របសម្រួលលំអៀង មិនផ្ដល់យុត្តិធម៌ជូនពលរដ្ឋ។ កាលពីថ្ងៃទី១២ ខែធ្នូ ប្រជាពលរដ្ឋភូមិពូចារ ប្រមាណ ៣០នាក់ បាននាំគ្នាទៅកាន់សាលាស្រុកកែវសីមា ជំរុញឲ្យអាជ្ញាធរស្រុកដោះស្រាយពាក្យប្ដឹងរបស់ពលរដ្ឋទាក់ទិនដី ៧៨ហិកតារដែលមេបញ្ជាការកងរាជអាវុធហត្ថស្រុកបានរំលោភចូលកាន់កាប់យកជាសម្បត្តិឯកជន។តំណាងសហគមន៍ពូចារ លោក ណេត ស្រេង មានប្រសាសន៍ថា អភិបាលស្រុកកែវសីមា បានសម្របសម្រួលឲ្យអ្នកភូមិទទួលយកដី ២៨ហិកតារក្នុងចំនួនដី ៧៨ហិកតារ ដែលជាដីសេសសល់ពីការឈូសឆាយដាំដុះរបស់មេបញ្ជាការកងរាជអាវុធហត្ថ ប៉ុន្តែអ្នកភូមិមិនព្រម។លោកបន្តថា អ្នកភូមិនឹងបន្តជំរុញឲ្យអាជ្ញាធរថ្នាក់ខេត្ត ឬថ្នាក់ជាតិ ដោះស្រាយរឿងក្ដីដើម្បីអ្នកភូមិទទួលបានដីសមស្របប្រកបរបរចិញ្ចឹមជីវិត៖ «បាទ! អយុត្តិធម៌ ពួកខ្ញុំ ៤៤គ្រួសារ គិតទៅម្នាក់មិនបានកន្លះហិកតារផង។ ដីស្រឡះៗកណ្តាលៗហ្នឹង ដីចាស់គាត់យកទាំងអស់ ទុកដីកៀនព្រៃឲ្យពួកខ្ញុំហ្នឹង»។អាជ្ញាធរស្រុកកែវសីមា កាលពីថ្ងទី៤ ខែធ្នូ បានចុះវាស់វែងដីដែលមេបញ្ជាការកងរាជអាវុធហត្ថស្រុកកែវសីមា គឺលោក សាក់ សារុន ចូលកាន់កាប់ជាក់ស្ដែងមានចំនួន ៤៤ហិកតារ។សមាជិកសហគមន៍មួយរូបទៀត គឺលោក នីវ ធី កត់សំគាល់ថា លោក សាក់ សារុន ក៏ដូចជាពលរដ្ឋទូទៅដែរ គឺលោកបានទៅឈូសឆាយយកដីសហគមន៍ ដូច្នេះប្រសិនអាជ្ញាធរបែងចែកដីនោះគួរប្រគល់ឲ្យលោក សាក់ សារុន នូវចំណែកដីស្មើគ្នានឹងគ្រួសារពលរដ្ឋមួយគ្រួសារៗ។លោកថា ដីដែលអាជ្ញាធរសម្របសម្រួលឲ្យសហគមន៍ទទួលយក គឺប្រភេទដីនៅជាយព្រៃមិនអំណោយផលប្រជាពលរដ្ឋធ្វើស្រែចម្ការ៖ «ប្រជាពលរដ្ឋគេទាមទារថា ឲ្យចែកស្មើគ្មានទៅ បើខាងប្រជាពលរដ្ឋមួយគ្រួសារពីរហិកតារឲ្យពីរហិកតារដូចគ្នាទៅ។ ដល់អ៊ីចឹងគេអត់ហ៊ានសម្រេច គេបញ្ជូនឯកសារទៅលើធ្វើរបាយការណ៍ទៅលើវិញ»។កាលពីចុងខែវិច្ឆិកា កន្លងទៅ តំណាងអ្នកភូមិពូចារ បានដាក់ពាក្យប្ដឹងលើកទីពីរជូនមន្ទីររៀបចំដែនដី នគរូបនីយកម្ម និងសំណង់ អាជ្ញាធរខេត្ត និងស្ថាប័នអយ្យការតុលាការខេត្តមណ្ឌលគិរី ចោទប្រកាន់មេបញ្ជាការកងរាជអាវុធហត្ថស្រុកកែវសីមា និងឈ្មោះ ឡឹក ហ៊ា ពីបទរំលោភដីសហគមន៍។បន្ទាប់ពីការដាក់ពាក្យប្ដឹងនេះ អភិបាលស្រុកកែវសីមា លោក សិន វណ្ណវុឌ្ឍ អះអាងថា អាជ្ញាធរស្រុកនឹងធ្វើការសម្របសម្រួលបញ្ហានេះជូនពលរដ្ឋដើម្បីបញ្ចប់ជម្លោះ។វិទ្យុអាស៊ីសេរី មិនអាចទាក់ទងលោក ស៊ិន វណ្ណវុឌ្ឍ សុំអធិប្បាយពីការសម្របសម្រួលនោះបានទេ នៅថ្ងៃទី១៥ ខែធ្នូ ដោយសារលោកជាប់រវល់ប្រជុំ។ទាក់ទិនការសម្របសម្រួលចែកដីនេះដែរ វិទ្យុអាស៊ីសេរី មិនអាចទាក់ទងមេបញ្ជាការកងរាជអាវុធហត្ថស្រុកកែវសីមា សុំបញ្ជាក់បញ្ហានេះបានដូចគ្នា ក៏ប៉ុន្តែអ្នកគ្រប់គ្រងដីទំនាស់នេះគឺលោក ឡឹក ហា មានប្រសាសន៍ថា នលោក សាក់ សារុ យល់ព្រមប្រគល់ដីដែលនៅសេសសល់ជូនពលរដ្ឋ។ ដោយឡែកដីដែលលោកបានឈូសឆាយដាំដុះ ៤៤ហិកតារ លោក សាក់ សារុន មិនយល់ព្រមចែកទៅឲ្យសហគមន៍ឡើយ៖ «ស្រុកគាត់មកសម្របសម្រួលហ្នឹងសុំចែកឲ្យប្រជាជនវិញខ្លះ។ ខ្ញុំក៏ឯកភាពដែរដីដែលខ្ញុំធ្វើហើយខ្ញុំមិនឲ្យទេ ដីដែលខ្ញុំមិនទាន់ធ្វើទេគាត់ចែកគេទៅ»។មេឃុំស្រែព្រះ កាលពីថ្ងៃទី៩ ខែមិថុនា ឆ្នាំ២០១៥ បានចេញលិខិតសម្រេចឲ្យប្រជាពលរដ្ឋ ៤៤គ្រួសារចុះទៅធ្វើស្រែនៅស្រែត្រពាំងចក ចំណុចពូត្រុំចាស់ បន្ទាប់ពីបុរសឈ្មោះ ឡឹក ហ៊ា ចូលទៅកាន់កាប់ដីចំណុចនោះហើយសំអាងថា ខ្លួនជាអ្នកថែរក្សាដីឲ្យមេបញ្ជាការកងរាជអាវុធហត្ថស្រុក និងមិនព្រមចូលខ្លួនមកពិភាក្សាការតវ៉ារបស់សហគមន៍តាមការអញ្ជើញរបស់អាជ្ញាធរឃុំចំនួនពីរលើក។មេឃុំស្រែព្រះ លោក ព្យើក ប៉េ បដិសេធថា ការដោះស្រាយជម្លោះពេលនេះហួសសមត្ថកិច្ចរបស់អាជ្ញាធរឃុំ ហេតុនេះលោកបានណែនាំឲ្យអ្នកភូមិដាក់ពាក្យប្ដឹងទៅអាជ្ញាធរស្រុក និងខេត្តរួចហើយ៖ «រឿង សាក់ សារុន ហ្នឹង គេរាយការណ៍មកខ្ញុំឆ្លងខ្ញុំហើយ។ ខ្ញុំថា មិនមានលទ្ធភាពដោះស្រាយបានទេ ឲ្យជូនទៅស្រុក បើស្រុកដោះស្រាយមិនបានទេ ជូនទៅខេត្ត។រឿងហ្នឹងឯកសារបញ្ជូនទៅខេត្តអស់ហើយ ខ្ញុំមិនអាចដោះស្រាយបានទេ»។ចំណែកមន្ត្រីឃ្លាំមើលសិទ្ធិមនុស្សសមាគមអាដហុក ខេត្តមណ្ឌលគិរី លោក សុក រដ្ឋា អំពាវនាវឲ្យអាជ្ញាធរពាក់ព័ន្ធបន្តជួយដោះស្រាយការតវ៉ាបញ្ហាដីធ្លីរបស់ប្រជាពលរដ្ឋ។ដោយឡែកស្ថាប័នអយ្យការត្រូវប្រញាប់ចាត់ការស៊ើបអង្កេតបណ្ដឹងរបស់ពលរដ្ឋដែលចោទប្រកាន់មន្ត្រីប្រដាប់អាវុធប្រើអំពើហិង្សារំលោភសិទ្ធិមនុស្ស៖ «ត្រូវតែអនុវត្តវិធានការច្បាប់ចំពោះមន្ត្រីសាធារណៈណាដែលយកតួនាទីអំណាចរបស់ខ្លួនទៅច្បាមយកផលប្រយោជន៍របស់ប្រជាជន។ អាជ្ញាធរខេត្ត ស្ថាប័នតុលាការ ត្រូវចាត់វិធានការឲ្យបានតឹងរ៉ឹង ឲ្យបានពិតប្រាកដ»។ទោះជាយ៉ាងណាក៏ដោយ តំណាងសហគមន៍ពូចារ កាលពីថ្ងៃទី១៤ ខែធ្នូ បានថ្លែងនៅក្នុងវេទិកាសាធារណៈថ្នាក់មូលដ្ឋាននៅចំពោះមុខមន្ត្រីអាជ្ញាធរស្រុក ខេត្ត និងមន្ត្រីតំណាងថ្នាក់ជាតិ ទាមទារឲ្យដោះស្រាយពាក្យប្ដឹងតវ៉ារបស់ពលរដ្ឋ។ ចំណែកមន្ត្រីពាក់ព័ន្ធចូលរួមក្នុងវេទិកាបានសន្យាថា នឹងជួយដោះស្រាយការតវ៉ារបស់ពលរដ្ឋជាបន្តទៀត៕ ដកស្រង់ពីវិទ្យុអាស៊ីសេរី ចេញផ្សាយថ្ងៃទី១៦ ខែធ្នូ ឆ្នាំ ២០១៥