-
សង្គមស៊ីវិលជំរុញឲ្យអ្នកនយោបាយផ្តល់សារមានប្រយោជន៍នៅលើបណ្ដាញសង្គម
- Issue Date 21-Dec-2015
ចាប់តាំងពីឆ្នាំ២០១៣ មក បណ្ដាញសង្គមដូចជា ហ្វេសប៊ុក (Facebook) ធ្វីតធើ (Twitter) និងយូធូប (YouTube) ជាដើម បានក្លាយជាឧបករណ៍ក្នុងការតស៊ូមតិ ការពារសិទ្ធិមនុស្ស តាមដានកិច្ចការមន្ត្រីសាធារណៈ និងជាពិសេស ការវាយប្រហារសង្គ្រាមពាក្យសម្ដីយ៉ាងស្រួចស្រាល់ក្នុងចំណោមមនុស្សដែលមាននិន្នាការនយោបាយផ្សេងគ្នា។ ដោយបារម្ភពីឥទ្ធិពលអវិជ្ជមាននៃសារនយោបាយតាមបណ្ដាញសង្គម អង្គការសភាយុវជនខ្មែរ សហការជាមួយអង្គការខុមហ្រែ្វល (COMFREL) បង្កើតជាវេទិកាយុវជនមួយស្ដីពី "នយោបាយសម័យបច្ចេកវិទ្យា" នៅព្រឹកថ្ងៃទី២០ ធ្នូ ដើម្បីឲ្យយុវជនខ្មែរចេះប្រើប្រាស់បណ្ដាញសង្គមរបស់ខ្លួនចំទិសដៅ និងមានប្រសិទ្ធភាព។មន្ត្រីអង្គការសង្គមស៊ីវិល អំពាវនាវដល់អ្នកនយោបាយខ្មែរគ្រប់និន្នាការដែលកំពុងប្រើប្រាស់បណ្ដាញសង្គម ដើម្បីជាមធ្យោបាយទាក់ទងជាមួយអ្នកគាំទ្រ បញ្ចេញតែសារនយោបាយណាដែលមានលក្ខណៈសន្តិភាព និងការអភិវឌ្ឍ ដោយចៀសវាងសម្ដីទាំងឡាយណាដែលមានលក្ខណៈញុះញង់ និងបំបែកបំបាក់សាមគ្គីជាតិ។ប្រធានអង្គការសភាយុវជនខ្មែរ លោក ឡុង គឹមឃន កត់សម្គាល់ថា ការប្រើប្រាស់បណ្ដាញសង្គមក្នុងការផ្សព្វផ្សាយពីគោលនយោបាយរបស់គណបក្សនីមួយៗ មានលក្ខណៈកាន់តែផុសផុល។ប្រមុខដឹកនាំរដ្ឋាភិបាល មេបក្សប្រឆាំង និងអ្នកនយោបាយជាច្រើនផ្សេងទៀត កំពុងមមាញឹកក្នុងការទាញយកប្រជាប្រិយភាពពីពលរដ្ឋ តាមរយៈប្រព័ន្ធបច្ចេកវិទ្យាថ្មីនេះ។ លោក ឡុង គឹមឃន មើលឃើញថា សាររបស់អ្នកនយោបាយតាមរយៈបណ្ដាញសង្គមរបស់ពួកគេ នឹងមានឥទ្ធិពលដល់ការសម្រេចចិត្តរបស់ពលរដ្ឋ៖ «»។ទិន្នន័យមូលដ្ឋានខែកញ្ញា ឆ្នាំ២០១៥ របស់ក្រសួងប្រៃសណីយ៍ និងទូរគមនាគមន៍ បង្ហាញថា អតិថិជនអ៊ីនធឺណិតទាំងចល័ត និងអចល័តនៅកម្ពុជា មានចំនួនជាង ៦លាននាក់ (៦.២៥៦.៣៨៨នាក់)។ លើសពីនេះ ទីភ្នាក់ងារផ្សព្វផ្សាយពាណិជ្ជកម្ម វីអាសុសល (We Are Social) របស់សិង្ហបុរី (Singapore) រកឃើញថា អ្នកប្រើប្រាស់បណ្ដាញសង្គមដ៏សកម្មនៅកម្ពុជា បានកើនឡើងរហូតដល់ជាង ៣លាននាក់ (៣,៤លាននាក់)។ដោយសារតែកំណើនអ្នកប្រើប្រាស់កាន់តែច្រើន រដ្ឋាភិបាលកម្ពុជា ហាក់មានការព្រួយបារម្ភ និងបង្កើតជាវិធានការផ្សេងៗ ដើម្បីគ្រប់គ្រងប្រព័ន្ធព័ត៌មានវិទ្យា។ វិធានការទាំងនោះរួមមាន សេចក្តីព្រាងច្បាប់ស្តីពីការគ្រប់គ្រងប្រព័ន្ធបច្ចេកវិទ្យា គម្រោងដំឡើងឧបករណ៍តាមដានលើក្រុមហ៊ុនផ្គត់ផ្គង់សេវាអ៊ីនធឺណិត និងការបង្កើតក្រុមប្រយុទ្ធប្រឆាំងបទឧក្រិដ្ឋលើប្រព័ន្ធព័ត៌មានវិទ្យា ដើម្បីឃ្លាំមើលគេហទំព័រ និងបណ្ដាញសង្គមហ្វេសប៊ុកមួយចំនួន។វិធានការទាំងប៉ុន្មានរបស់រដ្ឋាភិបាលនេះ ត្រូវរងការរិះគន់ច្រើនពីមជ្ឈដ្ឋានជាតិ និងអន្តរជាតិ ហើយនៅចុងឆ្នាំ២០១៤ ទីស្ដីការគណៈរដ្ឋមន្ត្រីបានទម្លាក់ចោលសេចក្តីព្រាងច្បាប់ស្តីពីការគ្រប់គ្រងប្រព័ន្ធបច្ចេកវិទ្យា។ យ៉ាងនេះក្តី មន្ត្រីរដ្ឋាភិបាលបានប្រកាសថា នឹងចាត់វិធានការទាំងផ្លូវបច្ចេកទេស និងផ្លូវច្បាប់ បើសិនជាមានជនណាប្រើប្រាស់បណ្ដាញព័ត៌មានសង្គម ដោយប្រើពាក្យអសុរោះ ប្រមាថ មាក់ងាយ បំផ្លើស និងវាយប្រហារបរិហារបង្កាច់កេរ្តិ៍ទៅលើមន្ត្រីរាជការសាធារណៈ។តាមរយៈការបកស្រាយបែបនេះ អ្នកនយោបាយ សកម្មជន និងយុវជនមួយចំនួន ត្រូវបានតុលាការចាប់ខ្លួនជាបន្តបន្ទាប់ ហើយត្រូវបាននាំយកមកកាត់ទោសតាមក្រមព្រហ្មទណ្ឌនៃព្រះរាជាណាចក្រកម្ពុជា ពេលដែលពួកគេបង្ហោះព័ត៌មាន និងសារមួយចំនួននៅលើបណ្ដាញសង្គមហ្វេសប៊ុករបស់ពួកគេ។ឧទាហរណ៍ករណីយុវជន គង់ រ៉ៃយ៉ា ដែលត្រូវបានតុលាការចោទប្រកាន់ពីបទញុះញង់ឲ្យប្រព្រឹត្តបទឧក្រិដ្ឋ ក្រោយពេលដែលយុវជនរូបនេះសរសេរអំពីបដិវត្តន៍ពណ៌នៅក្នុងហ្វេសប៊ុករបស់ខ្លួន។ករណីដោយឡែកមួយទៀត គឺសមាជិកព្រឹទ្ធសភា លោក ហុង សុខហួរ រួមទាំង លោក សម រង្ស៊ី ប្រធានគណបក្សប្រឆាំងផង ត្រូវបានតុលាការចោទពីបទក្លែងឯកសារសាធារណៈ បទប្រើប្រាស់ឯកសារក្លែង បទញុះញង់ឲ្យមានភាពវឹកវរ និងអសន្តិសុខសង្គម ក្រោយពេលដែលលោកបង្ហោះសំណៅឯកសារមិនត្រឹមត្រូវ នៃសន្ធិសញ្ញាព្រំដែនកម្ពុជា-វៀតណាម ឆ្នាំ១៩៧៩។ទាក់ទងរឿងនេះ នាយិកាមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព យល់ឃើញថា អ្នកនយោបាយ ពិសេសរដ្ឋាភិបាល គួរតែព្យាយាមទាញប្រយោជន៍ពីប្រព័ន្ធបច្ចេកវិទ្យាថ្មីនេះ ជាជាងគិតតែពីការរឹតត្បិត៖ «»។ទាំង លោក ឡុង គឹមឃន និងអ្នកស្រី ចក់ សុភាព សុទ្ធតែចង់ឃើញអ្នកនយោបាយផ្តល់ជាសារអប់រំដល់អ្នកគាំទ្ររបស់ខ្លួន ដើម្បីចៀសវាងគំនិតជ្រុលនិយម ស្អប់ និងគុំកួនគ្នាទៅវិញទៅមក ដោយគ្រាន់តែមានទស្សនៈនយោបាយផ្សេងគ្នា៕ ដកស្រង់ពីវិទ្យុអាស៊ីសេរី ចេញផ្សាយថ្ងៃទី២០ ខែធ្នូ ឆ្នាំ២០១៥។