-
ពលរដ្ឋ៣៧គ្រួសាររងផលប៉ះពាល់ពីការសង់មណ្ឌលយោធិនពិការទាមទារប្លង់កម្មសិទ្ធិដីធ្លី
- Issue Date 23-Dec-2015
ពលរដ្ឋ ៣៧គ្រួសារនៅភូមិស្នារសង្គ្រាម ឃុំបល្ល័ង្ក ស្រុកប្រាសាទបាគង ចម្ងាយជាង ៤០គីឡូម៉ែត្រភាគឦសានពីទីរួមខេត្តសៀមរាប បានកើតមានវិបត្តិដីធ្លីរយៈពេល ៤ឆ្នាំមកហើយ ចាប់តាំងតែពីរដ្ឋាភិបាលយកដីព្រៃរបស់រដ្ឋជាច្រើនហិកតារ ទៅសាងសង់ធ្វើមណ្ឌលអភិវឌ្ឍន៍យោធិនពិការ៣១៧ នៅក្បែរនោះ ធ្វើឲ្យប៉ះពាល់ដល់ដីស្រែ និងចម្ការខ្លះរបស់ពួកគាត់។ក្រុមអ្នកភូមិបានលើកគ្នាទៅជួបអាជ្ញាធរខេត្តសៀមរាប និងអាជ្ញាធរស្រុកប្រាសាទបាគង ជាញឹកញាប់ ដើម្បីទាមទារឲ្យមានការដោះស្រាយ ប៉ុន្តែរហូតមកទល់ពេលនេះ មិនមានដំណោះស្រាយណាមួយសម្រាប់ពួកគាត់នៅឡើយ។ អ្នកភូមិស្នារសង្គ្រាម នៃឃុំបល្ល័ង្ក ចំនួន ៣៧គ្រួសារ ដែលមានទំនាស់ដីធ្លីអូសបន្លាយជាច្រើនឆ្នាំមកហើយ បានទាមទារជាថ្មីទៅអាជ្ញាធរស្រុកប្រាសាទបាគង ឲ្យធ្វើការសម្រេចចិត្តចេញប្លង់កម្មសិទ្ធិដីធ្លីដែលកំពុងតែមានទំនាស់នោះ មកឲ្យពួកគេដើម្បីបញ្ចប់ការរង់ចាំដំណោះស្រាយនានា ដែលចេះតែបាត់ទៅៗជាច្រើនឆ្នាំមកហើយ។កាលពីរសៀលថ្ងៃទី២១ ខែធ្នូ កន្លងទៅ ក្រុមអ្នកភូមិប្រមាណ ២០នាក់ បានលើកគ្នាទៅជួបប្រជុំជាមួយអាជ្ញាធរស្រុកប្រាសាទបាគង ដោយស្នើសុំឲ្យជួយធ្វើប័ណ្ណកម្មសិទ្ធិលើដីដែលមានទំនាស់ មកឲ្យពួកគេបានកាន់កាប់ស្របច្បាប់ ពីព្រោះពួកគេមិនអាចរង់ចាំការដោះស្រាយដ៏យូរទៀតទេ។តំណាងអ្នកភូមិស្នារសង្គ្រាម ម្នាក់ក្នុងចំណោមអ្នកមានវិបត្តិដីធ្លីជាច្រើនគ្រួសារទៀត គឺលោកស្រី សៀន រី។ លោកស្រីមានប្រសាសន៍ថា រយៈពេល ៤ឆ្នាំមកហើយ រូបគាត់ និងអ្នកភូមិ បានដើរប្ដឹងពីរឿងដីដែលប៉ះពាល់ដោយសារតែការសាងសង់មណ្ឌលអភិវឌ្ឍន៍យោធិនពិការ៣១៧ និងប៉ះពាល់ជាមួយ លោក សៅ រ៉ានី ដែលជាមន្ត្រី។ លោកស្រី សៀន រី បញ្ជាក់ថា ការដើរប្ដឹងទាមទារឲ្យដោះស្រាយដីជាច្រើនឆ្នាំមកនេះ ធ្វើឲ្យពួកគាត់ភ័យព្រួយពីរឿងបាត់បង់ដីស្រែចម្ការផង និងគ្មានពេលវេលាប្រកបការងារចិញ្ចឹមជីវិតផង៖ «ទាមទារឲ្យអាជ្ញាធរធ្វើប្លង់នេះ ដើម្បីឲ្យបងប្អូននេះបាត់ភ័យបាត់ខ្លាចរឿងគេឈូសឆាយ ហើយយើងនឹងចេញទៅធ្វើការរកស៊ីចិញ្ចឹមជីវិតទៅមុខ»។អភិបាលស្រុកប្រាសាទបាគង លោក ភូ សំអាត ដែលទទួលជួបប្រជុំជាមួយប្រជាពលរដ្ឋទាំងនោះ មានប្រសាសន៍ថា អ្នកភូមិស្នារសង្គ្រាម ដែលលើកគ្នាមកសុំធ្វើប័ណ្ណកម្មសិទ្ធិដីធ្លីនោះ គឺកំពុងតែមានទំនាស់ដី ៣ករណីផ្សេងគ្នា គឺគ្រួសារខ្លះបានប៉ះពាល់ដីធ្លីដោយសារដីកាដកហូតដីព្រៃលេខ០៨៥ តាំងពីឆ្នាំ២០០៦ គ្រួសារខ្លះប៉ះពាល់ដីធ្លីដោយសារការសាងសង់មណ្ឌលអភិវឌ្ឍន៍យោធិនពិការ៣១៧ តាំងពីឆ្នាំ២០១១ និងគ្រួសារខ្លះទៀត ប៉ះពាល់ដោយសារការសាងសង់មណ្ឌលយោធិនពិការផង និងប៉ះពាល់ជាមួយ លោក សៅ រ៉ានី ដែលជាមន្ត្រីម្នាក់ផង៖ «ខ្ញុំក៏ឲ្យគាត់ទៅធ្វើឯកសារចេញជា ៣ក្រុមហ្នឹងមក ចាំខ្ញុំធ្វើសំណើសុំទៅខេត្តសៀមរាប ថាតើវាអាចវាស់វែងដីហ្នឹងជូនពួកគាត់បានដែរឬក៏អត់? ឬក៏មិនអាចដោយសារមានមូលហេតុផ្សេង»។អ្នកស៊ើបអង្កេតរបស់សមាគមការពារសិទ្ធិមនុស្សអាដហុក (ADHOC) ខេត្តសៀមរាប លោក សួស ណារិន បានហៅចំណាត់ការដោះស្រាយរបស់អាជ្ញាធរខេត្តសៀមរាប ទៅលើរឿងទំនាស់ដីធ្លីនៅភូមិស្នារសង្គ្រាម នោះ ថាមានភាពយឺតយ៉ាវយ៉ាងខ្លាំង។អាជ្ញាធរស្រុកប្រាសាទបាគង ទទួលស្គាល់ថា ការដោះស្រាយរឿងដីធ្លីទីនោះ គឺពិតជាយឺតយ៉ាវមែន ដោយសារតែកន្លងទៅ អាជ្ញាធរធ្លាប់ព្រមព្រៀងឲ្យប្រជាពលរដ្ឋដែលប៉ះពាល់ដីធ្លីដោយសារការសាងសង់មណ្ឌលអភិវឌ្ឍន៍យោធិនពិការ៣១៧ អាចទទួលបានគោលនយោបាយផ្ទះ ១ខ្នង និងដីទំហំ ១ហិកតារកន្លះ ដូចគ្នានឹងយោធិនពិការដែរ ក៏ប៉ុន្តែបញ្ហានៅត្រង់ថា ដីដែលត្រូវយកទៅធ្វើមណ្ឌលអភិវឌ្ឍន៍យោធិនពិការ៣១៧ នោះ នៅមិនទាន់គ្រប់គ្រាន់ ដោយសារចេះតែប៉ះពាល់លើមជ្ឈដ្ឋានជាច្រើនទៀត ហើយមិនទាន់ដោះស្រាយបាននៅឡើយ៕ ដកស្រង់ពីវិទ្យុអាស៊ីសេរី ចេញផ្សាយថ្ងៃទី២២ខែធ្នូ ឆ្នាំ២០១៥ ។